రూ.3.50 లక్షలకే మారుతి కారు.. భారీగా తగ్గిన ధరలు.. ఏ మోడల్‌కు ఎంతంటే..

దేశంలోనే అతిపెద్ద కార్ల తయారీ సంస్థగా పేరుపొందిన మారుతి సుజుకి ఇండియా లిమిటెడ్ (MSIL) తన కస్టమర్లకు మరోసారి సంతోషకమైన వార్తను అందించింది. తాజాగా కేంద్ర ప్రభుత్వం కొత్త కార్ల కొనుగోలుపై జీఎస్టీ రేట్లను సవరించిన సంగతి తెలిసిందే. ఈ మార్పు వల్ల లభించే పూర్తి ప్రయోజనాన్ని వినియోగదారులకే అందించాలని మారుతి సుజుకి నిర్ణయించింది. దాంతో తమ కార్ల ధరలను భారీగా తగ్గిస్తూ మార్కెట్లో మరింత శక్తివంతంగా ముందుకు దూసుకెళ్లేందుకు కంపెనీ సిద్ధమైంది. కొత్త రేట్లు అధికారికంగా సెప్టెంబర్ 22 నుంచి అమల్లోకి రానున్నాయి. ఈ సవరణలతో కలిపి మారుతి సుజుకి కార్ల ధరలు కనీసం రూ.46,400 వరకు తగ్గించబడ్డాయి. కొన్ని మోడళ్లలో గరిష్టంగా రూ.1.29 లక్షల వరకు తగ్గింపు వచ్చింది.

దీని వలన కారు కొనుగోలు చేయాలని భావిస్తున్న వారికి ఇది ఒక మంచి అవకాశం అని చెప్పుకోవచ్చు. వినియోగదారుల ఖర్చును తగ్గించడం మాత్రమే కాకుండా, కార్ల యాజమాన్యం మరింత సులభతరం కానుంది. ధరల తగ్గింపు ప్రభావం ఎస్-ప్రెస్సో, ఆల్టో కె10, సెలెరియో, వ్యాగన్ఆర్, ఇగ్నిస్, స్విఫ్ట్, బాలెనో, టూర్ ఎస్, డిజైర్, బ్రెజ్జా, గ్రాండ్ విటారా, జిమ్నీ, ఎర్టిగా, ఎక్స్‌ఎల్6, ఇన్విక్టో, ఈకో వంటి ప్రముఖ మోడళ్లపై పడింది.

బడ్జెట్ సెగ్మెంట్‌లోని చిన్న కార్ల నుండి ఫ్యామిలీ SUVలు, ప్రీమియం హైబ్రిడ్ మోడళ్ల వరకు దాదాపు అన్ని విభాగాల్లో ధరలు తగ్గించబడటంతో, ప్రతి కస్టమర్‌కు తన బడ్జెట్‌కి సరిపోయే మోడల్‌ను ఎంపిక చేసుకునే అవకాశం దొరుకుతోంది. ఈ ధరల తగ్గింపు కేవలం వినియోగదారులకు మాత్రమే కాకుండా, మొత్తం ఆటోమొబైల్ మార్కెట్‌కు ఊపిరి పోసేలా పనిచేస్తుందని నిపుణులు అభిప్రాయపడుతున్నారు.

మారుతి ఎస్-ప్రెస్సో - ప్రారంభ ధర రూ. 3.50 లక్షల నుంచి ఉంటుంది. ఇది మాత్రమే కాకుండా చాలా మోడళ్ల ధరలు రూ.4 లక్షల లోపే లభిస్తాయి. ఇటీవల కొన్ని విభాగాల్లో మందగమన కనిపించగా, ఈ నిర్ణయం విక్రయాలను పెంచే అవకాశముంది. మారుతి వంటి పెద్ద సంస్థ ధరలు తగ్గించడం అనేది ఇతర కంపెనీలపై కూడా ఒత్తిడి పెంచే అవకాశం ఉంది.

మారుతి సుజుకి ఇండియా మార్కెటింగ్ & సేల్స్ సీనియర్ వైస్ ప్రెసిడెంట్ పార్థో బెనర్జీ తాజాగా మాట్లాడుతూ, ప్రతి 1,000 మందిలో కేవలం 34 మందికే కారు ఉంది. ఇది ద్విచక్ర వాహనదారులు కారు యజమానులుగా మారే సరైన సమయం అని అన్నారు. ఆయన వ్యాఖ్యలు భారత ఆటోమొబైల్ రంగంలో ప్రస్తుత పరిస్థితిని స్పష్టంగా చూపుతున్నాయి. ఇంకా లక్షలాది మంది ప్రజలు కార్లు లేనివారీగా ఉన్నారని ఆయన అన్నారు.

తగ్గింపు అవకాశాన్ని వినియోగించుకుని చాలా మంది కొత్త కార్లు కొనడానికి ముందుకు వస్తారని ఆయన ఆశాభావం వ్యక్తం చేశారు. ఇటీవల జరిగిన వస్తు సేవల పన్ను (GST) కమిటీ సమావేశంలో తీసుకున్న కీలక నిర్ణయం ఆటోమొబైల్ రంగానికి ఊపిరి పోసింది. ప్రత్యేకంగా 1200cc వరకు పెట్రోల్, CNG, డీజిల్ ఇంజిన్‌లతో కూడిన కార్లపై GST రేటు 28% నుంచి 18%కి తగ్గించబడింది.

ఈ తగ్గింపు వల్ల చిన్న కార్ల ధరలు గణనీయంగా తగ్గి, మధ్యతరగతి ప్రజలకు మరింత చేరువ కానున్నాయి. అదేవిధంగా, లగ్జరీ సెడాన్లు, SUVలు, MPVలపై ఎటువంటి సెస్సు లేకుండా 40% GST విధించాలని నిర్ణయం తీసుకున్నారు. దీంతో అధిక స్థాయి కార్ల కొనుగోలుదారులకు కూడా పారదర్శకమైన ధరలు అందుబాటులోకి రానున్నాయి. జీఎస్టీ తగ్గింపుతో దసరా, దీపావళి పండుగ సమయంలో కార్ల అమ్మకాలు భారీగా జరిగే అవకాశం ఉంది.