క్రాష్ టెస్ట్‌లో ఈ కారుకి 5-స్టార్ వచ్చింది.. మిడిల్ క్లాస్ కుటుంబాలకు పర్ఫెక్ట్‌గా సరిపోతుంది!

హోండా అమేజ్ (Honda Amaze) మూడవ తరం వెర్షన్ తన భద్రతా ప్రమాణాలతో భారత మార్కెట్లో మరోసారి తన స్థాయిని నిరూపించుకుంది. ఇటీవల భారత్ NCAP నిర్వహించిన క్రాష్ టెస్ట్‌లో ఈ కారు అద్భుతమైన ఫలితాలను సాధించింది. ప్రయాణికుల రక్షణను అత్యంత ప్రాధాన్యతగా తీసుకుని రూపొందించిన ఈ కొత్త జనరేషన్ అమేజ్, టెస్ట్‌లో 5-స్టార్ సేఫ్టీ రేటింగ్ పొంది అందరినీ ఆకట్టుకుంది. భారతదేశంలో ఈ మూడవ తరం అమేజ్ 2024 డిసెంబరులో విక్రయాలకు వచ్చినప్పటి నుంచి కాంపాక్ట్ సెడాన్ సెగ్మెంట్‌లో మంచి ఆదరణ పొందుతోంది. ఇప్పుడు క్రాష్ టెస్ట్ ఫలితాలు రావడంతో ఈ కారుకు మరింత విశ్వసనీయత పెరిగింది.

పెద్దల ప్రయాణికుల రక్షణలో 5-స్టార్ రేటింగ్ నమోదు చేసిన అమేజ్, తన బలమైన బాడీ స్ట్రక్చర్, ఇంటెలిజెంట్ డిజైన్, ఆధునిక సేఫ్టీ ఫీచర్లతో తన సామర్థ్యాన్ని నిరూపించింది. పిల్లల రక్షణ విభాగంలో కూడా ఈ కారు 4-స్టార్ రేటింగ్ సాధించింది, ఇది కుటుంబ వినియోగదారుల కోసం పెద్ద ప్లస్ పాయింట్‌గా నిలుస్తుంది. 2024 డిసెంబరులో భారత మార్కెట్లోకి వచ్చిన అన్ని వేరియంట్లకు ఇది వర్తిస్తుంది.

హోండా ఈ కారును రూపకల్పన చేయడం నుంచి తయారీ వరకు ప్రతి దశలో భద్రతను ప్రధానంగా పరిగణించినట్లు ఈ ఫలితాలు స్పష్టంగా తెలియజేస్తున్నాయి. ఇలాంటి 5-స్టార్ రేటింగ్ సాధించడం, అమేజ్‌ను భారత మార్కెట్లో అందుబాటులో ఉన్న అత్యంత సురక్షిత కాంపాక్ట్ సెడాన్‌లలో ఒకటిగా నిలబెట్టింది. ప్రయాణికుల కోసం భరోసా, కుటుంబాల కోసం సురక్షిత ప్రయాణం, హోండా బ్రాండ్ విశ్వసనీయత దీని డిమాండ్‌ను పెంచుతున్నాయి.

భారత్ NCAP నిర్వహించిన పరీక్షల్లో ఈ కారు వయోజన ప్రయాణికుల రక్షణలో అత్యుత్తమ ప్రదర్శన ఇచ్చింది. ఫ్రంటల్ ఇంపాక్ట్ టెస్ట్‌లో 16లో 14.33 స్కోర్ చేయగా, సైడ్ ఇంపాక్ట్ టెస్ట్‌లో 16లో 14 పాయింట్లు సాధించింది. ఈ రెండు ఫలితాలను కలిపి చూస్తే, వయోజన భద్రత విభాగంలో ఇది మొత్తం 24లో 23.81 స్కోర్ సాధించింది. సాధారణంగా ఈ స్థాయి స్కోర్‌ను చాలా అరుదుగా ఏదైనా కాంపాక్ట్ సెడాన్ పొందుతుంది.

ఈ అద్భుతమైన ఫలితాల వెనుక అమేజ్‌లో అమర్చిన భద్రతా వ్యవస్థలు కీలక పాత్ర పోషించాయి. ఫ్రంట్ ఎయిర్‌బ్యాగులు, ఎలక్ట్రానిక్ స్టెబిలిటీ కంట్రోల్, రియర్ పార్కింగ్ సెన్సార్లు, ISOFIX మౌంట్‌లు, చైల్డ్ సీట్లు వంటి ఫీచర్లు ఢీకొనే సమయంలో ప్రయాణికులు, పిల్లలకు గరిష్ట రక్షణను అందించాయి. పిల్లల భద్రత విభాగంలో కూడా ఈ కారు అదే స్థాయిలో మెరిసింది. చైల్డ్ రెస్ట్రెయింట్ సిస్టమ్ టెస్ట్‌లో 12లో 12 పాయింట్లు అందుకుంది.

డైనమిక్ టెస్ట్‌లో కూడా 8లో 7.81 స్కోర్ చేసింది. మూడు సంవత్సరాల పిల్లల పరిమాణంలో ఉన్న డమ్మీని ఉపయోగించినా, లేదా 18 నెలల శిశువు డమ్మీతో పరీక్షించినా, ఈ కారు ఇచ్చిన రక్షణ స్థాయి అత్యంత సురక్షితమైనదిగా తేలింది. 18 నెలల పిల్లల డమ్మీతో టెస్ట్ చేసినప్పుడు 8లో 8 పూర్తి స్కోర్ రావడం అమేజ్ భద్రత ప్రమాణాలకు మరొక ముద్ర వేసినట్టే.

దీనిపై హోండా కార్స్ ఇండియా మార్కెటింగ్, సేల్స్ వైస్ ప్రెసిడెంట్ కునాల్ బెహ్ల్ మాట్లాడుతూ, ఈ రేటింగ్ హోండా ప్రసిద్ధ మోడళ్లలో అత్యంత అగ్రశ్రేణి భద్రతను సమగ్రపరచడంలో ఉన్న నిబద్ధతను ప్రతిబింబిస్తుందని అన్నారు. 2050 నాటికి హోండా వాహనాలతో సంబంధం ఉన్న ట్రాఫిక్ ఢీకొనడం వల్ల కలిగే మరణాలను తగ్గించాలనే హోండా ప్రపంచ లక్ష్యంలో ఇది ముందడుగు అని ఆయన అన్నారు.