అప్పుడే కారు కోసం అప్పు చేయకండి.. కాస్త ఆగితే బెంజ్ కార్ల పై రూ.11 లక్షలు మిగిలే ఛాన్స్!

కొత్త కారు కొనాలనుకునేవారికి పండుగ వాతావరణం నెలకొంది. జీఎస్టీ రేట్ల తగ్గింపుతో కార్ల ధరలు కిందకు దిగొస్తున్నాయి. మామూలు కార్ల కంపెనీలే కాదు, మెర్సిడెస్ బెంజ్ వంటి లగ్జరీ బ్రాండ్లు కూడా తమ కార్ల ధరలను భారీగా తగ్గించాయి. మెర్సిడెస్ బెంజ్ ఏకంగా తమ కార్లపై రూ. 11 లక్షల వరకు ధర తగ్గించనున్నట్లు ప్రకటించింది. ఈ తగ్గింపు ఏ మోడల్‌పై ఎంత ఉంటుందో ఇప్పుడు వివరంగా చూద్దాం

కేంద్ర ప్రభుత్వం ఇటీవల జీఎస్టీ రేట్లను సవరించిన విషయం తెలిసిందే. ఈ నిర్ణయం సాధారణ కార్లతో పాటు లగ్జరీ కార్ల మార్కెట్‌పైనా భారీ ప్రభావాన్ని చూపింది. ప్రముఖ లగ్జరీ కార్ల తయారీ సంస్థ మెర్సిడెస్ బెంజ్ ఇండియా, ఈ జీఎస్టీ తగ్గింపు వల్ల తమకు వచ్చిన ప్రయోజనాన్ని పూర్తిగా వినియోగదారులకు బదిలీ చేస్తున్నట్లు ప్రకటించింది. ఈ సంచలన నిర్ణయంతో మెర్సిడెస్ బెంజ్ కార్ల ధరలు ఏకంగా రూ. 11 లక్షల వరకు తగ్గాయి.

దేశవ్యాప్తంగా సెప్టెంబర్ 22, 2025 నుండి ఈ కొత్త ధరలు అమలులోకి వస్తాయి. దీంతో మెర్సిడెస్ కారు కొనాలనుకునే కస్టమర్ల కల నెరవేరడం మరింత సులభం కానుంది. ఈ నిర్ణయం తమకు సంతోషాన్ని ఇచ్చిందని, కస్టమర్లకు మరింత అందుబాటు ధరలో కార్లను అందించడానికి ఈ అవకాశం ఉపయోగపడుతుందని కంపెనీ తెలిపింది.

గతంలో మెర్సిడెస్ బెంజ్ కార్లు 48 శాతం పన్నుల స్లాబ్‌లో ఉండేవి. కొత్తగా ప్రవేశపెట్టిన జీఎస్టీ 2.0 ప్రకారం, ఈ కార్లు ఇప్పుడు 40 శాతం పన్నుల స్లాబ్‌లోకి మారాయి. అంటే, లగ్జరీ కార్లపై సుమారు 8 శాతం పన్ను తగ్గింపు లభించింది. అయితే, మెర్సిడెస్ బెంజ్ ఎలక్ట్రిక్ కార్లపై ఉన్న 5 శాతం జీఎస్టీలో మాత్రం ఎలాంటి మార్పు లేదు. కాబట్టి, ఎలక్ట్రిక్ కార్ల ధరలు పాత ధరలకే అమ్ముడవుతాయని కంపెనీ స్పష్టం చేసింది. ఈ ధరల తగ్గింపు కేవలం పెట్రోల్, డీజిల్ మోడళ్లకు మాత్రమే వర్తిస్తుంది.

మెర్సిడెస్ బెంజ్ తన అత్యధికంగా అమ్ముడయ్యే ఎస్-క్లాస్ మోడల్‌పై అత్యధిక ధరల తగ్గింపును ప్రకటించింది. ఎస్-క్లాస్ S 450 4MATIC మోడల్‌పై గరిష్టంగా రూ.11 లక్షల తగ్గింపు లభిస్తుంది. దీని పాత ధర రూ.1.99 కోట్లు కాగా, ఇప్పుడు రూ.1.88 కోట్లకు లభించనుంది. గ్లోబల్ మార్కెట్‌లో బాగా అమ్ముడయ్యే GLS 450d AMG లైన్ మోడల్ ధర రూ.10 లక్షల వరకు తగ్గింది. దీని పాత ధర రూ.1.44 కోట్లు కాగా, ఇప్పుడు రూ.1.34 కోట్లకు లభించనుంది.

GLE 450 4MATIC పై రూ.8 లక్షల తగ్గింపు లభించనుంది. పాత ధర రూ.1.15 కోట్లు అయితే, ఇప్పుడు కేవలం రూ.1.07 కోట్లకు దొరుకుతుంది. E-క్లాస్ LWB 450 4MATIC ఇండియాలో బాగా అమ్ముడయ్యే మోడల్. దీనిపై రూ.6 లక్షల తగ్గింపు ఉంది. పాత ధర రూ.97 లక్షలు కాగా, ఇప్పుడు కేవలం రూ.91 లక్షలకు అందుబాటులో ఉంటుంది.

C-క్లాస్ 300 AMG లైన్ సెడాన్ ధరపై రూ.3.70 లక్షల తగ్గింపు లభించింది. పాత ధర రూ.68 లక్షలు కాగా, ఇప్పుడు రూ.64.30 లక్షలు. GLC 300 4MATIC SUV ధర రూ.5.30 లక్షల వరకు తగ్గింది. పాత ధర రూ.79.25 లక్షలు కాగా, ఇప్పుడు రూ.73.95 లక్షలకు లభిస్తుంది. ఎంట్రీ లెవెల్ A-క్లాస్ సెడాన్ పై కూడా రూ.2.60 లక్షల తగ్గింపు ఉంది. పాత ధర రూ.48.55 లక్షలు కాగా, ఇప్పుడు రూ.45.95 లక్షలకు దొరుకుతుంది. GLA 220d 4MATIC AMG లైన్ మోడల్‌పై రూ.3.80 లక్షల తగ్గింపు లభించింది. పాత ధర రూ.56.50 లక్షలు కాగా, ఇప్పుడు రూ.52.70 లక్షలు.

మెర్సిడెస్ బెంజ్ తీసుకున్న ఈ నిర్ణయం ఇతర లగ్జరీ కార్ల బ్రాండ్లైన బీఎమ్‌డబ్ల్యూ, ఆడి, జాగ్వార్ ల్యాండ్ రోవర్, వోల్వో వంటి వాటిపైనా ప్రభావం చూపే అవకాశం ఉంది. మార్కెట్లో పోటీని తట్టుకోవాలంటే, ఈ కంపెనీలు కూడా తమ కార్ల ధరలను తగ్గించే అవకాశాలున్నాయని మార్కెట్ నిపుణులు అంచనా వేస్తున్నారు. ఈ ధరల తగ్గింపు లగ్జరీ కార్ల మార్కెట్‌కు కొత్త ఊపునిస్తుందని భావిస్తున్నారు.