ఫుల్ ట్యాంక్ డీజిల్‌తో 2,831 కిలోమీటర్లు.. గిన్నిస్ వరల్డ్ రికార్డు సృష్టించిన కారు

కొత్తగా కారు కొనే వారికి, ఇప్పటికే కారు వాడే వారికి మైలేజ్ అనేది పెద్ద ఆందోళన. తక్కువ ఖర్చుతో ఎక్కువ దూరం ప్రయాణించాలనేది అందరి కోరిక. అందుకే ఎక్కువ మైలేజీ ఉన్న కార్లను వెతికి మరీ కొనుగోలు చేయడం భారతీయుల సాధారణ అలవాటు. ఎక్కువ మైలేజ్ కావాలనుకునే వారు అప్పటికీ, ఇప్పటికీ ఎక్కువగా డీజిల్ మోడళ్లను కొంటారు.

వాహన మార్కెట్‌లో ఎలక్ట్రిక్ వాహనాలు ఆధిపత్యం చెలాయిస్తున్నప్పటికీ, డీజిల్ కార్ల పట్ల అందరికీ ప్రత్యేకమైన అభిమానం ఉంది. మంచి ఇంధన సామర్థ్యం దీనికి ప్రధాన కారణం. తాజాగా ఒక ఫుల్ ట్యాంక్ డీజిల్‌తో 2,831 కిలోమీటర్లు ప్రయాణించి ఒక కారు గిన్నిస్ వరల్డ్ రికార్డు సృష్టించింది.

గిన్నిస్ రికార్డు సాధించిన కారు టయోటా గానీ, మారుతి సుజుకి గానీ కాదు, అది స్కోడా కంపెనీకి చెందిన సూపర్బ్ సెడాన్. ఈ కారు ఒక ఫుల్ ట్యాంక్ డీజిల్‌తో ఏకంగా 2,831 కిలోమీటర్ల దూరం ప్రయాణించి గిన్నిస్ రికార్డును సొంతం చేసుకుంది. ఎగ్జిక్యూటివ్ సెడాన్‌లోని 2.0 లీటర్ టీడీఐ ఇంజిన్ ఈ ఘనతను సాధించింది. డీజిల్ మళ్లీ నింపకుండా అత్యధిక దూరం ప్రయాణించినందుకు కొత్త ప్రపంచ రికార్డును సూపర్బ్ నెలకొల్పింది.

హైబ్రిడ్ కాని పెట్రోల్ ఇంజిన్‌లు కలలో కూడా ఊహించలేని ఇంధన సామర్థ్యాన్ని డీజిల్ ఇంజిన్‌లు అందించగలవని దీని ద్వారా రుజువైంది. స్కోడా విడుదల చేసే 2.0 లీటర్ టీడీఐ స్టాక్ ఇంజిన్‌తోనే స్కోడా సూపర్బ్ గిన్నిస్ బుక్‌లో చోటు సంపాదించుకుంది. అంటే, దీనికి ఎలాంటి ప్రత్యేకమైన మార్పులు చేయలేదని అర్థం.

148 బీహెచ్‌పీ పవర్, గరిష్టంగా 360 ఎన్ఎమ్ టార్క్ ఉత్పత్తి చేసే ఈ 2.0 లీటర్ ఫోర్-సిలిండర్ టర్బో డీజిల్ ఇంజిన్‌కు 7 స్పీడ్ డీఎస్‌జీ గేర్‌బాక్స్ జత చేయబడి ఉంది. ఫ్రంట్-వీల్ డ్రైవ్‌తో వచ్చే స్కోడా సూపర్బ్ ఎసెన్స్ ట్రిమ్‌ను ఈ టెస్ట్ కోసం ఉపయోగించారు. దీని అధికారిక డబ్ల్యుఎల్‌టిపి ఇంధన వినియోగం 100 కిలోమీటర్లకు 4.8 లీటర్లు. ఇంత పెద్ద మోడల్ ఇంత మైలేజ్ ఇవ్వడం ఆశ్చర్యకరమని చెప్పాలి.

దాదాపు ఐదు మీటర్ల పొడవున్న ఈ ఎగ్జిక్యూటివ్ సెడాన్ మొత్తం 1.6 టన్నుల బరువు ఉంటుంది. స్కోడా సూపర్బ్ డీజిల్ సగటున 100 కిలోమీటర్లకు 2.61 లీటర్లు లేదా లీటర్‌కు 38.3 కిలోమీటర్ల ఇంధన సామర్థ్యాన్ని అందించింది. అయితే, ఈ పరీక్ష భారతదేశంలో జరగలేదు. అందుకే మంచి రోడ్లు, తక్కువ ట్రాఫిక్ గిన్నిస్ వరల్డ్ రికార్డును సాధించడంలో కీలక పాత్ర పోషించాయి.

ఈ ప్రయోగం పోలాండ్ నుండి జర్మనీ, ఫ్రాన్స్ మీదుగా, ఆపై నెదర్లాండ్స్, బెల్జియం, జర్మనీ మీదుగా తిరిగి ప్రయాణించే మార్గంలో నిర్వహించారు. ఈ రూట్‌లో ఉష్ణోగ్రతలు ఎక్కువగా చల్లగా ఉండి, కొన్నిసార్లు 1 డిగ్రీ సెల్సియస్ కంటే తక్కువగా ఉండేవి. ఈ కారణం వల్లే 66 లీటర్ల ఇంధనంతో కారు 2,831 కిలోమీటర్ల సింగిల్ ట్యాంక్ రేంజ్‌ను అందించగలిగింది. స్టాక్ కండిషన్‌లో సూపర్బ్‌కు 66 లీటర్ల ఇంధన ట్యాంక్ సామర్థ్యం ఉంది.

అయితే, రికార్డును సాధించడానికి గ్రౌండ్ క్లియరెన్స్‌ను 15 మిల్లీమీటర్లు తగ్గించడానికి 16 అంగుళాల అల్లాయ్ వీల్స్‌లోని తక్కువ-నిరోధకత గల టైర్లు, స్పోర్ట్‌లైన్ వేరియంట్ నుండి సస్పెన్షన్ స్ప్రింగ్‌లు మాత్రమే మార్చబడ్డాయి. డ్రైవర్ తన స్కోడా సూపర్బ్‌ను ఎక్కువ సమయం గంటకు 80 కిలోమీటర్ల వేగంతో నడిపాడు. ఫాబియా ఆర్‌ఎస్ ర్యాలీ2లో స్కోడా కోసం 2025 యూరోపియన్ ర్యాలీ ఛాంపియన్‌షిప్ గెలుచుకున్న పోలిష్ ర్యాలీ డ్రైవర్ మిక్కో మార్సిక్ ఈ ప్రయోగాన్ని చేపట్టారు.