ఆటోమొబైల్ మార్కెట్లో మారుతి సుజుకీనే తోపు.. దీన్ని మించింది లేదు.. 90 రోజుల్లో 5.27 లక్షల కార్లు అమ్మి రికార్డ

భారతదేశపు అతిపెద్ద కార్ల కంపెనీ అయిన మారుతి సుజుకి మళ్లీ తన సత్తా చాటుకుంది. కేవలం 90 రోజుల్లో అంటే ఆర్థిక సంవత్సరం 2025-26 మొదటి త్రైమాసికంలో 5.27 లక్షలకు పైగా కార్లను అమ్మింది. అంటే, సగటున రోజుకు 5,855 కార్లను విక్రయించి రికార్డు సృష్టించింది.

దేశంలో కార్ల మార్కెట్ కాస్త నెమ్మదిగా ఉన్నప్పటికీ, మారుతి సుజుకి ఈ అద్భుతమైన విజయాన్ని ఎలా సాధించింది? దీని వెనుక ఉన్న కారణాలు ఏంటి? పూర్తి వివరాలు ఇప్పుడు తెలుసుకుందాం.

భారతదేశపు అతిపెద్ద కార్ల తయారీ సంస్థ అయిన మారుతి సుజుకి ఇండియా లిమిటెడ్ (MSIL) ఆర్థిక సంవత్సరం 2025-26 మొదటి త్రైమాసికానికి సంబంధించిన ఆర్థిక ఫలితాలను ప్రకటించింది. ఈ 90 రోజుల్లో దేశంలో కార్ల మార్కెట్ నెమ్మదిగా ఉన్నప్పటికీ, మారుతి సుజుకి తన మొత్తం అమ్మకాలను పెంచుకుంది.

ఈ త్రైమాసికంలో మారుతి సుజుకి మొత్తం 5,27,861 వాహనాలను అమ్మింది. ఇది గత సంవత్సరం ఇదే కాలంతో పోలిస్తే 1.1% వృద్ధి. అంటే, సగటున రోజుకు 5,855 కార్లను అమ్మింది. ఈ వృద్ధికి ప్రధాన కారణం కార్ల ఎగుమతులు. ఈ త్రైమాసికంలో కంపెనీ 96,972 వాహనాలను ఎగుమతి చేసింది. ఇది గతేడాదితో ఇదే కాలంతో పోలిస్తే ఏకంగా 37.4% పెరిగింది. మరోవైపు, దేశీయ అమ్మకాలు మాత్రం 4.5% తగ్గి 4,30,889 వాహనాలుగా నమోదయ్యాయి.

ఈ గణాంకాలు భారతదేశంలో కార్ల మార్కెట్ నెమ్మదిగా ఉన్నప్పటికీ, మారుతి సుజుకి తమ అమ్మకాలను పెంచుకోవడానికి విదేశీ మార్కెట్లపై ఆధారపడినట్లు స్పష్టంగా చూపిస్తున్నాయి. దేశీయ అమ్మకాలు తగ్గినప్పటికీ, మారుతి సుజుకి నికర అమ్మకాలు మాత్రం పెరిగాయి. ఈ త్రైమాసికంలో కంపెనీ రూ.36,624.7 కోట్ల నికర అమ్మకాలను నమోదు చేసింది. గత ఆర్థిక సంవత్సరం మొదటి త్రైమాసికంలో రూ.33,875.3 కోట్లు మాత్రమే.

అంటే అమ్మకాలు 8.1% పెరిగాయని అర్థం. ఈ ఆదాయం పెరగడానికి కారణం, సరైన మోడళ్లను సరైన ధరలకు అమ్మడం, మరియు ఎగుమతులు పెరగడం. ఈ త్రైమాసికంలో కంపెనీ నికర లాభం రూ.3,711.7 కోట్లుగా నమోదైంది, ఇది గత సంవత్సరం ఇదే కాలంతో పోలిస్తే 1.7% వృద్ధి.

ఈ మధ్య కాలంలో మారుతి సుజుకి భద్రతకు ఎక్కువ ప్రాధాన్యత ఇస్తోంది. దీనిలో భాగంగా, ఇటీవలే ఫ్రాంక్స్ కారులో అన్ని వేరియంట్లలోనూ 6 ఎయిర్‌బ్యాగ్‌లను స్టాండర్డ్‌గా చేర్చింది. ఈ మార్పు జూలై 25 నుండి అమలులోకి వచ్చింది. దీనివల్ల ఫ్రాంక్స్ ధరలో స్వల్పంగా 0.5% పెరుగుదల ఉంది. ఈ నిర్ణయంతో ఫ్రాంక్స్ ఇప్పుడు XL6, బలేనో మరియు ఎర్టిగా వంటి కార్ల జాబితాలో చేరింది.

ఈ కార్లలో కూడా 6 ఎయిర్‌బ్యాగ్‌లు స్టాండర్డ్‌గా వస్తున్నాయి. ఏప్రిల్‌లో, మారుతి తమ అన్ని కార్లలో 6 ఎయిర్‌బ్యాగ్‌లను స్టాండర్డ్‌గా ఇవ్వాలని యోచిస్తున్నట్లు ప్రకటించింది. ఈ చర్య భారతీయ రోడ్లపై ప్రయాణికుల సేఫ్టీని పెంచడానికి తోడ్పడుతుంది.

డ్రైవ్‌స్పార్క్‌ తెలుగు వెబ్‌సైట్ ఆటోమొబైల్‌కి సంబంధించిన తాజా వార్తలను అందిస్తుంది. వివిధ సోషల్ మీడియాల ద్వారా సరికొత్త వార్తలను ఎప్పటికప్పుడు యూజర్లకు చేరవేస్తుంది. తాజా కార్ల వార్తలు, బైక్ వార్తలు, టెస్ట్ డ్రైవ్ రివ్యూల వీడియోల కోసం మా Facebook, Instagram, YouTube పేజీలతో కనెక్ట్ అవ్వండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు. ధన్యవాదాలు.