మూడు వేల మంది ముఖం చాటేసారు..మారుతి ఫ్యామిలీ కారుకు మంగళం పాడుతున్నారా?

మారుతి సుజుకికి చెందిన అత్యంత ప్రజాదరణ పొందిన బాలెనో(Baleno) పరిస్థితి ఇప్పుడు అగమ్యగోచరంగా మారింది. మైలేజీలో రారాజుగా, మధ్యతరగతి కుటుంబాలకు ఇష్టమైన కారుగా పేరున్న బలేనో విక్రయాలు గత రెండు నెలలుగా దారుణంగా పడిపోతున్నాయి. కేవలం ఒక్క నెలలోనే వేల సంఖ్యలో యూనిట్ల విక్రయాలు తగ్గిపోవడం ఇప్పుడు ఆటోమొబైల్ రంగంలో చర్చనీయాంశమైంది.

ఒకప్పుడు నెలకు 15 వేల నుంచి 20 వేల వరకు యూనిట్లు అమ్ముడయ్యే బాలెనో.. ఇప్పుడు తీవ్ర ఒడిదుడుకులను ఎదుర్కొంటోంది. ఈ ఏడాది అక్టోబర్‌లో 16,875 యూనిట్లు అమ్ముడవ్వగా, నవంబర్ నాటికి ఆ సంఖ్య 13,784 కి పడిపోయింది. అంటే కేవలం 30 రోజుల్లోనే సుమారు 3,091 యూనిట్ల విక్రయాలు తగ్గాయి. ఇది దాదాపు 18 శాతం క్షీణతగా నమోదైంది. మారుతిలోని డిజైర్, స్విఫ్ట్ వంటి ఇతర మోడళ్లు దూసుకుపోతుంటే, కేవలం బాలెనోకు మాత్రమే ఈ పరిస్థితి రావడం కంపెనీకి తలనొప్పిగా మారింది.

బాలేనో తన అద్భుతమైన ఇంధన సామర్థ్యానికి (Fuel Efficiency) ప్రసిద్ధి. 1.2 లీటర్ ఫోర్-సిలిండర్ ఇంజిన్ కలిగిన ఈ కారు మాన్యువల్ వేరియంట్లో లీటరుకు 22.35 కిమీ, ఆటోమేటిక్ (AMT) వేరియంట్లో లీటరుకు 22.94 కిమీ మైలేజీని ఇస్తుంది. ఇక సిఎన్‌జి వెర్షన్ అయితే ఏకంగా కేజీకి 30.61 కి.మీ వరకు వెళ్తుంది. ఇంతటి మైలేజీ, పుష్కలంగా స్పేస్, టెక్నాలజీ (360 డిగ్రీ కెమెరా, హెడ్స్-అప్ డిస్‌ప్లే) ఉన్నప్పటికీ జనం ఈ కారు వైపు మొగ్గు చూపడం తగ్గించారు. దీనికి ప్రధాన కారణం దేశవ్యాప్తంగా పెరిగిన ఎస్‌యూవీ మోజు అని విశ్లేషకులు చెబుతున్నారు.

ఎస్‌యూవీల ధాటికి తట్టుకోలేక.. ప్రస్తుతం భారతీయ కస్టమర్లు హ్యాచ్‌బ్యాక్ కార్ల కంటే మైక్రో ఎస్‌యూవీలు లేదా కాంపాక్ట్ ఎస్‌యూవీలకే ఓటు వేస్తున్నారు. ముఖ్యంగా బాలెనోకు సొంత సంస్థ నుండే ఫ్రాంక్స్(Fronx) రూపంలో గట్టి పోటీ ఎదురవుతోంది. ఫ్రాంక్స్ చూడటానికి స్టైలిష్‌గా, ఎత్తుగా (Ground Clearance) ఉండటంతో చాలామంది బాలెనో కంటే దాన్నే ఇష్టపడుతున్నారు. అలాగే టాటా పంచ్, హ్యుందాయ్ ఎక్స్టర్ వంటి కార్లు కూడా బాలెనో మార్కెట్‌ను దెబ్బతీస్తున్నాయి. ధర విషయానికి వస్తే బాలెనో ఎక్స్-షోరూమ్ ధర రూ.5.99 లక్షల నుంచి రూ.9.10 లక్షల వరకు ఉంది.

బడ్జెట్ కారు కావాలనుకుంటే.. విక్రయాలు తగ్గినప్పటికీ, ఇప్పటికీ పట్టణాల్లో తిరగడానికి, ఫ్యామిలీతో ప్రయాణించడానికి బలేనో ఒక అద్భుతమైన ఎంపిక. దీని ఇంటీరియర్‌లో 9-అంగుళాల టచ్‌స్క్రీన్, ఆరు ఎయిర్‌బ్యాగులు, హిల్ హోల్డ్ అసిస్ట్ వంటి అడ్వాన్సుడ్ సేఫ్టీ ఫీచర్లు ఉన్నాయి. డిసెంబర్ నెలలో అమ్మకాలను పెంచడానికి నెక్సా (NEXA) షోరూమ్‌లు భారీ డిస్కౌంట్లు ఇచ్చే అవకాశం ఉంది. కాబట్టి మీరు తక్కువ ఖర్చుతో కూడిన ప్రీమియం కారు కొనాలనుకుంటే, ఇప్పుడే మీ దగ్గరలోని షోరూమ్ సందర్శించి టెస్ట్ డ్రైవ్ చేయడం మంచిది.

మారుతి సుజుకి బాలెనో కేవలం ఒక కారు మాత్రమే కాదు, లక్షలాది మధ్యతరగతి కుటుంబాల ప్రీమియం కల. అయితే, మారుతున్న కాలంతో పాటు కస్టమర్ల అభిరుచులు కూడా మారుతున్నాయి. ఒకప్పుడు మైలేజీయే పరమావధిగా భావించిన భారతీయులు, ఇప్పుడు అదే మైలేజీతో పాటు రోడ్ ప్రెజెన్స్, మజిల్ లుక్ ఉన్న ఎస్‌యూవీల వైపు అడుగులు వేస్తున్నారు. బాలెనో విక్రయాల తగ్గుదల అనేది కేవలం ఆ ఒక్క మోడల్ సమస్య కాదు, అది మొత్తం హ్యాచ్‌బ్యాక్ సెగ్మెంట్‌కు హెచ్చరిక లాంటిది.

కానీ, ఇప్పటికీ రద్దీగా ఉండే నగరాల్లో పార్కింగ్ సౌలభ్యం, తక్కువ మెయింటెనెన్స్, గరిష్ట మైలేజీ కోరుకునే వారికి బాలెనోను మించిన మొనగాడు లేడనేది వాస్తవం. ఎస్‌యూవీల హడావిడిలో ఈ మైలేజీ క్వీన్ తన పట్టును పూర్తిగా కోల్పోతుందా లేక తనదైన శైలిలో మళ్లీ పుంజుకుంటుందా అనేది రాబోయే కాలమే నిర్ణయించాలి. ఏది ఏమైనా, తక్కువ బడ్జెట్‌లో లగ్జరీని ఆస్వాదించాలనుకునే స్మార్ట్ కొనుగోలుదారులకు డిసెంబర్ నెలలో లభించే ఆఫర్లు బాలెనోను సొంతం చేసుకోవడానికి ఒక గొప్ప అవకాశం కావచ్చు.