రూ.4.23 లక్షలకే 34 కి.మీ మైలేజ్ కారు! గత నెలలో దీని కోసం మారుతి షోరూమ్‌కు ఎంత మంది వచ్చారంటే..

భారత ఆటోమొబైల్ మార్కెట్లో ప్రస్తుతం తక్కువ ధరలో హ్యాచ్‌బ్యాక్‌లకు డిమాండ్ కొంత తగ్గింది. ఎప్పటిలాగే ఈ విభాగంలో ప్రధానంగా గుర్తింపు పొందిన మారుతి సుజుకి ఆల్టో K10 (Maruti Suzuki Alto K10) కూడా ఈ ప్రభావం నుండి తప్పించుకోలేకపోయింది. తక్కువ ధర, సరళమైన డిజైన్, సిటీ డ్రైవింగ్‌కు అనువైన పరిమాణం వంటి ప్రత్యేకతలతో మార్కెట్లో మంచి ఆదరణ పొందిన ఈ కారు, గత కొన్ని నెలలుగా అమ్మకాల పరంగా కాస్త వెనుకబడి ఉంది. ప్రస్తుత జూలై 2025 నెలలో వచ్చిన తాజా అమ్మకాల గణాంకాలు కూడా ఇదే విషయాన్ని స్పష్టం చేస్తున్నాయి. ఈ నెలలో మారుతి సుజుకి కేవలం 5,910 ఆల్టో K10 యూనిట్లను మాత్రమే విక్రయించింది. కానీ ఇదే జూలై 2024లో ఈ కారు అమ్మకాలు 7,353 యూనిట్లుగా నమోదయ్యాయి.

అంటే, ఒక్క సంవత్సరంలోనే ఈ మోడల్ అమ్మకాలలో గణనీయమైన తగ్గుదల చోటుచేసుకుంది. జూలై 2024తో పోలిస్తే, ఈసారి జూలై 2025లో మారుతి సుజుకి ఆల్టో K10 అమ్మకాలు 1,443 యూనిట్ల మేర తగ్గాయి. ఇది దాదాపు 20 శాతం తగ్గుదలగా లెక్కించబడుతుంది. మార్కెట్లో పెరిగిన పోటీ, వినియోగదారుల అభిరుచుల్లో వచ్చిన మార్పులు, అలాగే SUV, ప్రీమియం హ్యాచ్‌బ్యాక్‌ల వైపు మరింత ఆకర్షణ వంటి కారణాలు ఈ తగ్గుదలకు దారితీసినట్టు కనిపిస్తోంది.

అయినప్పటికీ, ఆల్టో K10 ఇప్పటికీ భారత మార్కెట్లో అత్యంత సరసమైన హ్యాచ్‌బ్యాక్‌లలో ఒకటిగా నిలుస్తోంది. కానీ ప్రస్తుతం సేల్స్ తగ్గిపోవడం అనేది మారుతి సుజుకికి ఒక హెచ్చరికలా మారింది. ఎందుకంటే ఆల్టో K10 వంటి మోడళ్లు ఎప్పటినుంచో కంపెనీకి అమ్మకాలలో స్థిరమైన బలం ఇచ్చే వాహనాలుగా ఉన్నాయి. ఇప్పుడు ఈ తగ్గుదలను అధిగమించడానికి మారుతి సుజుకి కొత్త వ్యూహాలు అమలు చేయాల్సిన అవసరం ఉందని పరిశ్రమ వర్గాలు భావిస్తున్నాయి.

ప్రస్తుతం, ఈ కారు ఎంట్రీ-లెవల్ వేరియంట్ ధర కేవలం రూ.4.23 లక్షలు మాత్రమే. ఇది ఎక్స్-షోరూమ్ ధరగా మారుతి సుజుకి అధికారిక వెబ్‌సైట్‌లో పేర్కొనబడింది. తక్కువ ధరతో పాటు, సిటీ డ్రైవింగ్‌కు అనువైన కాంపాక్ట్ సైజ్, మైలేజ్, సులభమైన నిర్వహణ ఖర్చులు ఆల్టో K10కు ఇంకా బలమైన ప్లస్ పాయింట్లుగా ఉన్నప్పటికీ, మార్కెట్లో పెరిగిన పోటీ, వినియోగదారుల అభిరుచుల మార్పు కారణంగా అమ్మకాలు కాస్త వెనుకబడి ఉన్నట్లు స్పష్టంగా కనిపిస్తోంది.

ఈ హ్యాచ్‌బ్యాక్‌ను మూడు ప్రధాన వేరియంట్లలో LXI, VXI, VXI ప్లస్‌లలో లభిస్తుంది. ఇది 1-లీటర్ నేచురల్లీ ఆస్పిరేటెడ్ పెట్రోల్ ఇంజిన్‌తో ప్రధాన ఆప్షన్‌గా అందుబాటులో ఉంది. ఇది 65.71 PS శక్తిని, 89 Nm టార్క్‌ను ఉత్పత్తి చేస్తుంది. మారుతి సుజుకి ఆల్టో K10లో పెట్రోల్ వేరియంట్ 24.90 కి.మీ/లీటర్ వరకు మైలేజ్ అందించగలదని కంపెనీ చెబుతోంది, ఇది రోజువారీ ప్రయాణాల కోసం ఒక పెద్ద ఆకర్షణ.

ఫ్యూయల్ ఖర్చులను మరింత తగ్గించుకోవాలనుకునే వారికి, ఆల్టో K10లో CNG వేరియంట్ కూడా అందుబాటులో ఉంది. ఇందులో అదే 1.0 లీటర్ ఇంజిన్‌ను ఉపయోగించినప్పటికీ, CNG మోడ్‌లో ఇది 56.70 PS శక్తి, 82.1 Nm టార్క్‌ను అందిస్తుంది. ఈ వేరియంట్ 5-స్పీడ్ మాన్యువల్ గేర్‌బాక్స్‌తో మాత్రమే లభిస్తుంది. ఇది 33.85 కి.మీ/కిలో వరకు మైలేజ్ ఇస్తుంది. తక్కువ రన్నింగ్ ఖర్చేతో ఈ కారు బడ్జెట్-ఫ్రెండ్లీ ఆప్షన్‌గా నిలుస్తుంది.

ఇది చిన్న కారు అయినప్పటికి కూడా దీనిలో లేటెస్ట్ ఫీచర్స్, అన్ని వేరియంట్లలో స్టాండర్డ్‌గా వచ్చే 6 ఎయిర్‌బ్యాగ్‌లు ఉన్నాయి. ఇది రివర్స్ పార్కింగ్ సెన్సార్‌లు, ఎలక్ట్రానిక్ స్టెబిలిటీ ప్రోగ్రామ్, స్మార్ట్‌ఫోన్ నావిగేషన్‌తో కూడిన స్మార్ట్‌ప్లే స్టూడియో, కంఫర్ట్ సీట్లు మొదలగు వాటితో కొనుగోలు చేయడానికి అందుబాటులో ఉంది.