మైలేజ్, సేఫ్టీ, ఫీచర్లు అన్నీ ఒకే కారులో.. రూ.5.49 లక్షలు.. పైగా పెట్రోల్ + CNG ఆప్షన్‌!

హ్యుందాయ్ ఎక్స్‌టర్ (Hyundai Exter) భారత మార్కెట్లోకి వచ్చిన ఒక చిన్న క్రాస్ఓవర్ SUVగా మంచి గుర్తింపు సంపాదించుకుంది. ముఖ్యంగా హ్యాచ్‌బ్యాక్ ధరలోనే SUV లుక్‌ను అందించడం దీని ప్రధాన ఆకర్షణ. కొత్తగా కారు కొనుగోలు చేయాలని భావిస్తున్న ఫస్ట్‌టైమ్ బయ్యర్లకు, అలాగే బడ్జెట్‌లోనే స్టైలిష్ కార్ కావాలనుకునే కుటుంబాలకు ఇది ఒక బెస్ట్ ఆప్షన్‌గా నిలుస్తోంది. సాధారణ హ్యాచ్‌బ్యాక్‌లతో పోలిస్తే ఎక్స్‌టర్ డిజైన్ చాలా బోల్డ్‌గా, మస్కులర్‌గా కనిపిస్తుంది. ధర విషయానికి వస్తే, హ్యుందాయ్ ఎక్స్‌టర్ ఎక్స్-షోరూమ్ ధరలు రూ. 5.49 లక్షల నుంచి ప్రారంభమై గరిష్టంగా రూ. 9.61 లక్షల వరకు ఉన్నాయి. ఈ ధర పరిధిలో SUV స్టైల్, హ్యుందాయ్ బ్రాండ్ నమ్మకం, ఆధునిక ఫీచర్లు కలిపి మంచి విలువను అందిస్తుంది.

అంతేకాదు, వేర్వేరు అవసరాలకు తగినట్టుగా హ్యుందాయ్ ఈ కారును మొత్తం ఏడు వేరియంట్లలో అందిస్తోంది. అవి EX, EX(O), S, S(O), SX, SX(O), మరియు SX(O) కనెక్ట్. ప్రతి వేరియంట్‌లో ఫీచర్లు, సౌకర్యాలు భిన్నంగా ఉండటంతో, బడ్జెట్, అవసరాలను బట్టి వినియోగదారులు తమకు సరిపోయే వేరియంట్‌ను ఎంచుకునే అవకాశం ఉంది. ఈ కారుకు ఉన్న పొడవైన, బాక్సీ డిజైన్ వల్ల లోపల క్యాబిన్ చాలా విశాలంగా అనిపిస్తుంది.

హ్యుందాయ్ ఎక్స్‌టర్ పనితీరు విషయానికి వస్తే, ఈ కాంపాక్ట్ క్రాస్ఓవర్ రోజువారీ వినియోగానికి సరిపోయే పవర్‌ట్రెయిన్‌తో వస్తుంది. ఈ కారులో 1.2-లీటర్, 4-సిలిండర్ పెట్రోల్ ఇంజిన్‌తో పాటు CNG ఇంజిన్ ఎంపికను కూడా హ్యుందాయ్ అందిస్తోంది. ఈ ఇంజిన్ గరిష్టంగా 82 bhp పవర్, 113.8 Nm టార్క్‌ను ఉత్పత్తి చేస్తుంది. నగర డ్రైవింగ్‌కు సరిపోయేలా ట్యూన్ చేసిన ఈ ఇంజిన్ స్మూత్ పికప్‌తో పాటు నమ్మకమైన పనితీరును అందిస్తుంది.

ట్రాన్స్‌మిషన్ ఎంపికల విషయానికి వస్తే, హ్యుందాయ్ ఎక్స్‌టర్‌ను 5-స్పీడ్ మాన్యువల్ గేర్‌బాక్స్‌తో పాటు ఆటోమేటిక్ ఆప్షన్‌లో కూడా అందిస్తోంది. దీంతో రోజూ ట్రాఫిక్ ఎక్కువగా ఉండే నగర రోడ్లపై డ్రైవ్ చేసే వారికి ఆటోమేటిక్ వేరియంట్ మంచి సౌకర్యాన్ని ఇస్తుంది. గేర్ మార్పులు సున్నితంగా ఉండటం వల్ల డ్రైవింగ్ అనుభవం అలసట లేకుండా ఉంటుంది. మైలేజ్ విషయంలో కూడా ఎక్స్‌టర్ నిరాశపరచదు. ఈ కారు 19.2 కిలోమీటర్లు మైలేజ్‌ను అందిస్తుంది.

మరో ముఖ్యమైన అంశం ఏమిటంటే, హ్యుందాయ్ ఎక్స్‌టర్ SUV CNG వేరియంట్‌లో కూడా అందుబాటులో ఉంది. పెట్రోల్ ఖర్చు తగ్గించుకోవాలనుకునే వినియోగదారులకు ఇది ఒక పెద్ద ప్లస్ పాయింట్. ఈ వేరియంట్‌లో 1.2-లీటర్ ద్వి-ఇంధన (పెట్రోల్ + CNG) ఇంజిన్‌ను హ్యుందాయ్ అందిస్తోంది. ఈ ఇంజిన్ CNG మోడ్‌లో గరిష్టంగా 68 bhp పవర్, 95.2 Nm టార్క్ను ఉత్పత్తి చేస్తుంది.

ట్రాన్స్‌మిషన్ విషయానికి వస్తే, CNG వేరియంట్ 5-స్పీడ్ మాన్యువల్ గేర్‌బాక్స్‌తో మాత్రమే అందుబాటులో ఉంటుంది. ఇది సింపుల్‌గా, నమ్మకంగా పనిచేసే సెటప్ కావడంతో దీర్ఘకాల వినియోగానికి అనువుగా ఉంటుంది. ముఖ్యంగా మైలేజ్ పరంగా ఈ కారు చాలా ఆకర్షణీయంగా ఉంది. కంపెనీ వెల్లడించిన వివరాల ప్రకారం, హ్యుందాయ్ ఎక్స్‌టర్ CNG వేరియంట్ కిలోకు సుమారు 27.1 కిలోమీటర్ల మైలేజ్ను అందిస్తుంది.

ఫీచర్ల విషయానికి వస్తే, హ్యుందాయ్ ఎక్స్‌టర్ ఈ సెగ్మెంట్‌కు మించిన సౌకర్యాలతో వస్తుంది. ఇందులో 8-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఫోన్ ఛార్జింగ్, ఆటోమేటిక్ ఎయిర్ కండిషనింగ్, అలాగే ఈ ధర శ్రేణిలో అరుదుగా కనిపించే సన్‌రూఫ్ కూడా అందిస్తున్నారు. దీనికి తోడుగా సెమీ-డిజిటల్ డ్రైవర్ డిస్‌ప్లే, క్రూయిజ్ కంట్రోల్ వంటి ఫీచర్లు డ్రైవింగ్ అనుభవాన్ని మరింత సౌకర్యవంతంగా మారుస్తాయి.

భద్రత అంశానికి హ్యుందాయ్ ఎక్స్‌టర్‌లో ప్రత్యేక ప్రాధాన్యత ఇచ్చారు. ఈ SUVలో అన్ని వేరియంట్‌లలోనూ స్టాండర్డ్‌గా కీలక భద్రతా ఫీచర్లను అందించడం గమనార్హం. ఆరు ఎయిర్‌బ్యాగులు అమర్చారు. దీనికి తోడుగా, ABS (యాంటీలాక్ బ్రేకింగ్ సిస్టమ్), EBD (ఎలక్ట్రానిక్ బ్రేక్‌ఫోర్స్ డిస్ట్రిబ్యూషన్), వెనుక పార్కింగ్ సెన్సార్లు కూడా అన్ని వేరియంట్‌లలోనే ఇవ్వబడ్డాయి.