ఫార్చ్యూనర్‌కు పోటీగా దించామన్నారు.. కనీసం 50మంది కూడా ఈ కారు కొనలేదు.. కారణమేంటి ?

ఎంజి మోటార్స్ హెక్టర్ ఎస్‌యూవీ ద్వారా భారతీయులకు బాగా పరిచయమైన కంపెనీ. మొదట్లో తమ హెక్టర్ ఎస్‌యూవీతో మంచి అమ్మకాలు సాధించి, ఎస్‌యూవీ సెగ్మెంట్‌లో తనకంటూ ఒక ప్రత్యేక స్థానాన్ని సంపాదించుకుంది. దేశంలో మొట్టమొదటి ఇంటర్నెట్ కనెక్టెడ్ ఎస్‌యూవీగా హెక్టర్ పేరు పొందింది. ఆ తర్వాత, డి-సెగ్మెంట్ ఎస్‌యూవీ శ్రేణిలో పట్టు సాధించడానికి ఎంజి, గ్లోస్టర్ అనే ఒక పెద్ద ఎస్‌యూవీని భారతదేశంలో విడుదల చేసింది.

వాస్తవానికి టయోటా ఫార్చ్యూనర్, ఫోర్డ్ ఎండీవర్ వంటి పెద్ద కార్లకు గట్టి పోటీ ఇవ్వడానికే గ్లోస్టర్‌ను మార్కెట్‌లోకి తెచ్చారు. కానీ, ఎంజి ఆశించినంత విజయాన్ని గ్లోస్టర్ సాధించలేకపోయింది. అసలు గ్లోస్టర్‌లో ఏముంది? ఎందుకు ఇలా జరిగింది? ఇప్పుడు వివరంగా తెలుసుకుందాం.

ఎంజి మోటార్స్ తమ హెక్టర్ ఎస్‌యూవీతో భారతదేశంలో మంచి గుర్తింపు పొందిన తర్వాత, పెద్ద ఎస్‌యూవీల మార్కెట్‌పై దృష్టి పెట్టింది. ఎంజి గ్లోస్టర్‌ను, టయోటా ఫార్చ్యూనర్, అప్పటివరకు మార్కెట్‌లో ఉన్న ఫోర్డ్ ఎండీవర్ వంటి కార్లకు పోటీగా విడుదల చేశారు. అయితే, ఎంజి ఆశించిన స్థాయిలో గ్లోస్టర్ విజయం సాధించలేకపోయింది.

ఫోర్డ్ ఎండీవర్ మార్కెట్ నుండి వెళ్లిపోయినప్పటికీ, ఆ స్థానాన్ని గ్లోస్టర్ భర్తీ చేయలేకపోయింది. ఇది ఒక మంచి ఫుల్-సైజ్ స్పోర్ట్ యూటిలిటీ వెహికల్ అయినప్పటికీ, భారతీయుల నుండి తగినంత ఆదరణ పొందలేకపోయిన ఒక అండర్‌రేటెడ్ డోన్ గానే మిగిలిపోయింది.

ఎంజి ఇప్పటికీ గ్లోస్టర్‌ను విక్రయిస్తోంది. కానీ జూన్ 2025 నెలవారీ అమ్మకాల గణాంకాలు కంపెనీని తీవ్రంగా నిరాశపరిచాయి. జూన్ 2025లో ఎంజి గ్లోస్టర్ కేవలం 34 యూనిట్లను మాత్రమే విక్రయించింది. జూన్ 2024లో 132 యూనిట్లు అమ్ముడవగా, ఈసారి దాదాపు 74.24% నష్టం నమోదైంది. ఇటీవల రూ.6 లక్షల వరకు ఆఫర్‌లు ప్రకటించినప్పటికీ, పెద్దగా కొనుగోలుదారులు ఆసక్తి చూపలేదు. త్వరలోనే గ్లోస్టర్‌కు ఫేస్‌లిఫ్ట్ అప్‌డేట్ ఇవ్వాలని కంపెనీ ప్లాన్ చేస్తోంది.

ప్రస్తుతం ఎంజి గ్లోస్టర్ ఎక్స్-షోరూమ్ ధరలు రూ.39.56లక్షల నుండి రూ.44.74లక్షల వరకు ఉన్నాయి. ఇందులో రెండు ఇంజిన్ ఆప్షన్లు ఉన్నాయి. 2.0 లీటర్ టర్బో డీజిల్.. ఇది 161 bhpపవర్, 375Nm టార్క్ ఉత్పత్తి చేస్తుంది. 2.0లీటర్ ట్విన్-టర్బో డీజిల్.. ఇది 215 bhp పవర్, 480 Nm టార్క్ ఉత్పత్తి చేస్తుంది. ఈ రెండు ఇంజిన్‌లు 8-స్పీడ్ ఆటోమేటిక్ ట్రాన్స్‌మిషన్‌తో జత చేయబడ్డాయి. ఇందులో మాన్యువల్ గేర్‌బాక్స్ ఆప్షన్ లేదు.

ముఖ్యమైన ఫీచర్ల విషయానికి వస్తే, గ్లోస్టర్ అధునాతన ఫీచర్లతో నిండి ఉంది. ఇందులో 12.3 అంగుళాల టచ్‌స్క్రీన్ ఇన్ఫోటైన్‌మెంట్ డిస్‌ప్లే, యాంబియెంట్ లైటింగ్, ప్రీమియం డాష్‌బోర్డ్, డ్యుయల్ పాన్ సన్‌రూఫ్, ఆటోమేటిక్ పార్కింగ్ అసిస్ట్, డ్రైవ్ మోడ్‌లు, 12-వే పవర్ అడ్జస్టబుల్ సీట్లు, లంబర్ అడ్జస్ట్‌మెంట్, సీట్ మెమరీ ఫంక్షన్, వెంటిలేటెడ్ సీట్లు, PM 2.5 ఎయిర్ ప్యూరిఫైయర్, ఆటో-డిమ్మింగ్ IRVM, 360-డిగ్రీ కెమెరా, 12-స్పీకర్ ప్రీమియం ఆడియో సిస్టమ్ ఉన్నాయి.

వీటితో పాటు, గ్లోస్టర్‌లో 30+ ఫీచర్లు ఉన్న ADAS టెక్నాలజీ, కనెక్టడ్ కార్ టెక్నాలజీ, బ్లైండ్‌స్పాట్ డిటెక్షన్ వంటి లెవెల్ 1 ఫీచర్లు, ఆటోమేటెడ్ ఎమర్జెన్సీ బ్రేకింగ్ (AEB), హీటెడ్ సీట్లు, వైర్‌లెస్ ఛార్జింగ్ కూడా ఉన్నాయి. టయోటా ఫార్చ్యూనర్‌లో లేని అనేక అత్యాధునిక ఫీచర్లు గ్లోస్టర్‌లో ఉండటం విశేషం.

గ్లోస్టర్‌లో 2WD లేదా 4WD కాన్ఫిగరేషన్ ఉంది, ఇది ఆఫ్-రోడింగ్ సామర్థ్యాలను పెంచుతుంది. వివిధ రకాల ప్రదేశాల్లో మెరుగైన ఆఫ్-రోడ్ సామర్థ్యాల కోసం బహుళ టెర్రైన్ మోడ్‌లు కూడా ఉన్నాయి. 4X4 డ్రైవ్‌ట్రెయిన్ సిస్టమ్ కేవలం ట్విన్-టర్బో వెర్షన్‌లో మాత్రమే అందుబాటులో ఉంది. అన్ని రకాల అధునాతన ఫీచర్లు, మంచి ఇంజిన్ ఆప్షన్లు ఉన్నప్పటికీ, ఎంజి గ్లోస్టర్ భారత మార్కెట్‌లో ఆశించినంత విజయం సాధించలేకపోవడం నిజంగా ఆశ్చర్యకరం.