GST తగ్గితే ఈ కారు ధరల్లో భారీ మార్పు.. ఆల్టో K10, టియాగో, సెలెరియో ధరలు ఇంత వరకు పడిపోతాయా?

ప్రస్తుతం భారతదేశంలో వస్తువులు, సేవలపై ప్రభుత్వం 5%, 12%, 18%, 28% అనే నాలుగు ప్రధాన పన్ను రేట్లను అమలు చేస్తోంది. ఈ స్లాబుల ఆధారంగా పన్ను వసూలు చేస్తున్నారు. ముఖ్యంగా ఆటోమొబైల్ రంగంలో కార్లు, బైక్‌లు, స్కూటర్లు వంటి వాహనాలపై 28 శాతం వరకు జీఎస్టీ పన్ను ఉంది. దీంతో కస్టమర్లు కొనుగోలు సమయంలో అదనపు భారం మోయాల్సి వస్తోంది. అయితే, ఇప్పుడు పరిస్థితి మారబోతుందన్న సంకేతాలు స్పష్టంగా కనిపిస్తున్నాయి. ప్రభుత్వం ఈ ఏడాది అక్టోబర్ నాటికి జీఎస్టీ రేట్లను తగ్గించి, మొత్తం పన్ను వ్యవస్థను సరళీకృతం చేయాలని నిర్ణయించినట్లు సమాచారం. ఈ కొత్త సంస్కరణల కింద, ఇప్పటివరకు ఉన్న నాలుగు వేర్వేరు రేట్ల బదులు, పన్ను కేవలం రెండు విస్తృత వర్గాలుగా అమలు చేయబడే అవకాశం ఉంది.

ఇందులో అత్యంత ముఖ్యమైన విషయం ఏమిటంటే, కార్లు, టూవీలర్ వాహనాలపై ప్రస్తుతం అమలవుతున్న 28% పన్ను 18%కి తగ్గించే అవకాశం ఉందని చర్చ నడుస్తోంది. ఇది జరిగితే, వాహనం కొనాలని కలలు కనే వారికి నిజంగా పెద్ద వరంగా మారుతుంది. ఇప్పటివరకు పన్నుల భారంతో తమ ఇష్టమైన కారు కొనలేకపోయిన వారు, కొత్త జీఎస్టీ స్లాబ్‌లు అమల్లోకి వస్తే, అదనపు ఖర్చు లేకుండా మరింత సులభంగా వాహనాలను కొనుగోలు చేయగలరు.

వాహనాలపై పన్ను రేటు 28% నుంచి 18%కి తగ్గితే, దాని ప్రభావం నేరుగా కస్టమర్‌కు లాభంగా మారుతుంది. సగటున ఒక కార్ ధరలో 5% నుంచి 10% వరకు తగ్గుదల ఉండే అవకాశం ఉంది. కారు కొనాలని చూస్తున్నవారికి ఇది గోల్డెన్ ఛాన్స్. ఇప్పుడు భారతదేశంలో అత్యంత సరసమైన 3 ప్రముఖ కార్లను తీసుకుని, జీఎస్టీ సవరణ తర్వాత వాటి ధరలు ఎంత వరకు తగ్గవచ్చో ఒకసారి అంచనా వేద్దాం.

మారుతి సుజుకి ఆల్టో K10: భారతదేశంలో ఎంట్రీ-లెవల్ కార్లలో ముందంజలో నిలిచిన మోడల్. బడ్జెట్-ఫ్రెండ్లీ ధర, నమ్మకమైన ఇంజిన్, తక్కువ మెయింటెనెన్స్ ఖర్చుతో ఫస్ట్ టైమ్ కారు కొనుగోలుదారుల కోసం బెస్ట్ ఆప్షన్‌గా నిలుస్తోంది. ప్రస్తుతం ఈ కారు బేస్ వేరియంట్ ఎక్స్-షోరూమ్ ధర రూ.4.23 లక్షల నుంచి ప్రారంభమవుతుంది. కానీ ప్రభుత్వం ప్రతిపాదిస్తున్న కొత్త GST సవరణలు అమల్లోకి వస్తే, ఆల్టో K10 ధరలో గణనీయమైన తగ్గుదల జరగనుంది.

సవరించిన పన్ను రేట్ల ప్రకారం, ఆల్టో K10 బేస్ వేరియంట్ కొత్త ధర రూ. 3.87 లక్షలు మాత్రమే అవుతుంది. అంటే ప్రస్తుత ధరతో పోలిస్తే దాదాపు రూ. 36,000 వరకు తక్కువ అవుతుంది. బడ్జెట్ కారు కోసం వెతుకుతున్న మిడిల్ క్లాస్ కుటుంబాలకు ఇది నిజంగా ఒక పెద్ద రిలీఫ్. తక్కువ ఖర్చులోనే నమ్మకమైన, సులభంగా నడపగల కారు తమ గ్యారేజీలోకి రావడం కస్టమర్లకు అదనపు ఆనందాన్ని కలిగించబోతోంది.

టాటా టియాగో: భారతదేశంలో సేఫ్టీకి ప్రతీకగా నిలిచిన ఎంట్రీ లెవల్ హ్యాచ్‌బ్యాక్. 4 స్టార్ గ్లోబల్ NCAP రేటింగ్‌తో చిన్న కార్లలో అత్యంత సురక్షితమైన మోడల్‌గా పేరుపొందింది. స్టైలిష్ డిజైన్, శక్తివంతమైన ఇంజిన్, అలాగే టాటా కార్లకు ప్రత్యేకమైన బలమైన బాడీ క్వాలిటీ కారణంగా టియాగో మార్కెట్లో మంచి డిమాండ్‌ను కొనసాగిస్తోంది. ప్రస్తుతం ఈ కారు ఎక్స్-షోరూమ్ ధర రూ. 5.65 లక్షలు నుంచి ప్రారంభమవుతోంది.

అయితే ప్రభుత్వం ప్రతిపాదిస్తున్న GST తగ్గింపు అమలులోకి వస్తే, టాటా టియాగో ధర రూ. 5.15 లక్షలకు పడిపోతుంది. అంటే, వినియోగదారులకు దాదాపు రూ. 50,000 వరకు ఆదా అవుతుంది. ఈ స్థాయిలో తగ్గింపు అంటే ఎంట్రీ లెవల్ సేఫ్ హ్యాచ్‌బ్యాక్ కోసం చూస్తున్న వారికి నిజంగా గోల్డెన్ ఛాన్స్ అని చెప్పొచ్చు. ధర తగ్గడంతో టియాగో మరింత ఆకర్షణీయమైన ఆప్షన్‌గా మారుతుంది.

మారుతి సుజుకి సెలెరియో: ప్రస్తుతం సెలెరియో ధరలు రూ. 5.36 లక్షల ఎక్స్-షోరూమ్ నుంచి ప్రారంభమవుతున్నాయి. GST రేటు తగ్గింపు అమల్లోకి వస్తే, ఈ కారు ధర రూ. 4.90 లక్షలకు పడిపోవచ్చు. అంటే, దాదాపు రూ. 46,000 వరకు లాభం లభిస్తుంది. ఇలాంటి తగ్గింపు వల్ల, మంచి మైలేజ్ ఇచ్చే, సిటీ రైడ్‌లకు సరిపోయే స్టైలిష్ హ్యాచ్‌బ్యాక్ కోసం చూస్తున్న వారికీ సెలెరియో ఒక ఐడియల్ ఆప్షన్ అవుతుంది.