ఆటోడ్రైవర్లను లక్షాధికారిగా మార్చేందుకు మార్కెట్లోకి కొత్త ఎలక్ట్రిక్ ఆటో..కిమీ రూపాయి కంటే తక్కువ ఖర్చు

మంత్ర ఎలక్ట్రిక్ (Montra Electric) అనే కంపెనీ, కొత్త ఎలక్ట్రిక్ కార్గో ఆటోను (Electric Cargo Auto) తీసుకొచ్చింది. ఇది మామూలు పెట్రోల్/డీజిల్ ఇంజిన్ వాహనాలకు ఏ మాత్రం తీసిపోకుండా, వాటికి పోటీగా ఉండేలా తయారు చేశారు. ఈ కొత్త ఆటో గురించిన పూర్తి వివరాలను ఈ వార్తలో తెలుసుకుందాం.

మురుగప్పాస్ గ్రూప్లోని ఒక కంపెనీ అయిన మంత్ర ఎలక్ట్రిక్, మూడు చక్రాల ఎలక్ట్రిక్ వాహనాలను తయారుచేస్తుంది. ఇప్పుడు, సూపర్ కార్గో అనే పేరుతో లాస్ట్ మైల్ కార్గో ట్రాన్స్ పోర్ట్ కోసం ఒక కొత్త వాహనాన్ని తయారుచేసింది. ఈ వాహనాన్ని శనివారం ఢిల్లీలో విడుదల చేశారు.

ఈ సూపర్ కార్గో ఎలక్ట్రిక్ ఆటోలో 13.8 కిలోవాట్ అవర్ లిథియం అయాన్ బ్యాటరీ ప్యాక్ ఉంటుంది. కంపెనీ సర్టిఫై చేసిన దాని ప్రకారం.. ఇది 200 కిలోమీటర్ల రేంజ్ ఇస్తుంది. అంటే, ఒక్కసారి ఛార్జ్ చేస్తే 200 కి.మీ. దూరం వెళ్తుందన్నమాట. రియల్ లైఫ్ లో ఇది 170 కి.మీ.ల రేంజ్ ఇస్తుందని చెప్పారు.

ఈ వాహనం రూ.4.37 లక్షల ధరతో మార్కెట్‌లోకి వచ్చింది. ఒక యూనిట్ కరెంటుకు రూ.10 అనుకుంటే, 13.8 యూనిట్లకు రూ.138 అవుతుంది. అలా లెక్కేస్తే, ఒక కిలోమీటరుకు ఒక రూపాయి కన్నా తక్కువ ఖర్చు అవుతుంది. ఇది నిజంగా రవాణా చేసే వారికి చాలా తక్కువ ఖర్చు.

ఈ వాహనానికి 5 సంవత్సరాలు లేదా 1.75 లక్షల కిలోమీటర్ల వరకు వారంటీ ఇస్తున్నారు. ఇది 3 రకాల బాడీ టైప్‌లలో వస్తుంది. అవి: 170 క్యూబిక్ ఫీట్, 140 క్యూబిక్ ఫీట్, ట్రే డెక్ . అలాగే, ఇందులో 2 రకాల వేరియంట్లు ఉన్నాయి. అవి: ట్రే ఈక్యూఎక్స్, 170 క్యూబిక్ ఫీట్ ఈక్యూఎక్స్ డీ+.

ఈ వాహనంలో అమర్చిన మోటార్ 70 ఎన్ఎమ్ టార్క్, 11 కిలోవాట్ల పవర్‌ను ఉత్పత్తి చేయగలదు. ఈ వాహనంలో 1.2 టన్నుల (1200 కిలోలు) సరుకును ఎక్కించుకుపోవచ్చు. దీని ముందు చక్రాలకు డిస్క్ బ్రేక్‌లు ఉన్నాయి. ఇవి కాకుండా, హిల్ హోల్డ్, రివర్స్ అసిస్ట్, సీట్ బెల్ట్, రీజనరేటివ్ బ్రేకింగ్(బ్రేక్ వేసినప్పుడు బ్యాటరీ ఛార్జ్ అయ్యేది), రకరకాల డ్రైవ్ మోడ్‌లు వంటి ఫీచర్లు కూడా ఉన్నాయి.

ఈ వాహనం బోరాన్ స్టీల్ ఛాసిస్‌తో తయారు చేశారు. ఇందులో 6.2 అడుగుల పొడవైన లోడ్ ట్రే ఉంది. ఇది సొంతంగా వాహనం కొని నడుపుకునే వారికి, అలాగే చాలా వాహనాలను కొని రవాణా వ్యాపారం చేసే వారికి సరిపోయేలా తయారుచేశారు.

ఈ వాహనాన్ని ప్రస్తుతం మోంత్ర ఎలక్ట్రిక్ కంపెనీ ఇండియాలో ఏర్పాటు చేసిన 90 నగరాల్లో బుక్ చేసుకోవచ్చు. ఈ ఆటో చిల్లీ రెడ్, స్టీల్ గ్రే, ఇండియన్ బ్లూ, స్టాలియన్ బ్రౌన్ అనే రంగులలో లభిస్తుంది. ఈ వాహనం సరుకు రవాణా రంగంలో ఒక పెద్ద మార్పు తీసుకువస్తుందని ఆశిస్తున్నారు.

డ్రైవ్‌స్పార్క్ అభిప్రాయం: భారతదేశంలో సరుకు రవాణా వాహనాలు ఆర్థిక వ్యవస్థకు వెన్నెముక లాంటివి. ఈ నేపథ్యంలో, తక్కువ ఖర్చుతో రవాణా చేయడం అనేది చాలా ముఖ్యమైన అవసరం. ఈ అవసరాలను తీర్చే విధంగా ఈ వాహనం తయారుచేయబడింది. తక్కువ ఖర్చుతో, మంచి మైలేజ్‌తో వచ్చే ఈ ఎలక్ట్రిక్ కార్గో ఆటో ఖచ్చితంగా మార్కెట్‌లో మంచి విజయాన్ని సాధిస్తుంది.