పెద్ద ఫ్యామిలీతో హ్యాపీ జర్నీ.. ఎంత దూరమైనా అలుపే రాదు.. ఏకంగా మైలేజ్ 30 కి.మీ. ఇచ్చే కారు

భారత మార్కెట్లో కుటుంబంతో ప్రయాణించే పెద్ద కార్ల (7-సీటర్ ఎస్‌యూవీలు) అమ్మకాలు గణనీయంగా పెరుగుతున్నాయి. ఈ ట్రెండ్‌ను దృష్టిలో ఉంచుకుని, కియా మోటార్స్ సంస్థ అంతర్జాతీయ మార్కెట్లో విక్రయిస్తున్న తమ D-సెగ్మెంట్ ఎస్‌యూవీ మోడల్‌ను భారతదేశానికి తీసుకురావాలని గట్టిగా యోచిస్తోంది.

కియా ఇప్పటికే EV6, EV9 వంటి మోడళ్లను విడుదల చేసి మార్కెట్లో తన స్థానాన్ని బలోపేతం చేసుకుంటోంది. ఈ కొత్త కారు పేరు కియా సొరెంటో (Kia Sorento)గా ఉండవచ్చని అంచనా. ఈ ప్రీమియం 3-వరుసల సీటర్ ఎస్‌యూవీ భారత మార్కెట్లోకి వస్తే, సెగ్మెంట్‌లో పోటీ మరింత పెరుగుతుంది.

కియా సొరెంటో అనేది ప్రస్తుతం అంతర్జాతీయ మార్కెట్లో నాలుగో తరం (4th Generation) మోడల్‌గా విక్రయించబడుతోంది. ఈ మోడల్ 2020 ఫిబ్రవరిలో విడుదల కాగా, దాని ఫేస్‌లిఫ్ట్ అప్‌డేట్ 2023 జూలైలో వచ్చింది. ఈ కారు 2026 చివరిలో లేదా దీపావళి సందర్భంగా భారతదేశంలో విడుదలయ్యే అవకాశం ఉంది. సొరెంటో డిజైన్ చాలా పవర్ఫుల్‎గా ఉంది.

ఇందులో పెద్ద బానెట్, నిలువుగా ఉండే హెడ్‌లైట్లు, T ఆకారంలో ఉండే డీఆర్‌ఎల్స్ (DRLs), షడ్భుజి డిజైన్‌తో కూడిన దీర్ఘచతురస్రాకార గ్రిల్ వంటి ఆకర్షణీయమైన ఫీచర్లు ఉన్నాయి. అంతర్జాతీయ మోడల్‌లో 20 అంగుళాల వీల్స్ ఉన్నా, భారతీయ మార్కెట్ కోసం 19 అంగుళాల వీల్స్ అమర్చవచ్చు.

సొరెంటో కారు లోపలి భాగంలో అనేక అడ్వాన్స్‌డ్ ఫీచర్లు ఉన్నాయి. దీని క్యాబిన్‌లో పెద్ద డాష్‌బోర్డ్ ఉంది. అది ముందు డోర్ ప్యానెల్‌తో కలిసిపోయినట్లు ఉంటుంది. నాలుగు స్పోక్స్‌తో కూడిన స్టీరింగ్ వీల్, నీట్‌గా అమర్చబడిన సెంట్రల్ కన్సోల్, ఎలక్ట్రానిక్ పార్కింగ్ బ్రేక్ వంటివి ఉన్నాయి. అత్యంత ముఖ్యమైన ఫీచర్లలో ఒకటి కర్వ్‌డ్ ఎల్‌ఈడీ ప్యానెల్.

ఇందులో 12.3 అంగుళాల డిజిటల్ ఇన్‌స్ట్రుమెంట్ క్లస్టర్, 12.3 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ ఉన్నాయి. అలాగే కనెక్టెడ్ కార్ నావిగేషన్ కాక్‌పిట్ ఆపరేటింగ్ సిస్టమ్ వంటి అడ్వాన్సుడ్ ఫీచర్లు కూడా ఇందులో లభిస్తాయి. ఈ కారు 6, 7 సీట్ల వేరియంట్లలో అందుబాటులో ఉంటుంది.

కియా సొరెంటో హైబ్రిడ్ ఆప్షన్‌లో వస్తుంది. ఇందులో 1.6 లీటర్ టర్బోచార్జ్డ్ పెట్రోల్ ఇంజిన్ ఉంటుంది, ఇది 177 హార్స్‌పవర్ (hp), 265 ఎన్ఎమ్ (Nm) టార్క్ ఉత్పత్తి చేస్తుంది. దీనికి అదనంగా, 64 hp, 250 Nm టార్క్‌ను ఉత్పత్తి చేసే పర్మనెంట్ మాగ్నెట్ ఎలక్ట్రిక్ మోటార్‌ను కూడా అమర్చారు. ఈ రెండూ కలిసి మొత్తం 236 hp పవర్, 380 Nm టార్క్‌ను అందిస్తాయి. దీనిలో 1.49 kWh బ్యాటరీ ప్యాక్ ఉంటుంది.

ఈ హైబ్రిడ్ వేరియంట్ ఆటోమేటిక్ గేర్‌బాక్స్‌తో మాత్రమే లభిస్తుంది. ఆల్-వీల్ డ్రైవ్ (AWD) ఆప్షన్ కూడా ఉంటుంది. ఈ కారు 0 నుంచి 100 కి.మీ.ల వేగాన్ని 8.8 సెకన్లలో (ఫ్రంట్ వీల్ డ్రైవ్) అందుకుంటుంది. ఈ కారు స్ట్రాంగ్ హైబ్రిడ్ వేరియంట్‌లో భారత్‌కు వస్తే ఇది ఏకంగా 30 కిలోమీటర్ల వరకు మైలేజ్ ఇచ్చినా ఆశ్చర్యపడాల్సిన అవసరం లేదని నిపుణులు అంచనా వేస్తున్నారు.