ఈ ఎలక్ట్రిక్ ఎస్‌యూవీ కోసం దేశం మొత్తం ఎదురు చూస్తోంది.. ఇది కారు కాదు... సూపర్ స్టార్!

భారతదేశంలో ఎలక్ట్రిక్ ఎస్యూవీ (Electric SUV) మార్కెట్‌ను శాసిస్తున్న మహీంద్రా సంస్థ నుంచి వస్తున్న అత్యంత ప్రజాదరణ పొందిన కారు మహీంద్రా BE6. ఈ కారుకు మార్కెట్లో అద్భుతమైన డిమాండ్ ఉంది. ఇప్పటికే ఈ కారు హై-ఎండ్ వేరియంట్ల డెలివరీలు జరుగుతుండగా, ఇప్పుడు చాలా మంది ప్రజలు ఎదురుచూస్తున్న బేస్ వేరియంట్ (Base Variant) డెలివరీ త్వరలో ప్రారంభం కానుంది. ఈ BE6 (ప్యాక్ 1) వేరియంట్ తక్కువ ధరలో ఎక్కువ ఫీచర్లను అందిస్తుండటంతో దీని అమ్మకాలు మరింత పెరిగే అవకాశం ఉంది. డీలర్‌షిప్‌లకు చేరుకున్న ఈ కారు వివరాలు, ధర, ఫీచర్లపై ఓ లుక్కేద్దాం.

భారతదేశంలో ఎలక్ట్రిక్ -వీలర్ విభాగంలో మహీంద్రా (Mahindra) తన పట్టును మరింత పెంచుకుంటోంది. ప్రస్తుతం సంస్థ BE6, XEV 9e వంటి మోడళ్లతో మార్కెట్లో మంచి విజయాన్ని సాధిస్తోంది. ఈ క్రమంలో అత్యధిక మంది వినియోగదారులు ఆసక్తిగా ఎదురుచూస్తున్న BE6 (ప్యాక్ 1) బేస్ వేరియంట్ డెలివరీ త్వరలో ప్రారంభం కానుంది.

మహీంద్రా BE6 కారును మొదట్లో ప్యాక్ 1, ప్యాక్ 1 అబౌవ్, ప్యాక్ 2, ప్యాక్ 3 సెలెక్ట్, ప్యాక్ 3 వంటి వేరియంట్‌లలో విడుదల చేసింది. ఈ కార్ల ధరలు రూ. 18.90 లక్షల నుండి రూ. 26.90 లక్షల మధ్య ఉన్నాయి. ప్రారంభంలో హై-ఎండ్ వేరియంట్ల డెలివరీలు మాత్రమే జరిగేవి. ఆ తర్వాత కొన్ని నెలల క్రితం ప్యాక్ 2 వేరియంట్ డెలివరీలు మొదలయ్యాయి.

తాజాగా అత్యంత తక్కువ ధర కలిగిన ప్యాక్ 1 వేరియంట్ (రూ. 18.90 లక్షలు) డీలర్‌షిప్‌లకు చేరుకోవడం మొదలైంది. దీంతో దీని డెలివరీలు అతి త్వరలో ప్రారంభమవుతాయని భావిస్తున్నారు. బేస్ వేరియంట్ అయినప్పటికీ మహీంద్రా BE6 (ప్యాక్ 1) టాప్ వేరియంట్‌ల మాదిరిగానే కొన్ని ప్రీమియం ఫీచర్లను, ఆకర్షణీయమైన డిజైన్‌ను కలిగి ఉంది.

కారు ముందు భాగంలో డ్యూయల్ పాడ్ LED హెడ్‌లైట్ ఉంది. హుడ్ పైన వెలిగే BE లోగో ఉంది. C- ఆకారపు LED DRL లు, ఫాగ్ లైట్లు, సిల్వర్ స్కిడ్ ప్లేట్ వంటి ఫీచర్లు ఉన్నాయి. కారు కింద భాగంలో గ్లాస్ బ్లాక్ బాడీ క్లాడింగ్ ఇచ్చారు. ఈ వేరియంట్‌లో 18 అంగుళాల స్టీల్ వీల్స్ ఏరోడైనమిక్ బ్లాక్ కలర్‌లో అందించారు. టాప్ వేరియంట్‌లలో 19 అంగుళాల అల్లాయ్ వీల్స్ ఉంటాయి.

వెనుక భాగంలో లైట్ బార్‌తో కూడిన LED టెయిల్ లైట్స్, మహీంద్రా ఇన్ఫినిటీ లోగో, BE6 బ్యాడ్జ్, రూఫ్ స్పాయిలర్, కనెక్టెడ్ టెయిల్ లైట్లు వంటి ఫీచర్లు ఉన్నాయి. బేస్ వేరియంట్ అయినప్పటికీ లోపలి క్యాబిన్ బ్లాక్, గ్రే డ్యూయల్-టోన్ థీమ్‌తో కూడిన లగ్జరీ మెటీరియల్‌తో రూపొందించారు.

మహీంద్రా BE6 కారు భారత ఎలక్ట్రిక్ ఎస్‌యూవీ విభాగంలో అత్యంత సక్సెస్ ఫుల్ మోడల్‌లలో ఒకటిగా నిలుస్తోంది. ఈ కారు మార్కెట్లో ముఖ్యంగా టాటా కర్వ్ ఈవీ (Tata Curvv EV), హ్యుందాయ్ క్రెటా ఈవీ (Hyundai Creta EV), ఎంజీ జడ్‌ఎస్ ఈవీ (MG ZS EV), విన్‌ఫాస్ట్ వీఎఫ్6 (VinFast VF6) వంటి మోడళ్లకు గట్టి పోటీ ఇస్తుంది.

ప్యాక్ 1 వంటి తక్కువ ధర వేరియంట్ డెలివరీలు ప్రారంభం కావడంతో, మహీంద్రా BE6 అమ్మకాలు మరింత పెరిగి, మార్కెట్లో దాని ఆధిపత్యం కొనసాగే అవకాశం ఉంది.