టాటా మార్కెట్‌ను ఢీకొట్టే చవకైన కారు.. రూ.7 లక్షలకే మారుతి కొత్త ఎలక్ట్రిక్ హ్యాచ్‌బ్యాక్

భారతీయ ఎలక్ట్రిక్ కార్ల మార్కెట్‌లో రోజురోజుకు పోటీ తీవ్రమవుతోంది. ప్రస్తుతం టాటా మోటార్స్ ఈ విభాగంలో ఆధిపత్యం చెలాయిస్తున్నప్పటికీ, దేశంలోనే అతిపెద్ద కార్ల తయారీ సంస్థ అయిన మారుతి సుజుకి సంస్థ ఆ పట్టును సడలించేందుకు సిద్ధమవుతోంది. ముఖ్యంగా, తక్కువ ధరలో ఎక్కువ మందికి అందుబాటులో ఉండేలా ఒక చవకైన ఈవీ కారును తీసుకురావాలని మారుతి ప్లాన్ చేస్తోంది. ఈ ప్రణాళికలో భాగమే అక్టోబర్ 29న ప్రారంభమయ్యే జపాన్ మొబిలిటీ షోలో సుజుకి సంస్థ ప్రదర్శించనున్న వాహనాల వివరాలు.

సుజుకి విజన్ ఇ-స్కై
జపాన్ మొబిలిటీ షోలో సుజుకి ప్రదర్శించనున్న ముఖ్యమైన వాహనాల్లో సుజుకి విజన్ ఇ-స్కై ఎలక్ట్రిక్ (Suzuki Vision e-Sky Electric) ఒకటి. ఇది ఒక కాన్సెప్ట్ కారు అయినప్పటికీ, ఇది త్వరలోనే తయారీ దశకు చేరుకుని మార్కెట్‌లోకి వస్తుందని భావిస్తున్నారు. ఈ కారు డిజైన్ జపాన్ మార్కెట్‌లో బాగా ప్రాచుర్యం పొందిన పెట్రోల్ సుజుకి వాగన్ ఆర్ డిజైన్‌ను పోలి ఉంటుంది.

ముందు భాగంలో కొత్త లుక్, సీ ఆకారంలో ఎల్‌ఈడీ డే-టైమ్ లైట్లు ఉన్నాయి. వెనుకవైపు కూడా సీ ఆకారంలో టెయిల్‌లైట్లు, విశాలమైన విండ్‌స్క్రీన్ ఆకర్షణగా నిలుస్తాయి. ఈ కాన్సెప్ట్ కారు పొడవు 3,395 మిల్లీమీటర్లు, వెడల్పు 1,475 మిల్లీమీటర్లు, ఎత్తు 1,625 మిల్లీమీటర్లుగా ఉంది. ఇది జపాన్‌లోని చిన్న కార్ల నిబంధనలకు అనుగుణంగా ఉంది.

ఫీచర్ల విషయానికి వస్తే, ఇందులో 12 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ ఇన్‌స్ట్రుమెంట్ క్లస్టర్ ఉండవచ్చు. ఈ కారు డ్రైవింగ్ రేంజ్ 270 కిలోమీటర్లకు పైగా ఉంటుందని సుజుకి సంస్థ ధృవీకరించింది.

భారత్ మార్కెట్ లక్ష్యంగా eWX
సుజుకి విజన్ ఇ-స్కై కాన్సెప్ట్ జపాన్ కోసం ఉద్దేశించినప్పటికీ, మారుతి సుజుకి మాత్రం భారతదేశంలో మరొక సబ్-4 మీటర్ ఎలక్ట్రిక్ కారును విడుదల చేయడానికి సిద్ధమవుతోంది. ఆ కారే eWX ఎలక్ట్రిక్ హ్యాచ్‌బ్యాక్. ఈ మోడల్‌కు సంబంధించి భారతదేశంలో ఇప్పటికే కాపీరైట్ (పేటెంట్) నమోదు చేయబడింది. మారుతి సంస్థ ఈవీ తయారీ కోసం రూ. 10,000 కోట్లకు పైగా పెట్టుబడి పెడుతున్నట్టు సమాచారం.

ఈ కారు దేశంలో విడుదలైన తర్వాత, ప్రస్తుత మార్కెట్ నాయకులైన టాటా టియాగో ఈవీ (Tata Tiago EV), ఎంజి కామెట్ ఈవీ (MG Comet EV) వంటి వాటికి గట్టి పోటీ ఇవ్వనుంది. eWX కాన్సెప్ట్‌కి సుమారు 230 కిలోమీటర్ల రేంజ్ ఉండవచ్చని అంచనా. అయితే, ఈ కారు 35 kWh బ్యాటరీ ప్యాక్‌తో వస్తుందని, ఇది దాని ప్రత్యర్థుల కంటే దాదాపు రెట్టింపు రేంజ్ ఇవ్వగలదని కొన్ని నివేదికలు సూచిస్తున్నాయి. ఈవీ మార్కెట్‌లో ఇది అతి పెద్ద అడ్వాంటేజ్‌గా మారే అవకాశం ఉంది.

మారుతి సుజుకి సంస్థ తీసుకొస్తున్న ఈ కొత్త ఎలక్ట్రిక్ కారు అక్టోబర్ 2025 లేదా 2026-27 నాటికి భారత మార్కెట్‌లోకి రావచ్చని అంచనా. దీని ప్రారంభ ధర కేవలం రూ.7 లక్షల నుంచి రూ.8 లక్షల స్థాయిలో మాత్రమే ఉంటుందని భావిస్తున్నారు.

ఈ వ్యూహంతో మారుతి సుజుకి, కేవలం అధిక-ధర కలిగిన ఈవీల కంటే, సాధారణ వినియోగదారులకు అందుబాటులో ఉండేలా చవకైన ఈవీలను అందించి, భారత ఈవీ మార్కెట్లో కొత్త శకానికి తెర తీయాలని చూస్తోంది.