ఈ కారు క్యాబిన్‌లో కూర్చుంటే విమానం నడుపుతున్న ఫీలింగ్..దీనిని కొనడానికి ఎగబడుతున్న జనం

ప్రస్తుతం భారతదేశంలో ఎలక్ట్రిక్ వాహనాల విప్లవం నడుస్తోంది. దీనికి నిదర్శనంగా 2025 అక్టోబర్ నెల కార్ల అమ్మకాల గణాంకాలు నిలుస్తున్నాయి. ఈ గణాంకాల ప్రకారం జేఎస్‌డబ్ల్యూ ఎంజీ మోటార్ ఇండియా మొత్తం అమ్మకాలు కొద్దిగా తగ్గినప్పటికీ, ఎలక్ట్రిక్ కార్ల విభాగంలో ఆ సంస్థ కొత్త రికార్డులను సృష్టిస్తోంది.

2025 అక్టోబర్‌లో ఎంజీ మొత్తం 6,397 కార్లను విక్రయించింది. ఇది అంతకుముందు సంవత్సరం 2024 అక్టోబర్‌లో అమ్ముడైన 7,045 కార్ల కంటే 9 శాతం తక్కువ. అయినప్పటికీ ఎంజీకి చెందిన విండ్‌సర్ ఈవీ మాత్రం సంస్థ అమ్మకాలలో కీలకంగా మారి, అద్భుతమైన వృద్ధిని సాధించింది.

ఎంజీ మోటార్ ఇండియా దేశంలో లక్ష ఎలక్ట్రిక్ వాహనాల అమ్మకాల మైలురాయిని అందుకోవడానికి విండ్‌సర్ ఈవీ ప్రధానంగా దోహదపడింది. గత నెలలో ఎంజీ కంపెనీ అమ్మిన అన్ని కార్ల మోడళ్లలో, విండ్‌సర్ ఈవీనే అత్యధికంగా అమ్ముడైన మోడల్‌గా నిలిచింది. 2025 అక్టోబర్‌లో విండ్‌సర్ ఈవీ అమ్మకాలు ఏకంగా 4,445 యూనిట్లుగా నమోదయ్యాయి.

ఈ సంఖ్య 2024 అక్టోబర్‌లో అమ్ముడైన 3,116 యూనిట్లతో పోలిస్తే, 43 శాతం భారీ వార్షిక వృద్ధిని సూచిస్తుంది. అయితే, 2025 సెప్టెంబర్ నెల అమ్మకాలతో పోలిస్తే (4,741 యూనిట్లు), నెలవారీ అమ్మకాలు మాత్రం 6 శాతం స్వల్పంగా తగ్గాయి. విండ్‌సర్ ఈవీ క్యాబిన్ విమానం కాక్‌పిట్‌ను తలపించేలా డిజైన్ చేసి ఉండడం, అది వినియోగదారులకు కొత్త అనుభూతిని ఇవ్వడమే ఈ రికార్డుల వెనుక ప్రధాన కారణం అని చెప్పవచ్చు.

విండ్‌సర్ ఈవీకి లభించిన భారీ ఆదరణను పురస్కరించుకుని ఎంజీ మోటార్ కంపెనీ 2025 అక్టోబర్‌లో విండ్‌సర్ ఇన్‌స్పైర్ అనే స్పెషల్ లిమిటెడ్ ఎడిషన్‌ను కూడా విడుదల చేసింది. కేవలం 300 యూనిట్లు మాత్రమే ఉన్న ఈ స్పెషల్ ఎడిషన్ విడుదల ద్వారా, ఏడాది లోపే 40,000 యూనిట్ల విండ్‌సర్ ఈవీ అమ్మకాల మైలురాయిని చేరుకున్న సందర్భంగా కంపెనీ సంబరాలు చేసుకుంది.

ఈ కారు ఐదు వేర్వేరు మోడల్స్‌లో అందుబాటులో ఉంది.. ఎక్సైట్ (38kWh), ఎక్స్‌క్లూజివ్ (38kWh), ఎసెన్స్ (38kWh), ఎక్స్‌క్లూజివ్ ప్రో (52.9kWh), ఎసెన్స్ ప్రో (52.9kWh).

విండ్‌సర్ ఈవీకి ఇంత భారీ ఆదరణ లభించడానికి అత్యంత ముఖ్యమైన కారణం బ్యాటరీ-యాజ్-ఏ-సర్వీస్ (BaaS) స్కీమ్. ఈ స్కీమ్ ద్వారా కస్టమర్‌లు కారు కొనేటప్పుడు బ్యాటరీని కొనుగోలు చేయాల్సిన అవసరం లేకుండా, దానిని నెలవారీ సబ్‌స్క్రిప్షన్ ఆధారంగా అద్దెకు తీసుకోవచ్చు. దీనివల్ల కారు కొనడానికి మొదట్లో పెట్టే ప్రారంభ ధర (Ex-showroom Price) గణనీయంగా తగ్గిపోతుంది.

ఇది వినియోగదారులను ఎక్కువగా ఆకర్షిస్తోంది. BaaS ఆప్షన్ ఎంచుకున్నవారికి ఎక్సైట్ (38kWh) వేరియంట్ ధర రూ.10 లక్షల నుంచి మొదలవుతుంది. దీనికి కిలోమీటరుకు రూ.3.9 బ్యాటరీ అద్దె చెల్లించాలి. అలాగే ఎసెన్స్ ప్రో (52.9kWh) వేరియంట్‌కు అయితే రూ.13.31 లక్షలు ప్రారంభ ధర కిలోమీటరుకు రూ.4.5 సబ్‌స్క్రిప్షన్ ఛార్జ్ ఉంటుంది.

విండ్‌సర్ ఈవీ వేరియంట్లు అద్భుతమైన రేంజ్‌ను, పవర్ అందిస్తున్నాయి. స్టాండర్డ్ వేరియంట్లు 38 kWh బ్యాటరీ ప్యాక్ కలిగి ఉంటాయి. ఇవి ఒక్కసారి పూర్తిగా ఛార్జ్ చేస్తే 331 కిలోమీటర్ల వరకు ప్రయాణించగలిగే రేంజ్‌ను ఇస్తాయి. ఈ వేరియంట్లు 134 బీహెచ్‌పీ పవర్, 200 ఎన్ఎమ్ టార్క్‌ను ఉత్పత్తి చేస్తాయి.

కొత్తగా వచ్చిన ప్రో వేరియంట్లు 52.9 kWh అనే పెద్ద బ్యాటరీ ప్యాక్‌తో వస్తాయి. ఈ వేరియంట్లు ఒక్క ఛార్జ్‌పై ఏకంగా 449 కిలోమీటర్ల వరకు రేంజ్ ఇస్తాయని కంపెనీ పేర్కొంది. ఇది ఈ కారుకు మార్కెట్లో మరింత మంచి పేరు రావడానికి దోహదపడుతుంది.