దేశమంతా ఎదురుచూస్తున్న ఆ కారు.. చివరికి వచ్చేస్తోంది! ఆ రోజున రెడీగా ఉండండి!

భారతదేశంలో ఎలక్ట్రిక్ వాహనాల మార్కెట్ వేగంగా పెరుగుతున్న తరుణంలో, ప్రతి ఆటోమొబైల్ కంపెనీ కొత్త టెక్నాలజీలతో ముందుకు వస్తోంది. అలాంటి పరిస్థితుల్లో దేశంలోని ప్రముఖ కార్ల తయారీ సంస్థ మారుతి సుజుకి (Maruti Suzuki) కూడా తన మొదటి ఎలక్ట్రిక్ కారుతో ఆటో మార్కెట్లో కొత్త దిశను సృష్టించడానికి సిద్ధమవుతోంది. ఆ కారు పేరు మారుతి సుజుకి ఇ-విటారా (Maruti Suzuki E-Vitara). ఈ ఎలక్ట్రిక్ కారు గురించి గత కొద్ది నెలలుగా ఆటో అభిమానులలో, కస్టమర్లలో విపరీతమైన ఆసక్తి నెలకొంది. భారతీయ మార్కెట్లో ఇది మారుతి సుజుకి నుంచి వచ్చే తొలి ఎలక్ట్రిక్ SUV కావడం విశేషం. ఇప్పటివరకు కంపెనీ హైబ్రిడ్ మోడళ్లను మాత్రమే అందిస్తుండగా, ఈసారి మాత్రం పూర్తిగా ఎలక్ట్రిక్ సెగ్మెంట్‌లో అడుగుపెడుతోంది.

కస్టమర్లకు ఎప్పుడు అందుబాటులోకి వస్తుందో అనే ప్రశ్న చాలా కాలంగా ఉండగా, తాజాగా ఒక స్పష్టమైన సమాచారం బయటకు వచ్చింది. కార్‌టాక్ వెబ్‌సైట్ వెల్లడించిన వివరాల ప్రకారం, మారుతి సుజుకి ఇ-విటారా ఎలక్ట్రిక్ కారు డిసెంబర్ 2న భారత మార్కెట్లో అమ్మకానికి రానుంది. ఈ వార్త వెలువడిన వెంటనే దేశవ్యాప్తంగా ఉన్న ఆటో ప్రియులలో, ముఖ్యంగా మారుతి అభిమానులలో, ఉత్సాహం పెరిగిపోయింది.

ఇ-విటారా మోడల్ కేవలం ఎలక్ట్రిక్ కారు మాత్రమే కాదు, మారుతి సుజుకి బ్రాండ్ ఇమేజ్‌కి కొత్త మలుపు. ఇది రెండు వేరియంట్లలో 49 kWh, 61.1 kWh బ్యాటరీ ఆప్షన్లతో అందించబడనుంది. 49 kWh బ్యాటరీ సుమారు 345 కిలోమీటర్ల డ్రైవింగ్ రేంజ్ ఉంటుందని అంచనా. ఇది ప్రధానంగా నగర ప్రయాణాలకు సరిపడేలా డిజైన్ చేయబడింది. మరోవైపు, 61.1 kWh బ్యాటరీతో కూడిన మోడల్ రెండు డ్రైవ్ సిస్టమ్‌లలో అందించబడుతుంది.

ఫ్రంట్-వీల్ డ్రైవ్(FWD), ఆల్-వీల్ డ్రైవ్(AWD)లలో లభిస్తుంది. రెండు వేరియంట్లలో ఫ్రంట్-వీల్ డ్రైవ్ వెర్షన్ దాదాపు 425 కిలోమీటర్ల రేంజ్ అందిస్తే, ఆల్-వీల్ డ్రైవ్ వెర్షన్ రేంజ్ 395 కిలోమీటర్ల వరకు ఉంటుందని సమాచారం. ఇ-విటారా డిజైన్ పరంగా ప్రత్యేకతను కలిగి ఉంటుంది. ఇది ప్రస్తుత గ్రాండ్ విటారా SUV ఆధారంగా రూపొందించబడినా, ఎలక్ట్రిక్ వేరియంట్ కావడంతో పూర్తిగా కొత్త ఫ్రంట్ ఫేసియా, క్లోజ్డ్ గ్రిల్, బ్లూ యాక్సెంట్ ఫినిష్‌లు ఉంటాయి.

ఇక ఇంటీరియర్ విషయానికొస్తే, ఇది టెక్నాలజీతో నిండిన కాక్‌పిట్ లేఅవుట్‌ను కలిగి ఉంటుంది. పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, ఫుల్ డిజిటల్ డ్రైవర్ డిస్ప్లే, వైర్‌లెస్ ఆండ్రాయిడ్ ఆటో, యాపిల్ కార్‌ప్లే సపోర్ట్, 360-డిగ్రీ కెమెరా, ప్రీమియం సీట్ మెటీరియల్ వంటి ఫీచర్లను అందించే అవకాశం ఉంది. అంతేకాకుండా, సేఫ్టీ పరంగా కూడా కంపెనీ ఎలాంటి రాజీ పడలేదని తెలుస్తోంది. ఇందులో ADAS ఫీచర్లు కూడా ఉండొచ్చని సమాచారం.

దీని విడుదలతో మారుతి సుజుకి ఎలక్ట్రిక్ విభాగంలో అడుగుపెడుతోంది. గుజరాత్ రాష్ట్రంలోని మారుతి సుజుకి కర్మాగారంలో ఇ-విటారా ఎలక్ట్రిక్ కార్ల ఉత్పత్తి పూర్తి స్థాయిలో ప్రారంభమైంది. కంపెనీ ఈ వాహనాన్ని అత్యాధునిక ఎలక్ట్రిక్ వాహన తయారీ సదుపాయాల్లో తయారు చేస్తోంది. ముఖ్యంగా, గుజరాత్‌లోని హన్సల్‌పూర్ ప్లాంట్ వద్ద ఈ కార్ల ఉత్పత్తి జరుగుతోంది. భారతదేశంలో ఇంకా అధికారికంగా అమ్మకాలు ప్రారంభం కాకముందే, ఈ కారు అంతర్జాతీయ మార్కెట్లకు ఎగుమతి చేయబడుతోంది.

ముఖ్యంగా యూరప్, లాటిన్ అమెరికా, ఆఫ్రికా దేశాలకు మొదటి బ్యాచ్‌గా ఈ ఎలక్ట్రిక్ SUVs‌ను పంపడం ప్రారంభమైంది. ఇది మారుతి సుజుకి గ్లోబల్ ఎలక్ట్రిక్ వెహికల్ మార్కెట్లోకి తన మొదటి అడుగును ఉత్సాహంగా వేస్తోంది. భారత మార్కెట్లో మారుతి సుజుకి ఇ-విటారా ఎలక్ట్రిక్ కారు ధర విషయంలో కూడా ఆటో ప్రేమికులలో ఆసక్తి పెరుగుతోంది. ఎంట్రీ-లెవల్ వేరియంట్ ధర కేవలం రూ. 17 లక్షల(ఎక్స్-షోరూమ్) వద్ద ప్రారంభమయ్యే అవకాశం ఉంది.