ఈ కారును కేవలం నలుగురు మాత్రమే కొన్నారు! డిస్కౌంట్లు ఇచ్చినా.. రెండు ఫ్యామిలీలకు సెట్ అయ్యే కారును కొనలేదు

దేశీయ ప్రముఖ వాహనాల తయారీ కంపెనీ మహీంద్రా (mahindra) సంస్థ నుండి వచ్చిన మరాజ్జో (marazzo) అనేది ఒక పూర్తి కుటుంబ కారుగా పరిచయమైనా, ప్రస్తుతం భారత మార్కెట్లో అది కఠిన పరిస్థితులను ఎదుర్కొంటుంది. వాస్తవానికి, దేశంలో కుటుంబ కార్లకు డిమాండ్ రోజు రోజుకీ పెరుగుతున్నది. విశాలమైన స్థలం, కంఫర్ట్ సీటింగ్ అరేంజ్‌మెంట్, ప్రయాణికులకు సౌకర్యాలు అందించే అంశాలు ప్రజలను ఆకట్టుకుంటున్నాయి. కానీ ఇదే సమయంలో, మరాజ్జో విక్రయాలు మాత్రం దారుణంగా పడిపోయాయి. ఈ ఏడాది మొదటి నెలలో మరాజ్జో అమ్మకాలు ఎంతగానో తగ్గిపోయాయి. జనవరి 2025లో ఒక్క యూనిట్ కూడా అమ్ముడుకాలేదు. అంటే ఆ నెలలో ఒక్కరు కూడా ఈ కారును కొనుగోలు చేయలేదు. ఫిబ్రవరిలో కేవలం 17 యూనిట్లు మాత్రమే అమ్ముడయ్యాయి.

తరువాతి నెల మార్చిలో ఈ సంఖ్య 10కి పడిపోయింది. ఏప్రిల్‌లో పరిస్థితి ఇంకా దారుణంగా మారింది కేవలం 6 యూనిట్లే అమ్ముడయ్యాయి. మే నెల అమ్మకాల గణాంకాల ప్రకారం, మహీంద్రా మరాజ్జో కారును కేవలం నలుగురు వినియోగదారులు మాత్రమే కొనుగోలు చేశారు. ఈ సంఖ్య విని ఆశ్చర్యపోవచ్చు, కానీ నిజంగా ఇది వరుసగా వస్తున్న తక్కువ అమ్మకాల పరంపరలో భాగం మాత్రమే. గత ఐదు నెలలగా మొత్తం అమ్మకాలు తగ్గిపోయాయి.

ఈ ఐదు నెలలు కేవలం 37 యూనిట్లు మాత్రమే అమ్ముడయ్యాయి, నెలకు సగటున 7.4 కార్లు మాత్రమే అమ్ముడవుతున్నాయి. కుటుంబ వాహనాల విభాగంలో మంచి గుర్తింపు తెచ్చుకున్న కారుకి ఇటువంటి తక్కువ గణాంకాలు రావడం ఖచ్చితంగా పరిశీలించాల్సిన విషయం. ఇది వాహన వినియోగదారుల అభిరుచులలో మార్పు సూచిస్తున్నదా? లేక కొత్త పోటీదారుల వల్ల మరాజ్జో స్థానం తగ్గిందా? లేక కొత్త ఫీచర్లు, టెక్నాలజీ లేకపోవడమా? అన్నివిధాలా పరిశీలించాల్సిన అవసరం ఉంది.

మహీంద్రా మరాజ్జో బలమైన స్పెసిఫికేషన్‌ను కలిగి ఉంది. ఇది 1.5 లీటర్ డీజిల్ ఇంజిన్‌తో గరిష్ఠంగా 121 bhp పవర్, 300 Nm టార్క్‌ను ఉత్పత్తి చేస్తుంది. ఈ ఇంజిన్‌కు జతగా 6-స్పీడ్ మాన్యువల్ గేర్‌బాక్స్‌ను ఏర్పాటు చేశారు, ఇది దాని డ్రైవింగ్ అనుభూతిని మరింత మెరుగుపరచడంలో సహాయపడుతుంది. ఇలాంటి టెక్నికల్ ఫీచర్లు ఉన్నప్పటికీ, మార్కెట్లో SUV సెగ్మెంట్‌కి మారుతున్న కారణంగా దీని అమ్మకాలు ప్రభావితం అయినట్లు స్పష్టంగా కనిపిస్తోంది.

దీని ప్రారంభ ధర వచ్చేసి దాదాపు రూ.14.59 లక్షల(ఎక్స్ షోరూమ్) నుంచి ఉంటుంది. అమ్మకాల పరంగా ఇప్పటివరకు ఆశించిన విజయాన్ని సాధించలేకపోయినా, ఇందులో ఉన్న ఫీచర్లను చూస్తే ఇది ఖచ్చితంగా ఒక ప్రీమియం అనుభూతిని కలిగిస్తుంది. ఈ కారులో భద్రత పరంగా ఎయిర్‌బ్యాగులు, EBDతో కూడిన ABS, వెనుక పార్కింగ్ సెన్సార్లు వంటి అవసరమైన భద్రతా ఫీచర్లు లభ్యమవుతాయి. ఇవి డ్రైవింగ్ సమయంలో భద్రతను మెరుగుపరచడంలో కీలక పాత్ర పోషిస్తాయి.

అంతేకాకుండా, మరాజ్జోలో 7-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ ఇవ్వబడింది, ఇది ఆండ్రాయిడ్ ఆటో, యాపిల్ కార్‌ప్లేకు సపోర్ట్ చేస్తుంది. అంటే, స్మార్ట్‌ఫోన్ కనెక్టివిటీ మరింత సులభం. ఇంకా, కీలెస్ ఎంట్రీ, ఆటోమేటిక్ క్లైమేట్ కంట్రోల్ వంటి ఆధునిక సౌకర్యాలూ ఇందులో అందుబాటులో ఉన్నాయి. కారులోని 17 అంగుళాల అల్లాయ్ వీల్స్ దాని లుక్‌కి స్పోర్టీ యాటిట్యూడ్‌ను ఇస్తాయి.

అయితే, ఈ కారుకు ఉన్న అన్ని సౌకర్యాలు ఉన్నప్పటికీ, మార్కెట్లో అది పెద్దగా ఆకట్టుకోలేకపోయింది. ఈ పరిస్థితిని మార్చేందుకు మహీంద్రా కంపెనీ ఈ కారుపై నెలవారీగా వేర్వేరు డిస్కౌంట్‌లను ప్రకటిస్తోంది. అయినప్పటికీ, అమ్మకాల్లో గణనీయమైన వృద్ధి కనిపించలేదు. ప్రస్తుత పరిస్థితిలో ఈ కారు అమ్మకాలు సింగిల్ డిజిట్‌లోనే కొనసాగుతున్నాయి.