ఇది టాటా నెక్సాన్, హ్యుందాయ్ వెన్యూలకు మరణశాసనం..బ్రెజ్జా ఫేస్‌లిఫ్ట్‌లో కిల్లింగ్ ఫీచర్లు

భారతదేశంలో అత్యంత ప్రజాదరణ పొందిన కాంపాక్ట్ ఎస్‌యూవీలలో ఒకటైన మారుతి సుజుకి బ్రెజ్జా (Maruti Suzuki Brezza) ఫేస్‌లిఫ్ట్ వెర్షన్ మరోసారి సీక్రెట్‎గా టెస్టింగ్ చేస్తుండగా కెమెరా కళ్లకు చిక్కింది. ఈసారి బ్రెజ్జాను మనాలి సమీపంలో మారుతి జిమ్నీతో పాటు పరీక్షించడం జరిగింది. ఈ తాజా టెస్టింగ్ సమయంలో వెల్లడైన కొత్త వివరాలు, రాబోయే 2026 మారుతి సుజుకి బ్రెజ్జా ఫేస్‌లిఫ్ట్‌లో డిజైన్, ఫీచర్ల పరంగా పెద్ద ఎత్తున మార్పులు జరగబోతున్నాయని స్పష్టంగా సూచిస్తున్నాయి. ఈ భారీ అప్‌డేట్ కారును దాని ప్రత్యర్థులైన టాటా నెక్సాన్, హ్యుందాయ్ వెన్యూ వంటి కాంపాక్ట్ ఎస్‌యూవీలకు మరింత గట్టి పోటీ ఇచ్చేలా చేయనుంది.

కొత్తగా కనిపించిన స్పై చిత్రాలు, మారుతి బ్రెజ్జా ఫేస్‌లిఫ్ట్‌లో ప్రధానంగా బాహ్య మార్పులు జరగబోతున్నాయని సూచిస్తున్నాయి. టెస్టింగ్ మోడల్ పూర్తిగా కవర్‌తో ఉన్నప్పటికీ, రీ-డిజైన్ చేయబడిన హెడ్‌ల్యాంప్‌లు, టెయిల్‌ల్యాంప్‌లు స్పష్టంగా కనిపిస్తున్నాయి. కొత్తగా వచ్చే ఎల్ఈడీ డీఆర్‌ఎల్‌లు (LED DRLs), ప్రీమియం టెయిల్‌లైట్ సెటప్ కారు లుక్‌ను మరింత షార్ప్‌గా మార్చనున్నాయి.

ఇంతకుముందు టెస్ట్ మోడల్స్‌లో పాత వీల్స్ కనిపించినా, ఈసారి కొత్త బ్లాక్ కలర్ స్విర్ల్ డిజైన్‌తో కూడిన అల్లాయ్ వీల్స్‌ను గమనించారు, ఇవి కారుకు సరికొత్త స్పోర్టీ రూపాన్ని ఇస్తాయి. పక్క నుంచి చూసినప్పుడు, కారు మొత్తం ఎస్‌యూవీ షేప్, స్క్వేర్ వీల్ ఆర్చెస్, రూఫ్ రైల్స్ యథావిధిగా ఉన్నప్పటికీ, బంపర్‌లు, క్లాడింగ్‌లో కొన్ని స్టైలిష్ మార్పులు ఉండే అవకాశం ఉంది.

బ్రెజ్జా ఫేస్‌లిఫ్ట్ 2026లో క్యాబిన్ లోపల పెద్ద ఎత్తున ఫీచర్ల అప్‌గ్రేడ్‌లు జరుగుతాయని భావిస్తున్నారు. ఈ అప్‌డేట్‌లో పెద్దదైన 10.1 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, మెరుగైన ఇన్‌స్ట్రుమెంట్ క్లస్టర్ డిస్‌ప్లే, అప్‌గ్రేడ్ అయిన ఆడియో సిస్టమ్ రానున్నాయి. సౌకర్యం కోసం, కస్టమర్లు ఎప్పటినుంచో ఎదురుచూస్తున్న వెంటిలేటెడ్ సీట్లు (Ventilated Seats), మెరుగైన నాణ్యత గల ఇంటీరియర్ మెటీరియల్స్‌ను జోడించే అవకాశం ఉంది.

సేఫ్టీకి అత్యంత ప్రాధాన్యత ఇస్తూ ప్రస్తుతం పోటీలో ఉన్న కార్లు ఏడీఏఎస్ (ADAS - Advanced Driver Assistance Systems) ఫీచర్లను అందిస్తున్నందున, మారుతి కూడా బ్రెజ్జా ఫేస్‌లిఫ్ట్‌లో లెవెల్-2 ADAS ఫీచర్లను జోడించే అవకాశం ఉంది. ప్రస్తుత బ్రెజ్జాలో ఇప్పటికే హెడ్-అప్ డిస్‌ప్లే (HUD), 360-డిగ్రీ కెమెరా, ఆరు ఎయిర్‌బ్యాగ్‌లు, ఈఎస్‌పీ (ESP) వంటి ఫీచర్లు ఉన్నాయి.

మెకానికల్ పరంగా, బ్రెజ్జా ఫేస్‌లిఫ్ట్ దాని నమ్మకమైన 1.5 లీటర్ K15C స్మార్ట్ హైబ్రిడ్ పెట్రోల్ ఇంజిన్‌తోనే కొనసాగుతుంది. ఈ ఇంజిన్ 103.1 PS పవర్, 139 Nm టార్క్ అందిస్తుంది. ఇది 5-స్పీడ్ మాన్యువల్ లేదా 6-స్పీడ్ ఆటోమేటిక్ గేర్‌బాక్స్ ఆప్షన్లలో లభిస్తుంది. అయితే, అత్యంత ఆసక్తికరమైన అప్‌డేట్ CNG వెర్షన్ కోసం రాబోతోంది. మారుతి ఈ కొత్త CNG మోడల్‌లో అండర్‌బాడీ CNG ట్యాంక్‌ను ఉపయోగించవచ్చని సమాచారం.

ఈ టెక్నికల్ మార్పు కారణంగా కారు బూట్ స్పేస్ (Boot Space) గణనీయంగా పెరుగుతుంది, ఇది CNG కారు కొనుగోలుదారులకు పెద్ద ఉపశమనం. కొత్త డిజైన్, అధునాతన ఫీచర్లు, CNG బూట్ స్పేస్ మెరుగుదలతో రాబోతున్న ఈ 2026 బ్రెజ్జా ఫేస్‌లిఫ్ట్, కాంపాక్ట్ ఎస్‌యూవీ సెగ్మెంట్‌లో మారుతికి తిరుగులేని ఆధిపత్యాన్ని తెచ్చిపెట్టడం ఖాయమని మార్కెట్ వర్గాలు భావిస్తున్నాయి.