బడ్జెట్ ధరలో బెంజ్ లాంటి ఫీచర్లు..ఈ కారును ఇంటికి తెచ్చుకుంటే పక్కింటి వాళ్లు కుళ్లుకోవడం ఖాయం!

కొరియన్ కార్ల తయారీ దిగ్గజం కియా మోటార్స్ (Kia Motors) నుంచి వచ్చిన కియా సోనెట్ (Kia Sonet) ప్రస్తుతం భారత ఆటోమొబైల్ మార్కెట్‌లో సంచలనం సృష్టిస్తోంది. తన అన్న సెల్టోస్ అందించిన భారీ విజయాన్ని అందిపుచ్చుకుంటూ, మేడ్ ఇన్ ఇండియా ట్యాగ్‌తో రూపొందిన ఈ కాంపాక్ట్ ఎస్‌యూవీ అమ్మకాల్లో సరికొత్త రికార్డులను నెలకొల్పుతోంది.

ముఖ్యంగా నవంబర్ 2025లో ఈ కారు అమ్మకాలు ఊహించని విధంగా ఏకంగా 30.21 శాతం వృద్ధిని నమోదు చేయడం విశేషం. కేవలం రూ. 7.30 లక్షల (ఎక్స్-షోరూమ్) ప్రారంభ ధరతో లభిస్తుండటమే ఇంతటి ఆదరణకు ప్రధాన కారణమని మార్కెట్ నిపుణులు చెబుతున్నారు.

గత ఏడాదితో పోలిస్తే సోనెట్ అమ్మకాలు భారీగా పెరిగాయి. నవంబర్ 2024లో 9,255 యూనిట్లు అమ్ముడవగా, ఈ ఏడాది నవంబర్‌లో ఆ సంఖ్య 12,051 యూనిట్లకు చేరింది. అంటే దాదాపు 2,796 కార్లు అదనంగా రోడ్లపైకి వచ్చాయి. మారుతి సుజుకి బ్రెజా, టాటా నెక్సాన్ వంటి దిగ్గజ మోడళ్ల నుంచి గట్టి పోటీ ఉన్నప్పటికీ, సోనెట్ తన ప్రత్యేకతను చాటుకుంటోంది.

కియా ఇండియా మొత్తం అమ్మకాల్లో సుమారు 47 శాతం వాటా ఈ ఒక్క కారుదే కావడం దీనికున్న డిమాండ్‌కు నిదర్శనం. అక్టోబర్ పండుగ సీజన్ ముగిసినా, నవంబర్‌లో కూడా అదే జోరును కొనసాగించడం గమనార్హం. ఇటీవల కేంద్ర ప్రభుత్వం ప్రకటించిన GST 2.0 సంస్కరణల వల్ల కియా సోనెట్ ధరలు భారీగా తగ్గాయి. 4 మీటర్ల కంటే తక్కువ పొడవు ఉండే వాహనాలపై పన్ను భారం తగ్గడంతో, సోనెట్ వేరియంట్లపై రూ. 69,700 నుంచి రూ. 1.64 లక్షల వరకు ధరలు తగ్గాయి.

ఈ పన్ను ప్రయోజనం వల్ల మధ్యతరగతి కుటుంబాలకు కూడా ఈ ప్రీమియం ఎస్‌యూవీ మరింత చేరువయ్యింది. ముఖ్యంగా పెట్రోల్ వేరియంట్లపై 9 శాతం, డీజిల్ వేరియంట్లపై 10 శాతానికి పైగా ధరలు తగ్గడంతో షోరూమ్‌ల వద్ద కస్టమర్ల రద్దీ పెరిగింది. ప్రస్తుతం దీని ఎక్స్-షోరూమ్ ధర రూ. 7.30 లక్షల నుంచి రూ. 14.06 లక్షల మధ్య అందుబాటులో ఉంది.

కియా సోనెట్ ఇంటీరియర్, ఎక్స్‌టీరియర్ పరంగా లగ్జరీ కార్లకు ఏమాత్రం తీసిపోదు. దీని డిజైన్ చాలా వరకు కియా సెల్టోస్‌ను పోలి ఉండి, ప్రీమియం లుక్‌ను ఇస్తుంది. కొత్త ఎల్ఈడీ హెడ్ లైట్లు, స్టార్ మ్యాప్ డీఆర్ఎల్స్ (DRLs), వెనుక వైపు కనెక్టెడ్ టెయిల్ ల్యాంప్స్ దీనికి ఒక అగ్రెసివ్ లుక్ ఇస్తాయి. 16 ఇంచుల క్రిస్టల్ కట్ అల్లాయ్ వీల్స్ కారుకు మరింత అందాన్ని జోడిస్తాయి.

కారు లోపల 10.25 అంగుళాల భారీ టచ్‌స్క్రీన్ ఇన్ఫోటైన్‌మెంట్ సిస్టమ్, ఫుల్ డిజిటల్ ఇన్‌స్ట్రుమెంట్ క్లస్టర్, సన్‌రూఫ్ వంటి ఫీచర్లు ఉన్నాయి. అంతేకాకుండా, వేసవి కాలం కోసం వెంటిలేటెడ్ సీట్లు, వైరస్ ప్రొటెక్షన్ ఉన్న ఎయిర్ ప్యూరిఫైయర్, 7-స్పీకర్ల బోస్ (BOSE) సౌండ్ సిస్టమ్ ప్రయాణాన్ని మరింత ఆహ్లాదపరుస్తాయి.

కస్టమర్ల ప్రాణాలకు కియా అత్యంత ప్రాధాన్యతనిస్తోంది. ఈ కారులో 6 ఎయిర్‌బ్యాగ్‌లు అన్ని వేరియంట్లలో స్టాండర్డ్‌గా వస్తాయి. వీటితో పాటు 360-డిగ్రీ కెమెరా, ఫ్రంట్, రియర్ పార్కింగ్ సెన్సార్లు, ఎలక్ట్రానిక్ స్టెబిలిటీ కంట్రోల్ (ESC) వంటి 25కు పైగా సేఫ్టీ ఫీచర్లు ఉన్నాయి. అత్యంత ముఖ్యంగా లెవల్ 1 ADAS (Advanced Driver Assistance System) టెక్నాలజీ ద్వారా ఫ్రంట్ కొలిజన్ వార్నింగ్, లేన్ కీప్ అసిస్ట్ వంటి ఫీచర్లు ప్రమాదాలను ముందే పసిగట్టి డ్రైవర్‌ను అప్రమత్తం చేస్తాయి.

కియా సోనెట్ కస్టమర్ల అవసరాలకు అనుగుణంగా మూడు రకాల ఇంజన్లలో లభిస్తుంది. 1.2 లీటర్ పెట్రోల్ సిటీలో ప్రయాణించే వారికి ఇది సరైన ఎంపిక. ఇది సుమారు 18.4 కి.మీ మైలేజీని ఇస్తుంది. 1.0 లీటర్ టర్బో పెట్రోల్ వేగాన్ని, పవర్‌ను ఇష్టపడే వారి కోసం రూపొందించబడింది. ఇది 120 bhp శక్తిని అందిస్తుంది. 1.5 లీటర్ డీజిల్ లాంగ్ జర్నీలు చేసే వారికి ఇది బెస్ట్ ఛాయిస్. ఇది లీటరుకు 24 కిలోమీటర్ల వరకు అద్భుతమైన మైలేజీని ఇస్తుంది.