డిమాండ్ అలాంటిది... ఎంజీ కొత్త మోడల్స్ కావాలంటే వెయిట్ చేయక తప్పదు.. సింగిల్ ఛార్జ్‌పై 548 కి.మీ రేంజ్ మరి

లగ్జరీ బ్రాండ్‌ల జాబితాలో మోరిస్ గ్యారేజ్ (MG)కు మంచి స్థానం ఉంది. తమ వాహనాల్లో ఉండే ఫీచర్లు, ప్రయాణ సౌలభ్యంతో వినియోగదారుల మనసు గెలుచుకుంది. ఆటో ఎక్స్‌పోలో ప్రదర్శించిన సైబర్‌స్టర్ అనే 2-సీటర్ స్పోర్ట్స్ కారుకు, కొద్ది నెలల క్రితం విడుదల చేసిన ఎలక్ట్రిక్ ఎంపీవీ ఎంజీ M9 మోడల్‌కు ప్రజల్లో ప్రత్యేక ఆసక్తి ఉందని బ్రాండ్ విడుదల చేసిన నివేదికలో స్పష్టమవుతోంది.

ఎంజీ M9 EV లో 90kWh కెపాసిటీ గల నికెల్ మాంగనీస్ కోబాల్ట్ బ్యాటరీ ప్యాక్ అమర్చారు. లిథియం-అయాన్ ఫాస్ఫేట్ బ్యాటరీలతో పోలిస్తే, ఎలక్ట్రిక్ ఎంపీవీలోని NMC సెల్ కెమిస్ట్రీ అధిక శక్తి సాంద్రతను అందిస్తుంది. బ్రాండ్ ఇంటర్నల్ టెస్ట్ రిజల్ట్స్ ప్రకారం.. ఎంజీ M9 EV ఒక్క ఛార్జ్‌పై 548 కిలోమీటర్ల వరకు రేంజ్ ఇవ్వగలదు.

ఛార్జింగ్ విషయానికి వస్తే, 160kW DC ఫాస్ట్ ఛార్జర్ ఉపయోగించి ఎంపీవీని ఛార్జ్ చేయడానికి కేవలం 90 నిమిషాలు మాత్రమే పడుతుంది. ఇంట్లో లేదా ఆఫీసులో ఇన్‌స్టాల్ చేసుకోగలిగే 11kW AC ఛార్జర్ ఉపయోగించి 0-100 శాతం ఛార్జ్ చేయడానికి దాదాపు 10 గంటలు పడుతుంది.

ఇంటీరియర్ లోపలికి వెళ్లగానే బయటకు రావాలనిపించనంత లగ్జరీగా దీనిని డిజైన్ చేశారు. కానాక్ బ్రౌన్ రంగులో లెదర్, స్యూడ్ కలయికను M9 EV ఇంటీరియర్‌లో ఉపయోగించారు. 12.23 అంగుళాల టచ్‌స్క్రీన్, ఇన్‌స్ట్రుమెంటేషన్ పనులను నిర్వర్తించే 7 అంగుళాల డ్రైవర్ డిస్‌ప్లే వంటివి ఈ ఎలక్ట్రిక్ ఎంపీవీ లగ్జరీని మరింత పెంచుతాయి.

ముందు భాగంలో ఉన్న టచ్‌స్క్రీన్ వైర్‌లెస్ ఆపిల్ కార్‌ప్లే, ఆండ్రాయిడ్ ఆటో స్మార్ట్‌ఫోన్ కనెక్టివిటీకి కూడా సపోర్ట్ చేస్తుంది. అంతేకాకుండా, జెబిఎల్ సౌండ్ సిస్టమ్, ఎలక్ట్రికల్‌గా అడ్జస్ట్ చేయగల హీటెడ్, వెంటిలేటెడ్, మసాజ్ ఫంక్షన్లు ఉన్న డ్రైవర్, ప్యాసింజర్ సీట్లు, వైర్‌లెస్ ఛార్జర్, సింగిల్-ప్యానెల్ సన్‌రూఫ్, డ్రైవ్ మోడ్‌లు, డిజిటల్ ఐఆర్‌విఎం, పీఎం 2.5 ఎయిర్ ఫిల్టర్ వంటి అద్భుతమైన ఫీచర్లను కూడా ఎంజీ M9 EV లో అందిస్తున్నారు.

ఇక 2-సీటర్ స్పోర్ట్స్ కారు అయిన సైబర్‌స్టర్ విషయానికి వస్తే, ఇది ఎంజీ నుంచి వచ్చిన ఒక అద్భుతమైన ఎలక్ట్రిక్ స్పోర్ట్స్ కారు. ఆసియాలో అత్యంత వేగవంతమైన కారుగా ఎంజీ సైబర్‌స్టర్ ల్యాండ్ స్పీడ్ రికార్డు సృష్టించడం పెద్ద వార్త అయ్యింది. ఎంజీ సెలక్ట్ అనే ప్రత్యేక డీలర్‌షిప్‌ల ద్వారా దీనిని విక్రయిస్తామని బ్రాండ్ ముందే ప్రకటించింది.

మోటార్లు ప్రతి ఆక్సిల్‌కు అమర్చబడి ఉండటంతో నాలుగు చక్రాలకు ఒకేసారి పవర్ అందించగలదు. తాజా ఎంజీ సైబర్‌స్టర్ 528 bhp పవర్ తో 725 Nm టార్క్‌ను ఉత్పత్తి చేయగలదని కంపెనీ చెబుతోంది. కేవలం 3.2 సెకన్లలో 0 నుంచి 100 కిలోమీటర్ల వేగాన్ని అందుకోగలదు, కాబట్టి జెట్ స్పీడుతో దూసుకుపోతుందనడంలో సందేహం లేదు.

77 kWh లిథియం అయాన్ బ్యాటరీ ప్యాక్ ఎంజీ సైబర్‌స్టర్‌కు గుండెకాయ. ఇది సింగిల్ ఛార్జ్‌పై 570 కిలోమీటర్ల వరకు రేంజ్ ఇవ్వగలదు. గ్లోబల్ మార్కెట్లో బ్రాండ్ రియర్-వీల్ డ్రైవ్ వెర్షన్‌ను కూడా విక్రయిస్తున్నప్పటికీ, ఇది భారతదేశానికి రాదు. 64 kWh బ్యాటరీ ప్యాక్ అమర్చిన మోడల్ 519 కిలోమీటర్ల రేంజ్‌ను అందిస్తుందని కంపెనీ చెబుతోంది.

దీనిలోని ఎలక్ట్రిక్ మోటార్ 295 bhp పవర్ అవుట్‌పుట్‌ను ఉత్పత్తి చేయడానికి ట్యూన్ చేశారు. సైజ్ విషయానికి వస్తే, ఈ ఎంజీ ఎలక్ట్రిక్ స్పోర్ట్స్ కారు మొత్తం 4,533 మి.మీ. పొడవు, 1,912 మి.మీ. వెడల్పు, 1,328 మి.మీ. ఎత్తు, 2,689 మి.మీ. వీల్‌బేస్ కలిగి ఉంది. సేఫ్టీ, ఫీచర్ల పరంగా కూడా ఈ మోడల్ అద్భుతంగా ఉంటుంది. ఈ రెండు వాహనాలకు ఈ ఏడాది డిసెంబర్ నాటికి బుకింగ్‌లు ప్రారంభమవుతాయని సమాచారం.

డ్రైవ్‌స్పార్క్ అభిప్రాయం: ఎంజీ మోటార్ తమ కొత్త ఎలక్ట్రిక్ మోడల్స్ ఎం9 EV, సైబర్‌స్టర్‌తో భారత మార్కెట్లో సంచలనం సృష్టించడానికి సిద్ధంగా ఉంది. ఈ రెండు మోడల్స్ అందించే అధునాతన ఫీచర్లు, అద్భుతమైన రేంజ్, పర్ఫార్మెన్స్‌తో వినియోగదారులను ఖచ్చితంగా ఆకట్టుకుంటాయి. డబ్బులు రెడీ చేసుకుని వెయిట్ చేయండి.