కాంపాక్ట్ ఎస్‌యూవీ సెగ్మెంట్‌లో దుమ్మురేపుతున్న బ్రెజా.. 6 నెలల్లో 84,902 యూనిట్ల అమ్మకాలు!

భారతదేశంలో కాంపాక్ట్ ఎస్‌యూవీలకు విపరీతమైన డిమాండ్ ఉన్న విషయం తెలిసిందే. ఈ విభాగంలో మారుతి సుజుకి బ్రెజా (Maruti Suzuki Brezza) ఎస్‌యూవీకి ఒక ప్రత్యేక స్థానం ఉంది. విడుదలైనప్పటి నుంచి భారతీయ కస్టమర్ల అభిమానాన్ని చూరగొన్న ఈ కారు, చాలా నెలలు దేశంలోనే అత్యధికంగా అమ్ముడైన కారుగా నిలిచింది.

2025-2026 ఆర్థిక సంవత్సరం మొదటి ఆరు నెలల (ఏప్రిల్ నుండి సెప్టెంబర్) అమ్మకాల గణాంకాలు ఇప్పుడు విడుదలయ్యాయి. ఈ ఆరు నెలల్లో బ్రెజా ఏకంగా 84,902 యూనిట్లను విక్రయించింది. కేవలం రూ.8.26 లక్షల ప్రారంభ ధర, లీటరుకు 20 కి.మీ మైలేజ్, ఇప్పుడు స్టాండర్డ్‌గా అందించబడుతున్న 6 ఎయిర్‌బ్యాగ్‌లతో బ్రెజా సాధించిన ఈ విజయం గురించి, తాజా ఆఫర్ల గురించి ఇక్కడ తెలుసుకుందాం.

మారుతి సుజుకి బ్రెజా కాంపాక్ట్ ఎస్‌యూవీ విభాగంలో టాటా నెక్సాన్ తర్వాత అత్యధికంగా అమ్ముడవుతున్న కారుగా స్థిరంగా నిలుస్తోంది. 2025-2026 ఆర్థిక సంవత్సరం మొదటి అర్ధభాగంలో (ఏప్రిల్ నుండి సెప్టెంబర్ వరకు), మారుతి సుజుకి ఏకంగా 84,902 బ్రెజా యూనిట్లను విక్రయించింది. అంటే, ప్రతి నెలా సగటున 14,150 మంది కస్టమర్లను ఈ ఎస్‌యూవీ ఆకర్షించింది.

టాటా నెక్సాన్ మొదటి స్థానంలో ఉండగా, మారుతి ఫ్రాంక్స్, టాటా పంచ్, హ్యుందాయ్ వెన్యూ, కియా సోనెట్ వంటి బలమైన పోటీదారులతో పోరాడి బ్రెజా ఈ అద్భుతమైన అమ్మకాలను సాధించింది. బ్రెజాకు శక్తినిచ్చేది కొత్త తరం కె-సిరీస్ 1.5 లీటర్ డ్యూయల్ జెట్ వీవీటీ ఇంజిన్. ఈ ఇంజిన్ 103 బీహెచ్‌పీ శక్తిని, 137 ఎన్ఎమ్ టార్క్ను ఉత్పత్తి చేస్తుంది.

ఈ ఇంజిన్ స్మార్ట్ హైబ్రిడ్ టెక్నాలజీతో పనిచేస్తుంది. దీని మ్యాన్యువల్ వేరియంట్ లీటరుకు 20.15 కి.మీ మైలేజీని, ఆటోమేటిక్ వేరియంట్ లీటరుకు 19.80 కి.మీ మైలేజీని ఇస్తుందని కంపెనీ పేర్కొంది. ఇది 5-స్పీడ్ మ్యాన్యువల్, 6-స్పీడ్ టార్క్ కన్వర్టర్ ఆటోమేటిక్ ట్రాన్స్‌మిషన్ ఆప్షన్లలో అందుబాటులో ఉంది.

ఇందులో 360-డిగ్రీ కెమెరా, 9 అంగుళాల స్మార్ట్‌ప్లే ప్రో ప్లస్ టచ్‌స్క్రీన్ ఇన్ఫోటైన్‌మెంట్ సిస్టమ్ (వైర్‌లెస్ ఆండ్రాయిడ్ ఆటో/ఆపిల్ కార్‌ప్లే), మరియు వైర్‌లెస్ ఛార్జింగ్ డాక్ వంటి లేటెస్ట్ ఫీచర్స్ ఉన్నాయి. కస్టమర్లకు మరింత భద్రత అందించే ఉద్దేశంతో మారుతి సుజుకి ఫిబ్రవరిలో బ్రెజాలో ఒక కీలక మార్పు చేసింది.

సేఫ్టీ: గతంలో టాప్ ఎండ్ ZXi+ ట్రిమ్‌లో మాత్రమే అందుబాటులో ఉన్న 6 ఎయిర్‌బ్యాగ్‌ల ఫీచర్‌ను ఇప్పుడు బేస్ వేరియంట్ నుండి స్టాండర్డ్‌గా అందించడం మొదలుపెట్టింది. అంతేకాకుండా, బ్రెజాలో ఇప్పుడు ప్రయాణికులందరికీ 3 పాయింట్ సీట్ బెల్ట్‌లు కూడా లభిస్తున్నాయి. ఈ భద్రతా అప్‌గ్రేడ్ కారుకు మరింత ఆకర్షణను తెచ్చింది.

జీఎస్టీ సంస్కరణల కారణంగా బ్రెజా ధరలు గణనీయంగా తగ్గాయి. బ్రెజా బేస్ వేరియంట్ ధర రూ.43,100 తగ్గి, ఇప్పుడు రూ.8,25,900 (ఎక్స్-షోరూమ్) వద్ద లభిస్తోంది. అలాగే, టాప్ ఎండ్ ZXi ప్లస్ AT వేరియంట్ ధర ఏకంగా రూ.1.12 లక్షలు తగ్గి, రూ.12.86 లక్షల (ఎక్స్-షోరూమ్)కు చేరింది.

ఈ దీపావళి పండుగను దృష్టిలో ఉంచుకుని, మారుతి బ్రెజాపై ఆకర్షణీయమైన ఆఫర్లను ప్రకటించింది. అక్టోబర్‌లో ఈ కారు కొనుగోలు చేసేవారు రూ.45,000 వరకు ప్రయోజనాలను పొందవచ్చు. పెట్రోల్ వేరియంట్‌లకు రూ.10,000 నగదు తగ్గింపుతో పాటు రూ.35,000 ఇతర ప్రయోజనాలు, సీఎన్‌జీ వేరియంట్‌లకు రూ.35,000 వరకు బెనిఫిట్స్ అందుబాటులో ఉన్నాయి.