తక్కువ ధరలో అత్యధికంగా అమ్ముడవుతున్న 7 సీటర్ కార్లు! ఫ్యామిలీ ట్రిప్స్‌కు ఇండియా బెస్ట్ కార్స్

భారత ఆటోమొబైల్ మార్కెట్లో MPVలు (మల్టీ-పర్పస్ వెహికల్స్) ఎప్పటి నుంచో ప్రత్యేక గుర్తింపును పొందుతున్నాయి. కుటుంబాల అవసరాలు మారుతున్న కొద్దీ, విశాలత, సౌకర్యం, వినియోగం కలిగిన కార్లకు డిమాండ్ గణనీయంగా పెరిగింది. సాధారణ 5-సీటర్ కార్లలో లేని స్పేస్, బెటర్ కమ్ఫర్ట్, ఫ్లెక్సిబుల్ సీటింగ్ ఆప్షన్లు MPVలను మరింత ఆకర్షణీయంగా మార్చాయి. పెద్ద కుటుంబ ప్రయాణాలు, లాంగ్ డ్రైవ్స్, రోజువారీ వినియోగం ఏ అవసరానికైనా సరిపోయే MPVలను ఇతర విభాగాల కంటే ప్రత్యేకంగా నిలబెడుతోంది. ఈ కార్లకు ఉన్న పెరుగుతున్న ఆసక్తి కారణంగా, MPV సెగ్మెంట్ భారత మార్కెట్లో అత్యంత వేగంగా ఎదుగుతున్న విభాగాలలో ఒకటిగా 2025 నాటికి రూపుదిద్దుకుంది. ఈ క్రమంలో ప్రస్తుతం మార్కెట్లో మంచి డిమాండ్ ఉన్న కొన్ని ఎంపీవీ కార్లను కథనంలో చూద్దాం.

Maruti Suzuki Ertiga: భారతీయ కుటుంబాలకు సరైన MPV అనే గుర్తింపు వచ్చిన మోడల్ ఏదైనా ఉంటే, అది ఎర్టిగా అనే చెప్పాలి. విస్తారమైన ఇంటీరియర్, తక్కువ నిర్వహణ ఖర్చు మరియు విలువైన పనితీరుతో మార్కెట్లో మన్ననలు పొందుతూ వస్తోంది. ఈ మోడల్‌కు ఉన్న ప్రజాదరణను చూస్తే, ఇది కేవలం ఒక వాహనం కాకుండా, భారత మధ్యతరగతి కుటుంబాల రోజువారీ జీవితంలో భాగంగా మారిపోయినట్లు తెలుస్తుంది.

2025 అక్టోబర్ నెలలో ఈ కారు 20,087 యూనిట్లు అమ్ముడవడం జరిగింది. ఇది గత ఏడాది అక్టోబర్‌తో పోలిస్తే 7% వృద్ధిని చూపుతోంది. ఇంకా పెద్ద విశేషం ఏమిటంటే, ఎర్టిగా వరుసగా ఆరవ ఆర్థిక సంవత్సరంలో కూడా భారతదేశంలో అత్యధికంగా అమ్ముడైన MPVగా తన ఆధిపత్యాన్ని కొనసాగించింది. 2025 ఆర్థిక సంవత్సరంలో మొత్తం 190,974 యూనిట్లు అమ్ముడవడం ఎర్టిగా స్థిరమైన డిమాండ్‌కు నిదర్శనం.

Toyota Innova: టయోటా ఇన్నోవా అనేది భారతీయ MPV మార్కెట్లోఎప్పటి నుంచో పెద్ద కుటుంబాలకు, లాంగ్ డ్రైవ్‌ ప్రేమికులకు, కంఫర్ట్‌ను ప్రాధాన్యంగా అందించే మోడల్. 2025 ఏప్రిల్ నుంచి అక్టోబర్ వరకు, ఇన్నోవా హైక్రాస్ + ఇన్నోవా క్రిస్టా కలిపి 64,678 యూనిట్లు అమ్ముడయ్యాయి. ఇది గత ఏడాది ఇదే కాలంతో పోలిస్తే 5% వృద్ధి, అంటే మార్కెట్లో స్థిరమైన డిమాండ్ కొనసాగుతోంది.

ఇందులో ముఖ్యంగా హైక్రాస్ మోడల్ ఒక్కదానికే 61% వాటా రావడం, కొత్త తరం వినియోగదారుల దృష్టిలో హైక్రాస్‌కు ఎంతటి పాపులారిటీ ఉందో చెబుతుంది. గత నెలలోనే 11,089 యూనిట్ల ఇన్నోవా హైక్రాస్ అమ్ముడవడం, నెలవారీగా 11.78% పెరుగుదల చూపింది. ఇది పండగ సీజన్ డిమాండ్, హైబ్రిడ్‌ ఇంజిన్‌కు ఉన్న ఆకర్షణను చూపిస్తుంది. హైక్రాస్‌‌ను ప్రత్యేకంగా నిలిపే అంశం దాని పెట్రోల్ హైబ్రిడ్ ఇంజిన్ + ఆటోమేటిక్ ట్రాన్స్‌మిషన్ కలయిక.

Maruti Suzuki XL6: మారుతి సుజుకి MPV శ్రేణిలో మరో బలమైన మోడల్ అయిన XL6, భారత్‌లో కంపెనీ స్థిరపడి ఉన్న దృఢమైన స్థానం‌ను మరింత బలోపేతం చేసింది. ప్రీమియం లుక్, 6-సీటర్ లేఅవుట్, సౌకర్యవంతమైన ఇంటీరియర్ కారణంగా ఈ మోడల్‌కు మార్కెట్లో ప్రత్యేకమైన గుర్తింపు ఉంది. 2025లో 23,000 యూనిట్లకు పైగా XL6 అమ్ముడవడం, MPV మార్కెట్‌లో మారుతి ప్రభావం ఎంత లోతుగా ఉందో స్పష్టం చేస్తోంది.

Kia Carens: గత నెలలో అత్యధికంగా అమ్ముడైన MPVలలో కారెన్స్ మరో కీలక మోడల్‌గా నిలిచింది. అక్టోబర్ 2024తో పోలిస్తే ఈ మోడల్ అమ్మకాలు 37.5% పెరిగి, మొత్తం 8,779 యూనిట్లు విక్రయించబడింది. ముఖ్యంగా, Kia EV లైనప్ పెరుగుతున్న ప్రాచుర్యం కూడా ఈ వృద్ధికి గణనీయంగా తోడ్పడింది. కుటుంబ అవసరాలను దృష్టిలో పెట్టుకుని రూపొందించిన Carens, 6-సీటర్, 7-సీటర్ సెటప్‌లలో అందుబాటులో ఉంది.