మార్కెట్లో వీటి ఆధిపత్యం పెరిగింది భయ్యా.. మరి 27కిమీ మైలేజ్ ఇస్తుంటే కొనకుండా ఉంటారా ?

భారతదేశంలో హైబ్రిడ్ కార్ల సెగ్మెంట్ అనూహ్యంగా వేగం పుంజుకుంటోంది. ఇంధన ధరలు పెరుగుతున్న ప్రస్తుత పరిస్థితుల్లో రోజువారీ ఉపయోగం, సుదూర ప్రయాణాల కోసం వాహనాలు నడపడం చాలా ఖర్చుతో కూడుకున్న వ్యవహారంగా మారింది. ఈ కారణంగానే గత కొన్నేళ్లుగా తక్కువ ఖర్చుతో ఎక్కువ మైలేజీని అందించే స్ట్రాంగ్ హైబ్రిడ్ కార్లు సాధారణ వినియోగదారులకు కూడా ప్రియంగా మారాయి.

ఎలక్ట్రిక్ కార్ల లాభాన్ని, పెట్రోల్ ఇంజిన్ సౌలభ్యాన్ని ఒకేసారి అందించే ఈ హైబ్రిడ్ వాహనాలు, అద్భుతమైన డ్రైవింగ్ అనుభవాన్ని కూడా ఇస్తున్నాయి. ప్రస్తుతం మార్కెట్‌లో అందుబాటులో ఉన్న కొన్ని ముఖ్యమైన, తక్కువ ధర హైబ్రిడ్ కార్ల గురించి ఇప్పుడు తెలుసుకుందాం.

టయోటా ఇన్నోవా హైక్రాస్ (Toyota Innova Hycross)
టయోటా ఇన్నోవా హైక్రాస్ ఒక ప్రీమియం ఎంపీవీ (MPV) మోడల్‌గా భారతీయ వాహనదారుల నుంచి భారీ ఆదరణ పొందింది. ఇది 2.0-లీటర్ పెట్రోల్ ఇంజిన్‌తో పాటు టయోటా అత్యంత విశ్వసనీయమైన సెల్ఫ్-ఛార్జింగ్ స్ట్రాంగ్ హైబ్రిడ్ టెక్నాలజీని కలిగి ఉంది. దీని కారణంగా ఇన్నోవా హైక్రాస్ ఇంధనాన్ని సమర్థవంతంగా ఆదా చేస్తూ మెరుగైన డ్రైవింగ్ అనుభవాన్ని అందిస్తుంది.

ఇందులో డ్రైవ్ మోడ్ స్విచ్ ఉండటం వలన, డ్రైవర్లు పెట్రోల్-ఓన్లీ, హైబ్రిడ్ మోడ్‌ల మధ్య సులభంగా మారవచ్చు. ఇది 23.24 కిలోమీటర్ల మైలేజీని వాగ్దానం చేస్తుంది. దీని హైబ్రిడ్ వేరియంట్ ఎక్స్-షోరూమ్ ధర రూ.25.90 లక్షల నుంచి ప్రారంభమవుతుంది. ఫీచర్లలో వెంటిలేటెడ్ సీట్లు, లాంగ్-స్లైడ్ ఆటోమన్ సీట్లు, పనోరమిక్ సన్‌రూఫ్, 360-డిగ్రీ కెమెరా వంటివి ఉన్నాయి.

మారుతి సుజుకి ఇన్విక్టో (Maruti Suzuki Invicto)
మారుతి సుజుకి ఇన్విక్టో, ఇన్నోవా హైక్రాస్ తయారైన అదే టీఎన్‌జీఏ ప్లాట్‌ఫామ్‌పై నిర్మించబడింది. అందువల్ల హైక్రాస్‌తో సమానమైన స్థిరత్వం, ప్రయాణ సౌలభ్యం, స్మూత్ డ్రైవింగ్‌ను ఇది అందిస్తుంది. ఇంజిన్ పరంగా పెద్దగా తేడాలు లేవు.

అయితే, ఇన్విక్టో కేవలం హైబ్రిడ్ వేరియంట్లలో మాత్రమే లభిస్తుంది. దీని ఎక్స్-షోరూమ్ ధర రూ.24.97 లక్షల నుంచి ప్రారంభమవుతుంది. ఇది ఆరు ఎయిర్‌బ్యాగ్‌లు, 360-డిగ్రీ కెమెరా, సుజుకి కనెక్ట్ టెక్నాలజీ వంటి ప్రీమియం సేఫ్టీ ఫీచర్లను కలిగి ఉంది.

హోండా సిటీ e:HEV (Honda City e:HEV)
హైబ్రిడ్ సెడాన్ మోడళ్లలో, స్ట్రాంగ్ హైబ్రిడ్ టెక్నాలజీతో ఉన్న ఏకైక మోడల్ హోండా సిటీ e:HEV. ఈ హైబ్రిడ్ వేరియంట్ కేవలం టాప్-ఎండ్ ZX వేరియంట్‌లో మాత్రమే లభిస్తుంది. దీని ఎక్స్-షోరూమ్ ధర రూ.19.48 లక్షల నుంచి ప్రారంభమవుతుంది. ఇందులో ఇన్‌లైన్ 4-సిలిండర్ అట్కిన్సన్ సైకిల్ i-VTEC పెట్రోల్ ఇంజన్, రెండు ఎలక్ట్రిక్ మోటార్లు ఉన్నాయి. ఈ అడ్వాన్సుడ్ హైబ్రిడ్ సిస్టమ్ దాదాపు 27.26 కిలోమీటర్ల అత్యంత అద్భుతమైన మైలేజీని అందిస్తుంది.

టయోటా హైరైడర్, మారుతి గ్రాండ్ విటారా హైబ్రిడ్
కాంపాక్ట్ ఎస్‌యూవీ (SUV) విభాగంలో హైబ్రిడ్ మోడళ్లకు మంచి డిమాండ్ ఉంది. టయోటా అర్బన్ క్రూయిజర్ హైరైడర్ హైబ్రిడ్ ఎస్‌యూవీని రూ.16.45 లక్షల నుంచి సొంతం చేసుకోవచ్చు. ఇందులో 1.5-లీటర్ పెట్రోల్ ఇంజన్, ఒక ఎలక్ట్రిక్ మోటార్, e-CVT ట్రాన్స్‌మిషన్ ఉన్నాయి. ఇది దాదాపు 27.97 కిలోమీటర్ల మైలేజీని సాధిస్తుంది. దీనిలో 6 ఎయిర్‌బ్యాగ్‌లు, 360-డిగ్రీ కెమెరా, హిల్ హోల్డ్ కంట్రోల్ వంటి భద్రతా ఫీచర్లు ఉన్నాయి.

ఇక, మారుతి సుజుకి గ్రాండ్ విటారా హైబ్రిడ్ కూడా టయోటా హైరైడర్ హైబ్రిడ్ తయారైన అదే ప్లాట్‌ఫామ్‌పై, అదే ఇంజన్-హైబ్రిడ్ టెక్నాలజీతో నిర్మించబడింది. అందువల్ల ఇది హైరైడర్‌తో సమానమైన పనితీరు, మైలేజ్, స్మూత్ డ్రైవింగ్ అనుభవాన్ని అందిస్తుంది. దీని ఎక్స్-షోరూమ్ ధర రూ.16.63 లక్షల నుంచి ప్రారంభమవుతుంది.