మహీంద్రా అదిరిపోయే ప్లాన్.. ఇప్పటికే సూపర్ హిట్.. కొత్త ఈవీ వేరియంట్లతో మార్కెట్‌ను షేక్ చేయబోతోంది

భారతదేశంలో స్పోర్ట్స్ యుటిలిటీ వెహికల్ మార్కెట్‌లో తమదైన ముద్ర వేసిన మహీంద్రా అండ్ మహీంద్రా, ఇప్పుడు ఎలక్ట్రిక్ వాహనాల విభాగంలో కూడా తమ ఆధిపత్యాన్ని నిలబెట్టుకోవాలని పట్టుదలగా ఉంది. దీనిలో భాగంగా గత ఏడాది విడుదల చేసిన తమ రెండు వినూత్న ఎలక్ట్రిక్ కార్లు BE 6, XEV 9eపోర్ట్‌ఫోలియోను మరింత విస్తరించడానికి సిద్ధమవుతోంది.

ఈ ఫ్యూచరిస్టిక్ డిజైన్‌తో కూడిన కార్లు భారత మార్కెట్లో అద్భుతమైన విజయాన్ని సాధించి, మహీంద్రాను మూడవ అతిపెద్ద ఎలక్ట్రిక్ కార్ల విక్రేతగా నిలిపాయి. కస్టమర్ల నుండి వస్తున్న అద్భుతమైన స్పందన, మార్కెట్ అవసరాలను దృష్టిలో ఉంచుకొని, మహీంద్రా ఈ కార్లలో మరిన్ని వేరియంట్లను, ఎక్కువ బ్యాటరీ ఆప్షన్లను అందుబాటులోకి తేనుంది.

ప్రస్తుతం మహీంద్రా BE 6, XEV 9e కార్లు ప్యాక్ వన్, ప్యాక్ టూ, ప్యాక్ త్రీ అనే మూడు ప్రధాన వేరియంట్లలో లభిస్తున్నాయి. ఈ వేరియంట్లలో ఎంట్రీ-లెవల్ ప్యాక్ వన్ మినహా మిగిలిన ప్యాక్ టూ, ప్యాక్ త్రీ లలో 59 kWh, 79 kWh రెండు బ్యాటరీ ఆప్షన్లు అందుబాటులో ఉన్నాయి.

తాజాగా లీకైన డాక్యుమెంట్ల ప్రకారం, మహీంద్రా కస్టమర్ల ప్రాధాన్యతలను దృష్టిలో ఉంచుకొని మరిన్ని మార్పులు చేస్తోంది. ఇప్పుడు టాప్-ఎండ్ మోడల్స్ అయిన ప్యాక్ త్రీ, ప్యాక్ త్రీ సెలక్ట్ రెండూ 59 kWh, 79 kWhబ్యాటరీ ఆప్షన్లతో వస్తాయి. గతంలో ప్యాక్ త్రీ సెలక్ట్ కేవలం 59 kWhబ్యాటరీతో మాత్రమే అందుబాటులో ఉండేది. అదేవిధంగా, ఫీచర్లతో నిండిన ప్యాక్ త్రీ వేరియంట్ ఇప్పుడు చిన్న 59 kWhబ్యాటరీతో కూడా లభిస్తుంది.

ముఖ్యంగా, ప్యాక్ టు వేరియంట్‌లో కూడా కస్టమర్ల డిమాండ్‌ను బట్టి 79 kWh బ్యాటరీ ఆప్షన్‌ను ప్రవేశపెట్టారు. చాలా మంది వినియోగదారులు ఎక్కువ రేంజ్ కోరుకుంటున్నారు కానీ, అన్ని టాప్-ఎండ్ ఫీచర్లు వారికి అవసరం ఉండదు. అలాంటి వారి కోసం, తక్కువ ఫీచర్లతో ఎక్కువ రేంజ్ అందించే ప్యాక్ టు (79 kWh) ఒక అద్భుతమైన ఎంపిక.

ఈ వ్యూహంతో, మహీంద్రా ప్రతి కస్టమర్ అవసరాన్ని తీర్చాలని లక్ష్యంగా పెట్టుకుంది. ఇప్పుడు, BE 6, XEV 9e కార్లు మొత్తం ఏడు విభిన్న వేరియంట్లలో అందుబాటులో ఉంటాయి. మహీంద్రా అందించిన వివరాల ప్రకారం, ఈ ఎలక్ట్రిక్ కార్ల పర్ఫామెన్స్ కూడా చాలా ఆకట్టుకుంటుంది.

59 kWh బ్యాటరీ వేరియంట్ 228 bhp పవర్‌ను ఉత్పత్తి చేస్తుంది. 79 kWh బ్యాటరీ వేరియంట్ మరింత శక్తివంతంగా 281 bhp పవర్‌ను అందిస్తుంది. రెండు బ్యాటరీ ఆప్షన్లు 380 Nm టార్క్‌ను కలిగి ఉంటాయి. రెండు కార్లు రియర్-వీల్-డ్రైవ్ (RWD) సిస్టమ్‌తో వస్తాయి. 59 kWh బ్యాటరీతో కూడిన కార్లు సింగిల్ ఛార్జ్‌పై 542కిలోమీటర్ల రేంజ్‌ను అందిస్తాయి.

79 kWh బ్యాటరీ ఉన్న కార్లు ఏకంగా 656 కిలోమీటర్ల దూరం ప్రయాణించగలవు. ఇది లాంగ్ డ్రైవ్‌లకు కూడా అనుకూలంగా ఉంటుంది. మహీంద్రా BE 6E బేస్ మోడల్ ధర రూ.18.90 లక్షల నుండి ప్రారంభమై, టాప్ మోడల్ ధర రూ.27.65 లక్షల వరకు ఉంటుంది. ఇక మహీంద్రా XEV 9e బేస్ మోడల్ ధర రూ.21.90లక్షల నుండి ప్రారంభమై, టాప్ మోడల్ ధర రూ.31.25 లక్షల వరకు వెళుతుంది.

ఈ కార్ల ఫ్యూచరిస్టిక్ డిజైన్, అద్భుతమైన లుక్, పనితీరు కారణంగా భారత మార్కెట్లో వీటికి మంచి ఆదరణ లభిస్తోంది. టాటా మోటార్స్, ఎంజీ మోటార్స్ వంటి పోటీదారులకు మహీంద్రా ఈ కొత్త ఆప్షన్లతో గట్టి పోటీని ఇవ్వనుంది.