టాటా సియెర్రా రాకముందే సరికొత్త డిజైన్‌తో మహీంద్రా XUV 7XO ఎంట్రీ.. రూ.21000కట్టి బుక్ చేసుకోవచ్చు

భారతీయ ఎస్‌యూవీ మార్కెట్‌లో ఆధిపత్యం కోసం టాటా మోటార్స్, మహీంద్రా అండ్ మహీంద్రా మధ్య పోటీ తీవ్రంగా ఉంది. ఈ మధ్యకాలంలో టాటా మోటార్స్ తన ఐకానిక్ సియెర్రా (Tata Sierra) ఎస్‌యూవీకి పునర్జన్మ ఇవ్వనున్నట్లు ప్రకటించింది. ఈ నేపథ్యంలో టాటాకు గట్టి పోటీ ఇవ్వాలని నిర్ణయించుకున్న మహీంద్రా, తమ అత్యంత ప్రజాదరణ పొందిన XUV700 ఎస్‌యూవీ ఫేస్‌లిఫ్ట్ వెర్షన్‌ను కొత్త పేరుతో విడుదల చేయబోతున్నట్లు ధృవీకరించింది. XUV300 ని XUV 3XO గా మార్చినట్లుగానే, XUV700 ఫేస్‌లిఫ్ట్‌ను ఇకపై XUV 7XO అనే పేరుతో పిలవనున్నారు.

మహీంద్రా అండ్ మహీంద్రా ఇటీవల తమ XUV700 ఫేస్‌లిఫ్ట్కు కొత్త పేరు పెడుతున్నట్లు స్పష్టం చేసింది. XUV300 ఫేస్‌లిఫ్ట్ను XUV 3XO పేరుతో విడుదల చేసిన తరహాలోనే, XUV700 ఫేస్‌లిఫ్ట్ ఇప్పుడు XUV 7XO పేరుతో మార్కెట్లోకి రానుంది. ఈ కొత్త లుక్, పేరుతో ఎస్‌యూవీని 2026 జనవరి 5వ తేదీన అధికారికంగా విడుదల చేయనున్నారు. దీనికి ముందే వినియోగదారుల కోసం ప్రీ-బుకింగ్‌లను ప్రారంభించాలని మహీంద్రా నిర్ణయించింది.

మహీంద్రా నుంచి రాబోతున్న ఈ కొత్త XUV 7XO మోడల్ 2026 జనవరి 5న మార్కెట్‌లో అధికారికంగా లాంచ్ కానుంది. అయితే లాంచ్‌కు ముందుగానే కస్టమర్లను ఆకర్షించేందుకు, కంపెనీ ఈ వాహనం ప్రీ-బుకింగ్స్‌ను 2025 డిసెంబర్ 15వ తేదీ, మధ్యాహ్నం 12 గంటల నుంచి ప్రారంభించనుంది. కస్టమర్లు కేవలం రూ.21,000 టోకెన్ అమౌంట్‌తో XUV 7XO ను బుక్ చేసుకోవచ్చు. అయితే, ఈ తొలి దశ బుకింగ్‌లో కస్టమర్లు తమకు నచ్చిన వేరియంట్, ట్రాన్స్‌మిషన్ లేదా ఫ్యూయల్ ఆప్షన్‌ను ఎంచుకోవడానికి వీలుండదు.

డిసెంబర్ 15న ప్రారంభమయ్యే ఈ ప్రీ-బుకింగ్ ప్రక్రియ, కస్టమర్‌లు బుకింగ్ క్యూలో తొందరగా స్థానం సంపాదించడానికి మాత్రమే ఉపయోగపడుతుంది. వెహికల్ పూర్తి కాన్ఫిగరేషన్, ఫైనల్ బుకింగ్ ప్రక్రియ జనవరి 5న అధికారిక లాంచ్‌కు దగ్గరగా ప్రారంభమవుతుంది. ఆ సమయంలో కొనుగోలుదారులు తమకు కావాల్సిన వేరియంట్‌ను, స్పెసిఫికేషన్లను ఖరారు చేసుకోవచ్చు. ఇటీవల మహీంద్రా XUV 7XO కి సంబంధించిన కొత్త టీజర్ చిత్రాలను కూడా విడుదల చేసింది.

కొత్త XUV 7XO కేవలం ఫేస్‌లిఫ్ట్ కాకుండా, పూర్తిగా కొత్త లుక్‌తో రాబోతోంది. డిజైన్ పరంగా దీనికి సొంత గుర్తింపు ఉంటుంది. ఎక్స్‌టీరియర్‌లో షార్ప్‌గా, మరింత ఆకర్షణీయంగా ఉండే క్రోమ్ స్లాట్‌లు, మధ్యలో మహీంద్రా ట్విన్ పీక్స్ లోగో ఉన్న బ్లాక్ గ్రిల్ ఉంటాయి. కొత్త డిజైన్ చేసిన LED DRLలు, ప్రొజెక్టర్ హెడ్‌ల్యాంప్‌లు కూడా టీజర్‌లో కనిపిస్తున్నాయి.

ఇంటీరియర్‌లో అతిపెద్ద మార్పుగా 12.3 అంగుళాల ట్రిపుల్ స్క్రీన్ డిస్‌ప్లేను (ఇన్ఫోటైన్‌మెంట్, డిజిటల్ ఇన్‌స్ట్రుమెంటేషన్, కో-డ్రైవర్ ఎంటర్‌టైన్‌మెంట్ కోసం) మహీంద్రా అందించనుంది. ఇవే కాకుండా ఇల్యూమినేటెడ్ ట్విన్ పీక్స్ లోగో ఉన్న కొత్త స్టీరింగ్ వీల్, ప్రీమియం హర్మాన్ కార్డాన్ ఆడియో సిస్టమ్ వంటి అప్‌డేట్స్ కూడా ఇందులో ఉంటాయి. అయితే ఇంజన్, ట్రాన్స్‌మిషన్ ఆప్షన్లలో పెద్దగా మార్పులు ఉండకపోవచ్చు.