ఈ సెడాన్‎ను చూస్తే SUVలు కూడా అసూయపడుతున్నాయి..33కిమీ మైలేజ్‎తో మిడిల్ క్లాస్ వాళ్లకు బెస్ట్ కారు

భారతదేశంలో ప్రస్తుతం ఎస్‌యూవీ (SUV) కార్లదే ఆధిపత్యం కనిపిస్తుంది. అయినప్పటికీ వాటి మధ్యలో ఒక సెడాన్ మోడల్ అమ్మకాలు ఊహించని విధంగా పెరగడం వాహన మార్కెట్‌లో ఆసక్తిని రేకెత్తిస్తోంది. ఆ కారు మరేదో కాదు, క్రాష్ టెస్ట్‌లో 5-స్టార్ సేఫ్టీ రేటింగ్‌ను సొంతం చేసుకున్న మారుతీ సుజుకి (Maruti Suzuki) మొట్టమొదటి కారు డిజైర్ (Dzire).

ఈ కాంపాక్ట్ సెడాన్ ప్రతి నెలా అత్యధికంగా అమ్ముడవుతున్న కార్ల జాబితాలో ముందు వరుసలో నిలుస్తోంది. నవంబర్ 2025లో ఇది కేవలం టాటా నెక్సాన్ (Tata Nexon) కంటే కొద్ది సంఖ్యలో మాత్రమే వెనుకబడి రెండవ స్థానాన్ని కైవసం చేసుకుంది.

నవంబర్ నెలలో మారుతి డిజైర్ ఏకంగా 21,082 యూనిట్లను విక్రయించింది. గత సంవత్సరం ఇదే కాలంతో పోలిస్తే, ఇది 79 శాతం భారీ వృద్ధిని నమోదు చేసింది. గత నవంబర్‌లో కేవలం 11,779 యూనిట్లు మాత్రమే అమ్ముడయ్యాయి.

ఎస్‌యూవీల ట్రెండ్ పెరుగుతున్నప్పటికీ, డిజైర్ సాధించిన ఈ నిరంతర వృద్ధి మిగతా పోటీదారులను సైతం ఆశ్చర్యపరుస్తోంది. ఈ కారుకు ప్రైవేట్, ట్యాక్సీ విభాగంలోనూ డిమాండ్ ఎక్కువగా ఉంది. ఊబర్, ఓలా వంటి క్యాబ్ సర్వీసులకు కూడా ఇది అత్యంత ఇష్టమైన ఎంపికగా నిలుస్తోంది.

డిజైర్ ఇంతలా అమ్ముడుపోవడానికి కారణం, ఇది సరసమైన ధర, అద్భుతమైన మైలేజ్, హైటెక్ ఫీచర్లు, మంచి ప్రయాణ సౌకర్యాన్ని కలిగి ఉండటమే. LXI, VXI, ZXI, ZXI+ అనే నాలుగు వేరియంట్లలో లభించే ఈ కారు ఎక్స్-షోరూమ్ ధరలు రూ.6.26 లక్షల నుంచి రూ.9.31 లక్షల వరకు ఉన్నాయి.

ఈ కారులో 360-డిగ్రీ కెమెరా, 9 అంగుళాల స్మార్ట్‌ప్లే ప్రో ప్లస్ టచ్‌స్క్రీన్ ఇన్ఫోటైన్‌మెంట్, ఎలక్ట్రిక్ సన్‌రూఫ్, క్రూయిస్ కంట్రోల్ వంటి ఫీచర్లు ఉన్నాయి. ముఖ్యంగా ఇందులో 6 ఎయిర్‌బ్యాగ్‌లు, ఈఎస్‌పీ, హిల్ హోల్డ్ అసిస్ట్, ఐసోఫిక్స్ మౌంట్‌లు వంటి 5-స్టార్ సేఫ్టీ ఫీచర్లు ఉండటం అతిపెద్ద ప్లస్ పాయింట్.

కొత్త Z12E 1.2 లీటర్ పెట్రోల్ ఇంజన్‌తో డిజైర్ వస్తుంది. ఇది 5-స్పీడ్ మ్యాన్యువల్ లేదా ఏఎమ్‌టీ ఆటోమేటిక్ గేర్‌బాక్స్ ఆప్షన్‌లో లభిస్తుంది. డిజైర్ సీఎన్‌జీ (CNG) మోడల్‌లో కూడా అందుబాటులో ఉంది. సీఎన్‌జీ మోడ్‌లో ఈ కారు కిలోగ్రామ్‌కు 33.73 కిలోమీటర్ల వరకు అద్భుతమైన మైలేజీని అందిస్తుంది.

పెట్రోల్‌లో కూడా దీని మైలేజ్ 25.71 కి.మీ వరకు ఉంది. అంతేకాకుండా, డిసెంబర్ నెలలో దీని అన్ని వేరియంట్లపై రూ.10,000 డిస్కౌంట్, రూ.2,500 అదనపు ప్రయోజనాలను కంపెనీ అందిస్తోంది. ఈ అదనపు ఆఫర్‌తో డిజైర్ అమ్మకాలు మరింత పెరిగే అవకాశం ఉంది. డిజైర్ ప్రస్తుతం హోండా అమేజ్, టాటా టిగోర్, హ్యుందాయ్ ఆరా వంటి మోడళ్లకు గట్టి పోటీని ఇస్తోంది.

మారుతి సుజుకి డిజైర్ కేవలం ఒక కాంపాక్ట్ సెడాన్‌గా కాకుండా, అత్యుత్తమ సేఫ్టీ, అద్భుతమైన మైలేజ్, నమ్మదగిన బ్రాండ్ విలువతో కస్టమర్ల మనసులను గెలుచుకుంది. ఈ కారు ప్రస్తుతం హోండా అమేజ్, టాటా టిగోర్, హ్యుందాయ్ ఆరా వంటి మోడళ్లకు గట్టి పోటీని ఇస్తూ ఇండియన్ కార్ మార్కెట్‌లో తన స్థానాన్ని మరింత పటిష్టం చేసుకుంటోంది.