25 కి.మీ మైలేజ్, 5-సీటర్, 8 లక్షలు.. ఇంత మంచి కారుకు ఏమైంది? సేల్స్ ఢమాల్

భారతదేశంలో కార్ల మార్కెట్‌కి మారుతి సుజుకి (Maruti Suzuki) అనే పేరు ప్రత్యేకమైన ఆదరణను పొందింది. ఎందుకంటే ఈ కంపెనీ నుంచి వచ్చే మోడల్స్ సాధారణ వినియోగదారుల బడ్జెట్‌కు సరిపోయే విధంగా ఉండటమే కాకుండా, మైలేజ్‌, నాణ్యత, పనితీరు అన్నీ కలిపి అందిస్తాయి. ముఖ్యంగా SUV సెగ్మెంట్‌లోకి తీసుకొచ్చిన మారుతి సుజుకి బ్రెజ్జా (Brezza) అయితే, విడుదలైన రోజునుంచే విశేషమైన పాపులారిటీ సంపాదించింది. కాంపాక్ట్ SUVగా దీనికి ఉన్న డిమాండ్‌, ఆకర్షణీయమైన డిజైన్, ఆధునిక ఫీచర్లు ఇవన్నీ కలిపి బ్రెజ్జాను చాలా మందికి ఫ్యామిలీ కారుగా నిలిపాయి. అయితే, ఇటీవల వెలువడిన సేల్స్ గణాంకాలను పరిశీలిస్తే, బ్రెజ్జా అమ్మకాలలో కొంత వెనుకంజ కనిపిస్తోంది.

2025 ఆగస్టు నెలలో మొత్తం 13,620 యూనిట్లు మాత్రమే వినియోగదారుల చేతికి చేరాయి. ఈ సంఖ్యను 2024 ఇదే కాలంతో పోల్చితే స్పష్టమైన తేడా కనిపిస్తోంది. గత సంవత్సరం ఆగస్టులో బ్రెజ్జా 19,190 యూనిట్లు అమ్ముడవ్వగా, ఈసారి మాత్రం అమ్మకాలు గణనీయంగా తగ్గాయి. ఈ తేడాను శాతం వారీగా లెక్కించుకుంటే, సరిగ్గా -29.03% తగ్గుదల నమోదైంది. గత ఏడాది బలమైన డిమాండ్‌తో ఉన్న బ్రెజ్జా ఈసారి అంతగా వినియోగదారులను ఆకర్షించలేకపోయింది.

బ్రెజ్జా అమ్మకాలు తక్కువ కావడానికి పలు కారణాలు ఉన్నాయి. SUV మార్కెట్‌లో పోటీ క్రమంగా పెరుగుతుండటం, కొత్త మోడల్స్ లాంచ్ కావడం, అలాగే వినియోగదారులు ఎలక్ట్రిక్, హైబ్రిడ్ కార్లవైపు దృష్టి మళ్లించడం అన్నీ కలిసి బ్రెజ్జా అమ్మకాలపై ప్రభావం చూపినట్లు తెలుస్తోంది. ఇకపోతే, ఈ తగ్గుదల ఉన్నప్పటికీ బ్రెజ్జా మార్కెట్‌లో తన ప్రత్యేకతను మాత్రం కోల్పోలేదు. కానీ, తాజా గణాంకాలు మాత్రం కంపెనీకి ఒక అలర్ట్ సిగ్నల్‌లా మారాయి.

అయితే మరికొద్ది రోజుల్లో కొత్త GST అమల్లోకి రానుండటంతో ఈ కారు ధరలు భారీగానే తగ్గనున్నాయి. ఈ నేపథ్యంలో కస్టమర్లు బ్రెజ్జా కోసం షోరూమ్‌లకు రావడం మొదలవుతుందని అంచనాలు ఉన్నాయి. ధరల తగ్గుదలతో పాటు కంపెనీ దీని సేల్స్ పెంచడానికి రాబోయే నెలల్లో కొత్త అప్‌డేట్లు, ఆఫర్లు, స్పెషల్ ఎడిషన్లు వంటి వ్యూహాలతో బ్రెజ్జా మళ్లీ తన పాత పుంజుకోగలదని మార్కెట్ వర్గాలు భావిస్తున్నాయి.

మారుతి సుజుకి బ్రెజ్జా ప్రస్తుతం మార్కెట్‌లో అందుబాటులో ఉన్న అత్యంత ప్రాచుర్యం పొందిన కాంపాక్ట్ SUVలలో ఒకటి. దీని ధర ప్రస్తుతం రూ.8.69 లక్షల నుండి రూ.14.14 లక్షల (ఎక్స్-షోరూమ్) మధ్య ఉంటుంది. కార్లపై GST రేట్లను సవరించిన నేపథ్యంలో ధర తగ్గిపోవడం వల్ల SUV కొనుగోలు చేయాలనుకునే మధ్యతరగతి కుటుంబాలకు ఇది బంపర్ ఆఫర్‌లా మారవచ్చు.

ఇకపోతే, బ్రెజ్జా కేవలం సరసమైన ధర మాత్రమే కాదు, పనితీరు పరంగా కూడా ప్రత్యేకంగా నిలుస్తోంది. ఈ SUV 1.5-లీటర్ పెట్రోల్ ఇంజిన్, 1.5-లీటర్ మైల్డ్ హైబ్రిడ్ (పెట్రోల్ + ఎలక్ట్రిక్), 1.5-లీటర్ CNG ఇంజిన్ ఆప్షన్లలో లభిస్తుంది. వేరియంట్‌ను బట్టి, 5-స్పీడ్ మాన్యువల్ గేర్‌బాక్స్ లేదా 6-స్పీడ్ ఆటోమేటిక్ గేర్‌బాక్స్‌తో లభిస్తోంది. ఇది వినియోగదారుల అవసరాలకు అనుగుణంగా ఎంపిక చేసుకోవడానికి బాగా ఉపయోగపడుతుంది.

మైలేజ్ పరంగా కూడా బ్రెజ్జా తన క్లాస్‌లో అగ్రస్థానంలో ఉంటుంది. వేరియంట్‌పై ఆధారపడి, ఇది 17 నుండి గరిష్టంగా 25.51 kmpl వరకు మైలేజ్ అందిస్తుంది. ఈ గణాంకాలు చూస్తే, ఒక కాంపాక్ట్ SUV ఇంత ఎకానమికల్‌గా ఉండటం నిజంగా విశేషమే. మైలేజ్ విషయానికి వస్తే, చాలా బైక్‌లకంటే కూడా ఇది సాటిలేని స్థాయిలో ఉంటుంది అనడం అతిశయోక్తి కాదు.