దేశంలోనే చౌకైన కారు..పేదలు కూడా కొనగలిగే ధర..మైలేజ్ ఏకంగా 33కిమీ..కొనేందుకు ఎగబడుతున్న జనం

మారుతి సుజుకి అక్టోబర్ 2025లో 2 లక్షలకు పైగా యూనిట్ల విక్రయాలతో రికార్డులు సృష్టించింది. ఈ విజయంలో ఒకప్పటి అత్యంత చౌకైన కార్ల స్థానంలోకి వచ్చి, అందరి దృష్టిని ఆకర్షించిన కారు మారుతి ఎస్-ప్రెస్సో (S-Presso). కేంద్ర ప్రభుత్వం జీఎస్టీ 2.0 అమలు చేయడంతో చిన్న కార్లపై పన్ను తగ్గి, ఎస్-ప్రెస్సో ధర అమాంతం తగ్గిపోయింది. ఇప్పుడు ఈ కొత్త కారు ధర, మంచి కండిషన్‌లో ఉన్న సెకండ్‌ హ్యాండ్ స్విఫ్ట్ కారు ధరకే లభిస్తోంది. కేవలం రూ.3.50 లక్షలకే లభిస్తున్న ఈ ఎస్‌యూవీష్ కారు ధర, మైలేజ్, అక్టోబర్ అమ్మకాల వివరాలు ఇక్కడ చూద్దాం.

కేంద్ర ప్రభుత్వం చిన్న కార్ల పై జీఎస్‌టీని 28% నుంచి 18%కి తగ్గించింది. ఈ జీఎస్‌టీ 2.0 నిర్ణయం వల్ల మారుతి ఎస్-ప్రెస్సో ధర అమాంతం తగ్గింది. గతంలో రూ. 4.27 లక్షలు ఉన్న స్టాండర్డ్ (O) వేరియంట్ ధరలో ఏకంగా రూ. 77,000 తగ్గింపు వచ్చింది. బేస్ వేరియంట్ ధర ఇప్పుడు కేవలం రూ. 3.50 లక్షలు (ఎక్స్-షోరూమ్) మాత్రమే. దీనితో ఇది దేశంలోనే అత్యంత చవకైన కారుగా మారుతి ఆల్టో K10 స్థానాన్ని భర్తీ చేసింది.

ఎస్-ప్రెస్సో ఇప్పుడు మంచి కండిషన్‌లో ఉన్న సెకండ్‌ హ్యాండ్ స్విఫ్ట్ కొనే ధరకే లభిస్తోంది. ప్రస్తుతం ఎస్-ప్రెస్సోలోని అన్ని వేరియంట్లు కూడా, మారుతి ఆల్టోలోని సంబంధిత వేరియంట్ల కంటే రూ. 20,000 తక్కువకే లభిస్తున్నాయి. జీఎస్‌టీ తగ్గింపు, పండుగ ఆఫర్ల కారణంగా అక్టోబర్ 2025లో ఎస్-ప్రెస్సో అమ్మకాలు పెరిగాయి.

గత నెలలో 2,857 యూనిట్లు అమ్ముడవగా, గత సంవత్సరం అక్టోబర్ (2,139 యూనిట్లు)తో పోలిస్తే ఇది 33.57% వార్షిక వృద్ధిని సాధించింది. గత 6 నెలల్లో 2,500 యూనిట్ల మైలురాయిని దాటడం ఇదే మొదటిసారి. తక్కువ ధర మాత్రమే కాదు, ఇంధన సామర్థ్యం కూడా ఈ కారుకు పెద్ద హైలైట్.

పెట్రోల్ వేరియంట్లలో VXi(O) AGS వంటి అగ్ర వేరియంట్లు లీటరుకు 25.30 కి.మీ వరకు మైలేజీని అందిస్తాయి. ఇక సిఎన్‌జి వేరియంట్ల విషయానికి వస్తే, LXI (O), VXI (O) సిఎన్‌జి మోడల్స్‌కు ARAI ధృవీకరించిన మైలేజ్ కిలోకు 32.73 కి.మీ.గా ఉంది. ఈ మైలేజీ, ప్రీమియం బైక్‌ల కంటే కూడా ఎక్కువ కావడం విశేషం.

ఎస్-ప్రెస్సో ఒక ఎస్‌యూవీ లాంటి డిజైన్, మంచి గ్రౌండ్ క్లియరెన్స్‌తో వస్తుంది. ఇందులో 17.78 cm స్మార్ట్‌ప్లే స్టూడియో టచ్‌స్క్రీన్ ఇన్ఫోటైన్‌మెంట్ సిస్టమ్, ఆపిల్ కార్‌ప్లే, ఆండ్రాయిడ్ ఆటో వంటి ఫీచర్లు ఉన్నాయి. ఇందులో ఎలక్ట్రానిక్ స్టెబిలిటీ కంట్రోల్ (ESC), హిల్ హోల్డ్ అసిస్ట్, ఈబీడీతో కూడిన ఏబీఎస్, రివర్స్ పార్కింగ్ సెన్సార్లు వంటి సేఫ్టీ ఫీచర్లు కూడా ఉన్నాయి.

నోట్: ఆల్టో వంటి కార్లలో 6 ఎయిర్‌బ్యాగ్‌లను స్టాండర్డ్‌గా అప్‌డేట్ చేసినా, ఎస్-ప్రెస్సోలో మాత్రం చేయలేదు. అందుకే ఆల్టోతో పోలిస్తే దీని ధర తక్కువగా ఉంది. అయినప్పటికీ, తక్కువ మెయింటెనెన్స్ ఖర్చు, అత్యంత తక్కువ ధర కారణంగా ఇది వినియోగదారులను బాగా ఆకర్షిస్తోంది.