ఈ కారు కోసం ఎగబడుతున్న జనాలు.. అమ్మకాల్లో రికార్డు! అయినా ఆదాయంలో స్వల్ప క్షీణత

ప్రముఖ లగ్జరీ కార్ల తయారీ కంపెనీ జాగ్వార్ ల్యాండ్ రోవర్ (JLR) సంస్థ 2025 ఆర్థిక సంవత్సరంలో ప్రతికూల పరిస్థితులను ఎదుర్కొన్నప్పటికీ, తన స్థిరమైన ప్రదర్శనతో మరోసారి మార్కెట్లో తన ఉనికిని నిలబెట్టుకుంది. తాజాగా కంపెనీ నుంచి విడుదలైన సమాచారం ప్రకారం, ఎఫ్‌వై 2025లో కంపెనీ మొత్తం ఆదాయం 1.7 శాతం స్వల్పంగా తగ్గి 7.7 బిలియన్ యూరోల స్థాయికి చేరుకుంది. ఈ సంఖ్య గత సంవత్సరంతో పోలిస్తే తక్కువగానే ఉన్నప్పటికీ, సంస్థ వరుసగా పదవ త్రైమాసికంలో లాభాలను నమోదు చేయడం గమనార్హం. ఈ మేరకు ఆదాయం సాధించడానికి కంపెనీకి చెందిన పలు మోడళ్లు కీలక పాత్ర పోషించాయి. ముఖ్యంగా, ల్యాండ్ రోవర్ డిఫెండర్ మోడల్ ఈ ఏడాది అసాధారణమైన మార్కెట్ స్పందనను అందుకుంది.

ఈ మోడల్ ఒక శక్తివంతమైన, విలాసవంతమైన ఆఫ్-రోడ్ SUVగా ప్రపంచవ్యాప్తంగా పేరు తెచ్చుకుంది. 2025 ఆర్థిక సంవత్సరంలో దీని అమ్మకాలు 115,404 యూనిట్లను అధిగమించి, కంపెనీకి కొత్త రికార్డు నెలకొల్పింది. భారత మార్కెట్‌లో డిఫెండర్‌కు చాలా కాలంగా మంచి డిమాండ్ ఉంది. రఫ్ అండ్ టఫ్ డ్రైవింగ్‌కు అనువుగా ఉండడం, ప్రీమియం లుక్స్ కలగలిపిన శక్తివంతమైన పెర్ఫార్మెన్స్, దీన్ని భారతీయ SUV లవర్స్‌కు ప్రత్యేకమైన ఎంపికగా మార్చాయి.

ఇక ఇటీవలి కాలంలో భారతదేశం, యునైటెడ్ కింగ్‌డమ్ (UK) మధ్య కుదిరిన స్వేచ్ఛా వాణిజ్య ఒప్పందం (FTA) మరో కీలక అంశంగా నిలుస్తోంది. ఈ ఒప్పందం ప్రకారం దిగుమతులపై ధర తగ్గే అవకాశం ఉండటం వల్ల, డిఫెండర్ వంటి వాహనాలు భారత మార్కెట్లో మరింత తక్కువ ధరకు కొనుగోలు చేయడానికి అందుబాటులోకి రావచ్చు. దాంతో జాగ్వార్ ల్యాండ్ రోవర్‌కు చెందిన ఇతర మోడళ్లు లోకల్ కంపెనీలకు పోటీగా నిలవబోతున్నాయి.

మొత్తంగా చూస్తే, ఆదాయంలో స్వల్ప తగ్గుదల చోటు చేసుకున్నా, జాగ్వార్ ల్యాండ్ రోవర్ సంస్థ తమ విజయాన్ని కొనసాగించగలిగింది. వినియోగదారుల అభిరుచులకు అనుగుణంగా ఉన్న మోడళ్లను ప్రవేశపెట్టడం, మార్కెట్ డిమాండ్‌ను గమనిస్తూ వ్యూహాలు రూపొందించడం ద్వారా రానున్న రోజుల్లో తన ఆదాయంలో మరింత పెరుగుదలను కంపెనీ చూసే అవకాశం ఉంది. కంపెనీ ఇటీవల డిఫెండర్ సిరీస్‌లో 2025 ఆక్టా వేరియంట్‌ను విడుదల చేసింది.

ఇది కేవలం ఒక కొత్త వేరియంట్ మాత్రమే కాదు, ఇప్పటివరకు కంపెనీ తయారు చేసిన అత్యంత శక్తివంతమైన డిఫెండర్ గాను ప్రత్యేక గుర్తింపు పొందింది. దాని ధర రూ. 2.59 కోట్లు (ఎక్స్-షోరూమ్)గా నిర్ణయించబడింది, దీని ద్వారా ఇది లగ్జరీ, హై-పర్ఫార్మెన్స్ SUV విభాగంలో అగ్రస్థానాన్ని లక్ష్యంగా పెట్టుకున్నట్లు స్పష్టమవుతోంది. ఇందులో అమర్చిన 4.4-లీటర్ ట్విన్-టర్బోచార్జ్డ్ V8 ఇంజిన్, మైల్డ్ హైబ్రిడ్ టెక్నాలజీ మద్దతుతో పనిచేస్తుంది.

ఇది అధికంగా 626 Hp పవర్‌, 800 Nm పీక్ టార్క్‌ను ఉత్పత్తి చేస్తుంది. పనితీరు పరంగా ఇది రేస్ కార్ల స్థాయిలోనే నిలుస్తుంది. కేవలం 3.8 సెకన్లలో 0 నుండి 100 కి.మీ వేగాన్ని చేరుకుంటూ, 250 కి.మీ గరిష్ట వేగంతో దూసుకెళ్లగలదు. ఇది సాధించడానికి 8-స్పీడ్ ఆటోమేటిక్ గేర్‌బాక్స్, శక్తివంతమైన ఛాసిస్ ట్యూనింగ్, అధునాతన ఇంజిన్ మేనేజ్‌మెంట్ వ్యవస్థల సమన్వయం కీలక పాత్ర పోషించాయి.

గత ఆర్థిక సంవత్సరంలోనే ఈ శక్తివంతమైన, ప్రీమియం SUVకు ప్రపంచవ్యాప్తంగా 1.15 లక్షల యూనిట్ల అమ్మకాలు నమోదయ్యాయి. సాధారణంగా రూ.2.59 కోట్ల ఎక్స్-షోరూమ్ ధరకు లభించే కారు, విలాసవంతమైన సౌకర్యాలు, అద్భుతమైన పనితీరు, రఫ్-అండ్-టఫ్ డిజైన్‌ కారణంగా SUV ప్రియులను విశేషంగా ఆకర్షిస్తోంది. ఇది కేవలం ఒక వాహనమే కాదు, ఒక స్టేటస్ సింబల్‌గా కూడా నిలుస్తోంది. కంపెనీ ఎలక్ట్రిక్ కార్లను కూడా విడుదల చేయబోతుంది.