ఇది పేదవాడి కారు.. 34 కి.మీ మైలేజ్, 4.70 లక్షలు.. గత నెలలో ఎంతమంది కొన్నారో తెలుసా?

మారుతి సుజుకి సెలెరియో (maruti suzuki celerio) దేశీయ మార్కెట్లో ఒకప్పుడు మంచి డిమాండ్‌ను సొంతం చేసుకున్న ఫ్లాగ్‌షిప్ హ్యాచ్‌బ్యాక్‌గా పేరొందింది. కాంపాక్ట్ సైజ్, ఆకర్షణీయమైన డిజైన్, మంచి ఫీచర్లు, విశ్వసనీయత కోసం ఈ కారు అనేక కుటుంబాల మొదటి ఎంపికగా నిలిచింది. అయితే గత కొంతకాలంగా సెలెరియో అమ్మకాల ధోరణి క్రమంగా తగ్గుతూ వస్తోంది. ప్రత్యేకంగా 2024 చివరి త్రైమాసికం నుంచి ఈ కారు అమ్ముడయ్యే సంఖ్యలో గణనీయమైన పడిపోవడం గమనార్హం. అక్టోబర్ నెలలో పరిస్థితి మరింత బలహీనంగా కనిపించింది. కంపెనీ దేశవ్యాప్తంగా కేవలం 1,322 యూనిట్లను మాత్రమే విక్రయించగలిగింది. ఇది గత సంవత్సరం ఇదే కాలంలో అమ్ముడైన 3,044 యూనిట్లతో పోలిస్తే చాలా తక్కువ.

ఈ రెండు గణాంకాలను పరిశీలించినప్పుడు, సెలెరియో అమ్మకాల పరిమాణం సంవత్సరానికి దాదాపు 57 శాతం తగ్గిపోయింది అని స్పష్టమవుతోంది. గత నెల (అక్టోబర్-2025)లో దీపావళి సీజన్ ఉన్నప్పటికీ, మారుతి సెలెరియో అమ్మకాలు పుంజుకోలేకపోవడానికి పలు ప్రధాన కారణాలు ఉన్నాయి. సాధారణంగా పండుగ కాలం ఆటోమొబైల్ మార్కెట్‌కు బంగారు అవకాశం. ఈ సమయంలో కార్ల అమ్మకాలు పెరగడం సహజం. కానీ సెలెరియో మాత్రం ఈ బూస్ట్‌ను పూర్తిగా కోల్పోయింది.

ప్రధానంగా, వినియోగదారుల కొనుగోలు ధోరణి మారడం ఒక పెద్ద కారణం. ప్రస్తుతం భారత మార్కెట్లో మిడ్-సైజు, కాంపాక్ట్ SUVల క్రేజ్ అమాంతం పెరిగిపోయింది. అదే బడ్జెట్‌లో, కొంచెం ఎక్కువ ఖర్చుతోనే మరింత స్పేస్, రోడ్ ప్రెజెన్స్, ఫీచర్లు అందించే SUVలు లభిస్తున్నాయి. దీంతో సహజంగానే హ్యాచ్‌బ్యాక్‌ల కంటే SUV మోడళ్లను ఎంచుకుంటున్నారు. మార్కెట్లో కొత్త మోడళ్ల ప్రవేశం, వినియోగదారుల ప్రాధాన్యత SUV తరహా వాహనాల వైపు మారడం ఒక కారణం.

సెలెరియోలో పెద్దగా మార్పులు లేకపోవడం అమ్మకాలపై ప్రభావం చూపినట్లు తెలుస్తోంది. పోటీ పెరుగుతున్న ఈ సమయంలో, సెలెరియోకు కొత్త అప్‌డేట్ లేదా ఆకట్టుకునే ఫీచర్లు అవసరం ఉన్నట్లు కనిపిస్తోంది. మొత్తానికి, ఒకప్పుడు సేల్స్ చార్ట్‌లో స్థిరమైన స్థానం దక్కించుకున్న ఈ హ్యాచ్‌బ్యాక్, ప్రస్తుతం తీవ్రమైన పోటీలో నిలబడటానికి కష్టపడుతోంది. కొత్త అప్‌డేట్లు, ఆకర్షణీయమైన ఫీచర్లు,రీడిజైన్ అవసరం ఉన్న ఈ సమయంలో, సెలెరియో భవిష్యత్తులో ఎలా తిరిగి పుంజుకుంటుందో చూడాలి.

మారుతి సెలెరియో మార్కెట్లోకి సరసమైన ధరలో లభించే ప్రాక్టికల్ హ్యాచ్‌బ్యాక్‌. దీనిని మధ్యతరగతి కుటుంబాలు సులభంగా కొనగలిగేలా కంపెనీ ధరలను చాలా పోటీగా ఉంచింది. ఎక్స్-షోరూమ్ ప్రకారం, దీని కనిష్ట ధర రూ. 4.70 లక్షలు, కాగా టాప్ వేరియంట్ ధర రూ. 6.73 లక్షల వరకు ఉంటుంది. ఈ రేంజ్‌లో, బడ్జెట్‌ను దృష్టిలో పెట్టుకునే వినియోగదారులు, సిటీ డ్రైవ్‌ కోరుకునే యువతకు ఇది మంచి ఎంపికగా నిలుస్తోంది.

పనితీరు పరంగా కూడా సెలెరియో శక్తివంతమైన 2-సిలిండర్ 1-లీటర్ పెట్రోల్ ఇంజిన్‌ను కలిగి ఉంది, ఇది 68.5 BHP శక్తిని, 91 Nm టార్క్‌ను ఉత్పత్తి చేస్తుంది. సిటీ-ట్రాఫిక్‌లో మృదువుగా నడిచేందుకు, అలాగే హైవేపై సరిపడే పవర్‌ను ఇవ్వడానికి ఈ ఇంజన్ సామర్థ్యం చాలుతుందనే చెప్పాలి. గేర్‌బాక్స్ ఎంపికల్లో కూడా వినియోగదారులకు సౌకర్యం కల్పిస్తూ, కంపెనీ 5-స్పీడ్ మాన్యువల్ మరియు 5-స్పీడ్ AMT (ఆటోమేటిక్) వేరియంట్లను అందిస్తోంది.

పెట్రోల్ వేరియంట్ 24.97 నుండి 26 kmpl వరకు మంచి మైలేజ్‌ను ఇస్తుంది, రోజువారీ ప్రయాణాల్లో ఖర్చును గణనీయంగా తగ్గిస్తుంది. దీనితో పాటు, 1-లీటర్ పెట్రోల్ + CNG వేరియంట్ కూడా లభిస్తుంది. ఇది 57 BHP పవర్, 82 Nm టార్క్ ఉత్పత్తి చేస్తుంది, 5-స్పీడ్ మాన్యువల్ గేర్‌బాక్స్‌తోనే వస్తుంది. ఈ CNG మోడల్ 34.43 km/kg వరకు అత్యధిక మైలేజ్ ఇస్తుంది, అంటే రోజువారీ ప్రయాణాలకు బెస్ట్.