టెస్లా హడావుడిలో ఈ అద్బుతమైన ఎలక్ట్రిక్ కారును మర్చిపోయాం.. కియా 7సీటర్ ఈవీ వేరియంట్ల వారీగా స్పెషాలిటీలివే

ఇండియాలోకి టెస్లా ఎంట్రీ ఇస్తుండడంతో అందరి దృష్టి దాని మీదే ఉంది. అదే సమయంలో కియా కంపెనీ కూడా ఇండియాలో కొత్తగా కేరెన్స్ క్లావిస్ ఈవీ అనే ఎలక్ట్రిక్ కారును రిలీజ్ చేసింది. రూ.17.99 లక్షల ఎక్స్-షోరూమ్ ధరతో విడుదలైన ఈ కొత్త కేరెన్స్ క్లావిస్ ఈవీ HTK+, HTX, HTX+ మూడు వేరియంట్లలో అందుబాటులో ఉంది. ఈ వేరియంట్లలో ఎలాంటి టెక్నికల్ ఫీచర్లు ఉన్నాయో ఇప్పుడు వివరంగా తెలుసుకుందాం.

కొత్త కియా కేరెన్స్ క్లావిస్ ఈవీ మూడు వేర్వేరు వేరియంట్లలో వినియోగదారులకు అందుబాటులో ఉంటుంది. అవి HTK+, HTX, HTX+. వీటి ధరలు, ఫీచర్లు వేరియంట్లను బట్టి మారుతుంటాయి. కియా ఇప్పటికే తన సెగ్మెంట్లో ఎలక్ట్రిక్ కార్లను విడుదల చేసి మార్కెట్లో తన స్థానాన్ని పదిలం చేసుకుంది. ఈ క్రమంలో కొత్త కారు కూడా భారీగా అమ్మకాలను సాధిస్తుందని విశ్లేషకులు భావిస్తున్నారు.

HTK+ అనేది బేస్ వేరియంట్. ఇది కియా కేరెన్స్ క్లావిస్ ఈవీ అత్యంత తక్కువ ధర కలిగిన వేరియంట్. దీనిని 42kWh బ్యాటరీ ఆప్షన్‌తో మాత్రమే కొనుగోలు చేయవచ్చు. ఈ వేరియంట్ ఎక్స్-షోరూమ్ ధర రూ.17.99 లక్షలు.

ఫీచర్ల విషయానికి వస్తే.. 16-అంగుళాల గ్లాసీ బ్లాక్ ఏరో అల్లాయ్ వీల్స్, ఐస్ క్యూబ్ LED M.R.F. హెడ్‌లైట్లు, యాక్టివ్ ఎయిర్ ఫ్లాప్, ఎలక్ట్రికల్‌గా అడ్జస్ట్ చేయగల అవుట్‌సైడ్ మిర్రర్‌లు, పూర్తిగా ఆటోమేటిక్ ఏసీ, 26.62-అంగుళాల డ్యూయల్ పనోరమిక్ సన్‌రూఫ్, లెవల్-2 ADAS వంటి అడ్వాన్సుడ్ సేఫ్టీ ఫీచర్లు ఇందులో ఉన్నాయి.

HTX అనేది మీడియం రేంజ్ వేరియంట్. ఈ వేరియంట్ రెండు బ్యాటరీ ఆప్షన్లలో అందుబాటులో ఉంది. 42kWh, 51.4kWh. 42kWh బ్యాటరీతో దీని ఎక్స్-షోరూమ్ ధర రూ.20.49 లక్షలు. 51.4kWh బ్యాటరీతో దీని ఎక్స్-షోరూమ్ ధర రూ.22.49 లక్షలు.

HTK+ వేరియంట్‌లో ఉన్న ఫీచర్లతో పాటు, ఇందులో కూడా 26.62-అంగుళాల డ్యూయల్ పనోరమిక్ సన్‌రూఫ్ ఉంటుంది. వైర్ లేకుండా మొబైల్ ఫోన్‌ను ఇన్ఫోటైన్‌మెంట్ స్క్రీన్‌కు కనెక్ట్ చేసే ఫీచర్, స్టీరింగ్ వీల్‌పై ఆడియో కంట్రోల్స్, 64 రంగులలో క్యాబిన్ లైటింగ్, బ్రౌన్ & నేవీ రంగులలో లెథరెట్టెడ్ సీట్లు, లెవల్-2 ADAS వంటి సౌకర్యాలు లభిస్తాయి.

HTX+ అనేది టాప్-ఎండ్ వేరియంట్. కియా కేరెన్స్ క్లావిస్ ఈవీ అత్యంత ఖరీదైన, పవర్‌ఫుల్ టాప్-ఎండ్ వేరియంట్ ఇది. ఈ వేరియంట్ 51.4kWh బ్యాటరీ ఆప్షన్‌తో మాత్రమే అందుబాటులో ఉంది. దీని ఎక్స్-షోరూమ్ ధర రూ.24.49 లక్షలు.

ఈ వేరియంట్‌లో పెద్ద సైజులో 17-అంగుళాల డ్యూయల్-టోన్ ఏరో అల్లాయ్ వీల్స్ వస్తాయి. ముందు భాగంలో ఛార్జింగ్ పోర్ట్ వద్ద వెలిగే లైటింగ్, మోషన్ సెన్సార్, రిమోట్ స్టార్ట్‎తో కూడిన స్మార్ట్ కీ, UV కిరణాలను అడ్డుకునే సోలార్ విండో గ్లాసులు, 8 స్పీకర్లతో కూడిన బోస్ ప్రీమియం సౌండ్ సిస్టమ్, కారు ఛార్జర్‌తో ఇతర ఎలక్ట్రానిక్ పరికరాలను ఆపరేట్ చేసే V2L సౌకర్యం వంటి ప్రీమియం ఫీచర్లు ఉంటాయి.

డ్రైవ్‌స్పార్క్ అభిప్రాయం: కియా సంస్థ భారతదేశంలో వివిధ రకాల ప్రజలకు అందుబాటులో ఉండే ధరలో విడుదల చేసిన మొదటి ఎలక్ట్రిక్ కారు కేరెన్స్ క్లావిస్ ఈవీ. నిజానికి, ఈ ఎలక్ట్రిక్ కారు రూ.17.99 లక్షల కంటే తక్కువ ధరకే మార్కెట్‌లోకి వస్తుందని చాలా మంది ఆశించారు. అయినప్పటికీ, రూ.17.99 లక్షలు కూడా పెద్దగా అధిక ధర కాదని చెప్పవచ్చు.

ముఖ్యంగా ఇది 7-సీటర్ ఎలక్ట్రిక్ ఎంపీవీ కాబట్టి. మీరు కొనుగోలు చేసే మూడు వేరియంట్లలో దేనిని ఎంచుకుంటారు అనేదానిపై దాని టెక్నికల్ ఫీచర్లు, ఫెసిలిటీలు ఆధారపడి ఉంటాయి. మొత్తంగా, కియా భారతీయ ఎలక్ట్రిక్ వాహన మార్కెట్లో తన ఉనికిని మరింత బలంగా చాటుకోవడానికి ఈ మోడల్‌ను రిలీజ్ చేసింది.