కారు కొనే ప్లాన్ ఉందా? అయితే హ్యుందాయ్ నైట్ ఎడిషన్ కార్లు చూడండి.. రోడ్డు మీద వెళ్తుంటే మీరే స్పెషల్ !

కారు మార్కెట్‌లో ఇప్పుడు కొత్త ట్రెండ్ మొదలైంది. కార్ల కంపెనీలు తమ పాపులర్ మోడళ్లను కంప్లీట్ బ్లాక్ కలర్‌లో, అదిరిపోయే లుక్‌తో విడుదల చేస్తున్నాయి. ఈ నైట్ ఎడిషన్ కార్లకు మంచి క్రేజ్ వచ్చింది. ఇప్పుడు హ్యుందాయ్ కూడా తమ క్రెటా, ఐ20, అల్కాజర్, క్రెటా ఎలక్ట్రిక్ కార్లలో ఈ నైట్ ఎడిషన్ మోడళ్లను తీసుకొచ్చింది. ఈ కొత్త కార్ల ఫీచర్లు, ధరలు, ఇతర వివరాలు తెలుసుకుందాం.

హ్యుందాయ్ కంపెనీ తమ కార్లకు నైట్ ఎడిషన్‎లను తీసుకురావడం ఇదే కొత్త కాదు. గతంలోనే క్రెటా, వెన్యూ, ఎక్స్‌టర్ వంటి మోడళ్లకు ఈ స్పెషల్ ఎడిషన్లను తీసుకొచ్చి మంచి సక్సెస్ సాధించింది. ఇప్పుడు ఆ ట్రెండ్‌ను మరింత ముందుకు తీసుకెళ్తూ, తమ ప్రముఖ మోడళ్లైన ఐ20, అల్కాజర్, క్రెటా ఎలక్ట్రిక్ కార్లలో కూడా నైట్ ఎడిషన్‎లను విడుదల చేసింది. ఈ కొత్త మోడళ్లను కలుపుకుని హ్యుందాయ్ నైట్ ఎడిషన్ కార్ల సంఖ్య ఆరుకు చేరింది.

సాధారణంగా నైట్ ఎడిషన్, బ్లాక్ ఎడిషన్ లేదా డార్క్ ఎడిషన్ అంటే ఆ కారు మొత్తం బ్లాక్ కలర్లో ఉంటుంది. కారు బాడీతో పాటు గ్రిల్, అల్లాయ్ వీల్స్, లోగోలు, ఇతర డిజైన్ యాక్సెంట్‌లు అన్నీ బ్లాక్‌లో ఉంటాయి. ఈ ఎడిషన్ కార్లకు మరింత స్టైలిష్ లుక్ ఇవ్వడానికి రెడ్ కలర్ బ్రేక్ కాలిపర్లను, స్పోర్టీ మెటల్ పెడల్స్‌ను కూడా జోడించారు.

లోపల కూడా డ్యాష్‌బోర్డ్, సీట్లు కంప్లీట్ బ్లాక్ కలర్లో ఉండి, కొన్ని చోట్ల మెరుస్తున్న యాక్సెంట్‌లను కలిగి ఉంటాయి. సాధారణ కార్ల కంటే డిఫరెంటుగా, స్పెషల్‎గా కనిపించాలని కోరుకునే కస్టమర్లను టార్గెట్ చేసుకుని ఈ ఎడిషన్లను విడుదల చేస్తారు.

2022లో తొలిసారిగా నైట్ ఎడిషన్ కార్లను విడుదల చేసినప్పటి నుంచి హ్యుందాయ్‌కి ఈ మోడళ్లతో మంచి విజయం దక్కింది. ఇప్పటివరకు 77 వేల కంటే ఎక్కువ నైట్ ఎడిషన్ కార్లను విక్రయించారు. హ్యుందాయ్ కార్లు ఎంతగా పాపులర్ అయ్యాయో ఈ గణాంకాలు చూస్తే అర్థమవుతుంది. ఇప్పుడు కొత్తగా వచ్చిన మోడళ్లలో క్రెటా ఎలక్ట్రిక్ నైట్ ఎడిషన్ అందరి దృష్టిని ఆకర్షిస్తోంది.

ఇది హ్యుందాయ్ నుంచి వచ్చిన అత్యంత చవకైన ఎలక్ట్రిక్ కారు. ఈ కారులో నైట్ ఎడిషన్ రావడం ఇదే మొదటిసారి. ఇది 42kWh, 51.4kWh అనే రెండు బ్యాటరీ ఆప్షన్లలో లభిస్తుంది. 42kWh బ్యాటరీ ప్యాక్ 135 హెచ్‌పీ పవర్, 51.4kWh బ్యాటరీ ప్యాక్ 171 హెచ్‌పీ పవర్ ప్రొడ్యూస్ చేస్తాయి.

ఈ రెండు మోడళ్లలో 255 Nm టార్క్ ఉంటుంది. ఈ కార్లలో డ్యూయల్-ఛానల్ డాష్‌క్యామ్, రియర్ వైర్‌లెస్ ఛార్జర్, అప్‌డేటెడ్ లెవెల్ 2 ADAS వంటి అడ్వాన్సుడ్ ఫీచర్లు ఉన్నాయి. దీని ఎక్స్-షోరూమ్ ధరలు రూ.21.44 లక్షల నుంచి రూ.24.54 లక్షల వరకు ఉన్నాయి.

హ్యుందాయ్ పాపులర్ హ్యాచ్‌బ్యాక్ ఐ20 లో కూడా నైట్ ఎడిషన్ వచ్చింది. ఇది స్పోర్ట్జ్ (ఓ)(Sportz (O)), ఆస్టా (ఓ)(Asta (O)) అనే వేరియంట్లలో అందుబాటులో ఉంది. ఈ కారుకు వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, డ్యూయల్-ఛానల్ డాష్‌క్యామ్ వంటి ఫీచర్లు అదనంగా లభించాయి.

ఈ కారులో 1.2 లీటర్ పెట్రోల్ ఇంజిన్ ఉంటుంది. ఇది 83 హెచ్‌పీ పవర్ ఉత్పత్తి చేస్తుంది. ఐ20 నైట్ ఎడిషన్ ధరలు రూ.9.14 లక్షల నుంచి రూ.11.34 లక్షల వరకు ఉన్నాయి. ఐ20 ఎన్ లైన్ వెర్షన్‌లో కూడా నైట్ ఎడిషన్ అందుబాటులో ఉంది.

7 సీటర్ ఎమ్‌యూవీ అయిన అల్కాజర్ కూడా నైట్ ఎడిషన్‌లో వచ్చింది. ఇది కేవలం టాప్-స్పెక్ సిగ్నేచర్ వేరియంట్‌లో మాత్రమే లభిస్తుంది. ఈ కారులో 1.5 లీటర్ టర్బో-పెట్రోల్ ఇంజిన్ లేదా 1.5 లీటర్ డీజిల్ ఇంజిన్ ఆప్షన్లు ఉన్నాయి. పెట్రోల్ ఇంజిన్ 160 హెచ్‌పీ పవర్, డీజిల్ ఇంజిన్ 116 హెచ్‌పీ పవర్ ఉత్పత్తి చేస్తుంది. ఈ కారులో అదనంగా డ్యాష్‌క్యామ్ ఫీచర్ లభించింది. దీని ఎక్స్-షోరూమ్ ధరలు రూ.21.50 లక్షలు, రూ.21.70 లక్షలుగా ఉన్నాయి.

మొత్తం మీద, హ్యుందాయ్ నైట్ ఎడిషన్ కార్లు మార్కెట్‌లో మంచి స్పందన పొందుతున్నాయి. ఈ కొత్త మోడళ్లు కూడా విజయం సాధిస్తాయని కంపెనీ ఆశిస్తోంది.