ఈ కారుకు డిమాండ్ మామూలుగా లేదు.. గత నెల రోజుకు 671 అమ్మిన మారుతి కంపెనీ

భారత మార్కెట్‌లో సెడాన్ (Sedan) సెగ్మెంట్‌లో మారుతి సుజుకి డిజైర్ (Maruti Suzuki Dzire) అంటే ప్రత్యేకమైన స్థానం ఉంది. ఆకర్షణీయమైన డిజైన్, సరసమైన ధర, అద్భుతమైన ఫీచర్ల కారణంగా ఈ కారు వినియోగదారులకు బాగా నచ్చింది. దీనికి నిదర్శనంగా గత అక్టోబర్ నెలలో డిజైర్ అమ్మకాలు భారీగా పెరిగాయి.

అంతకుముందు సంవత్సరంతో పోలిస్తే, ఏకంగా 64% వృద్ధిని నమోదు చేస్తూ ఈ సెడాన్ ఏకంగా 20,791 యూనిట్లు అమ్ముడైంది. జీఎస్టీ తగ్గింపు, దీపావళి పండుగ ఆఫర్లు దీని అమ్మకాలను పెంచాయి. రూ. 6.26 లక్షల (ఎక్స్-షోరూమ్) ప్రారంభ ధరతో, 33 కి.మీ వరకు మైలేజ్ ఇస్తున్న ఈ సెడాన్ పూర్తి వివరాలు తెలుసుకుందాం.

మారుతి సుజుకి డిజైర్ అక్టోబర్ నెలలో అమ్మకాల పరంగా అద్భుతమైన ప్రదర్శన కనబరిచింది. అక్టోబర్ నెలలో డిజైర్ ఏకంగా 20,791 యూనిట్లను విక్రయించింది. 2024 ఇదే కాలంలో కేవలం 12,698 యూనిట్లు మాత్రమే అమ్ముడయ్యాయి. ఈ గణాంకాల ప్రకారం అమ్మకాలలో సంవత్సరం నుంచి సంవత్సరానికి (YoY) ఏకంగా 64% వృద్ధి నమోదైంది.

సెప్టెంబర్ 22 నుంచి జీఎస్టీ రేట్లు సవరించడం వల్ల ఈ కారు ధర తగ్గడం, దీపావళి పండుగ సందర్భంగా కొనుగోళ్లు పెరగడం ఈ భారీ అమ్మకాల పెరుగుదలకు ప్రధాన కారణాలని విశ్లేషకులు చెబుతున్నారు. డిజైర్ సరసమైన ధర, ఆకర్షణీయమైన డిజైన్‌తో అన్ని వర్గాల కస్టమర్లను ఆకర్షిస్తోంది. డిజైర్ ఎక్స్-షోరూమ్ ధర రూ. 6.26 లక్షల నుంచి ప్రారంభమై రూ. 9.31 లక్షల వరకు ఉంది.

ఇది LXI, VXI, ZXI, ZXI+ అనే నాలుగు వేరియంట్‌లలో లభిస్తుంది. ఈ సెడాన్ మంచి LED హెడ్‌ల్యాంప్‌లు, LED DRLలు, LED టెయిల్ ల్యాంప్‌లు, అల్లాయ్ వీల్స్‌ను కలిగి ఉంది. ఇది పర్ల్ ఆర్కిటిక్ వైట్, మాగ్మా గ్రే, గ్యాలెంట్ రెడ్ వంటి ఆకర్షణీయమైన రంగులలో అందుబాటులో ఉంది. దీని పొడవు 3,995 మి.మీ, వెడల్పు 1,735 మి.మీ, ఎత్తు 1,515 మి.మీ. ఇందులో 2,450 మి.మీ వీల్‌బేస్, 163 మి.మీ గ్రౌండ్ క్లియరెన్స్ ఉన్నాయి.

డిజైర్ ప్రధాన ఆకర్షణ దాని మైలేజ్. ఇది రెండు పవర్‌ట్రెయిన్లలో లభిస్తుంది. ఇందులో 1.2-లీటర్ నాచురల్లీ ఆస్పిరేటెడ్ పెట్రోల్ ఇంజిన్ ఉంది, ఇది 82 bhp పవర్, 112 Nm టార్క్ ఉత్పత్తి చేస్తుంది. దీనికి 5-స్పీడ్ మాన్యువల్ (MT) లేదా 5-స్పీడ్ ఆటోమేటిక్ (AMT) గేర్‌బాక్స్ ఆప్షన్లు ఉన్నాయి. ఇది లీటరుకు 24.79 కిమీ నుంచి 25.71 కిమీ వరకు మైలేజ్ ఇస్తుంది.

1.2-లీటర్ పెట్రోల్ + CNG ఇంజిన్ 70 bhp పవర్, 102 Nm టార్క్ ఉత్పత్తి చేస్తుంది (కేవలం 5-స్పీడ్ MT). CNG వేరియంట్ అద్భుతమైన కిలోకు 33.73 కి.మీ వరకు మైలేజ్ ఇస్తుంది. డిజైర్ లోపలి భాగంలో అడ్వాన్సుడ్ టెక్నాలజీ, సేఫ్టీ ఫీచర్లను అందించారు. ఇందులో 9-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఆండ్రాయిడ్ ఆటో, ఆపిల్ కార్‌ప్లే, ఆటోమేటిక్ క్లైమేట్ కంట్రోల్, వైర్‌లెస్ ఫోన్ ఛార్జర్, సన్‌రూఫ్ వంటి ఫీచర్లు ఉన్నాయి.

ప్రయాణీకుల సేఫ్టీ కోసం 6 ఎయిర్‌బ్యాగ్‌లు, ABS, EBD, ESC (ఎలక్ట్రానిక్ స్టెబిలిటీ కంట్రోల్), క్రూయిజ్ కంట్రోల్, 360-డిగ్రీ కెమెరా వంటి అడ్వాన్సుడ్ సేఫ్టీ ఫీచర్లు ఉన్నాయి. ఇది 5-సీటర్ కారు. లగేజ్ కోసం 382 లీటర్ల బూట్ స్పేస్‌ను కలిగి ఉంది. గంటకు 160కిమీ వేగాన్ని చేరుకోగలదు.