కుటుంబ ప్రయాణాల కలను నిజం చేసే మారుతీ సుజుకీ కొత్త కారు.. SUVలలో ఎస్కుడో టైం మొదలైంది!

భారతీయ ఆటోమొబైల్ రంగంలో మారుతీ సుజుకీ (Maruti Suzuki) అతిపెద్ద కార్ల తయారీ దారుగా అవతరించింది. పోటీ పెరుగుతున్న కొద్ది కొత్త మోడళ్లను వరుసగా తీసుకొస్తుంది. తాజా సమాచారం ప్రకారం ఈసారి సంస్థ ఒక కొత్త SUV‌ను తీసుకురానుంది. గతంలో ఇది గ్రాండ్ విటారా ఆధారంగా వచ్చే 7-సీటర్ వెర్షన్‌గా భావించబడినప్పటికీ, ఈ మోడల్ ఇప్పుడు ఒక సరికొత్త 5-సీట్ల మధ్యతరహా SUVగా రూపుదిద్దుకుంటోంది. ఇటీవలి మీడియా సమావేశంలో మారుతి సుజుకీ ఛైర్మన్ ఆర్.సి. భార్గవ స్వయంగా ఈ SUV ప్రాజెక్ట్‌ను ధృవీకరించారు. ఈ ఆర్థిక సంవత్సరంలో ఈ వాహనాన్ని లాంచ్ చేయాలని కంపెనీ భావిస్తోంది. అయితే, ఇప్పటి వరకు సంస్థ ఈ కొత్త మోడల్ పేరును అధికారికంగా వెల్లడించలేదు. అయితే ప్రస్తుతం దీనిని 'Y17' అనే కోడ్‌నేమ్‌తో పిలుస్తున్నారు.

ఈ మోడల్‌ను 'మారుతీ ఎస్కుడో (escudo)' అని పిలవాలని భావిస్తున్నారు. ఈ కొత్త SUVపై ఆశలు ఎందుకు ఎక్కువగా ఉన్నాయంటే, మారుతీ గత కొద్ది సంవత్సరాలుగా SUV విభాగంలో తన ఉనికిని బలపరిచేందుకు ఎన్నో ప్రయత్నాలు చేస్తోంది. గ్రాండ్ విటారా మాదిరిగానే, ఈ కొత్త కారు ప్రీమియం SUV సెగ్మెంట్లో పోటీ పడేలా ఉండే అవకాశాలు ఉన్నాయి. మారుతీ ఎస్కుడో ఇప్పుడు కంపెనీ కీలకమైన మోడల్‌గా నిలవబోతుంది.

Y17 కోడ్‌నేమ్‌తో అభివృద్ధి చెందుతున్న ఈ కొత్త SUV, కంపెనీ లైనప్‌లో ఇప్పటికే ఉన్న బ్రెజ్జా కంటే అధికంగా ఉండే శ్రేణిలో, గ్రాండ్ విటారా కంటే కాస్త తక్కువగా ఉండనుందని తెలుస్తుంది. అంతేగాక, ఇది మధ్యతరహా SUV సెగ్మెంట్లో ఒక కొత్త ప్రత్యర్థిగా అవతరిస్తుందని పరిశ్రమ వర్గాలు అంచనా వేస్తున్నాయి. ఈ మోడల్ భారతదేశ SUV మార్కెట్‌ను మరింత విస్తరించేందుకు మారుతీ సుజుకీకి మరో వ్యూహాత్మక అడుగు అని చెప్పవచ్చు.

గత సంవత్సరం మారుతీ సుజుకీ భారతదేశంలో 'ఎస్కుడో' అనే పేరును ట్రేడ్‌మార్క్ చేసుకున్న విషయం ప్రత్యేకంగా చెప్పుకోవాలి. ఆసక్తికరంగా, ఇదే పేరు ఇప్పటికే గ్రాండ్ విటారాకు జపాన్‌ వంటి విదేశీ మార్కెట్లలో ఉపయోగించబడుతోంది. దీంతో, కొత్తగా రాబోతున్న Y17 మోడల్‌ను కూడా 'ఎస్కుడో'గా పిలిచే అవకాశాలు కనిపిస్తున్నాయి. ప్రముఖ మీడియా నివేదికల ప్రకారం, ఈ కొత్త SUV, పొడవు పరంగా గ్రాండ్ విటారాను మించే అవకాశం ఉంది.

దీని పొడవు సుమారు 4,345 మిల్లీమీటర్లుగా ఉండవచ్చని ఊహిస్తున్నారు. ఈ పొడవు, భారత మార్కెట్లో దక్షిణ కొరియా సంస్థల కాంపాక్ట్ SUVలైన హ్యుందాయ్ క్రెటా (4,330 mm), కియా సెల్టోస్ (4,365 mm)లతో దీటుగా పోటీ పడగలిగే స్థాయిలో ఉంటుంది. ఇంకా, మారుతీ సుజుకీ ఈ మోడల్‌ను కూడా గ్రాండ్ విటారాకు బేస్‌గా ఉన్న అదే గ్లోబల్-C ప్లాట్‌ఫామ్‌పై తయారుచేసే అవకాశాలు మెండుగా ఉన్నాయి.

ఇది మార్కెట్‌లో ఇప్పటికే ఉన్న సెల్టోస్ వంటి మోడళ్ల కంటే కొద్దిగా పొడవుగా ఉండనుంది. ప్రస్తుతం మారుతి సుజుకీ గ్రాండ్ విటారా 373 లీటర్ల బూట్ సామర్థ్యాన్ని అందిస్తుండగా, హ్యుందాయ్ క్రెటా 433 లీటర్ల విస్తృత స్థలాన్ని కలిగి ఉంది. వీటిని దృష్టిలో పెట్టుకొని, కొత్త మోడల్ మరింత బూట్ స్థలాన్ని అందించేలా రూపొందించబడనుంది. ఈ మోడల్, కుటుంబాల కోసం అనుకూలంగా ఉండేలా ప్లాన్ చేయబడింది.

డ్రైవ్‌స్పార్క్‌ తెలుగు వెబ్‌సైట్ ఆటోమొబైల్‌కి సంబంధించిన తాజా వార్తలను అందిస్తుంది. వివిధ సోషల్ మీడియాల ద్వారా సరికొత్త వార్తలను ఎప్పటికప్పుడు యూజర్లకు చేరవేస్తుంది. తాజా కార్ల వార్తలు, బైక్ వార్తలు, టెస్ట్ డ్రైవ్ రివ్యూల వీడియోల కోసం మా Facebook, Instagram, YouTube పేజీలతో కనెక్ట్ అవ్వండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు. ధన్యవాదాలు