లక్షలాది మంది జీవితాలను మార్చబోతున్న టాటా.. కేవలం రూ.3.99లక్షలకే కొత్త ఏస్ ప్రో

టాటా మోటార్స్ అనేది మనదేశంలోని టాప్ కార్ల తయారీ సంస్థ. కార్ల అమ్మకాలలోనే కాదు.. కమర్షియల్ వాహనాల అమ్మకాల్లోనూ టాటా మోటార్స్ ముందు ఉంటుందన్న సంగతి అందరికీ తెలిసిందే. వాస్తవానికి మొదట్లో కమర్షియల్ వాహనాల అమ్మకాల్లో టాటా కంపెనీ ముందుండేది. ఆ నమ్మకంతోనే 1998లో కార్ల అమ్మకాల్లోకి అడుగుపెట్టింది. టాటా మోటార్స్ కమర్షియల్ వాహనాల్లో ప్రజల మధ్య బాగా పాపులర్ అయిన వాహనం టాటా ఏస్.

ముఖ్యంగా తక్కువ మోతాదులో వస్తువులను తీసుకెళ్లడానికి సరిపోయే వాహనంగా ఇండియా అంతటా టాటా ఏస్ చాలా మంది ప్రజల ఆదరణ పొందింది. అందుకే, ఏస్ వాహనంలో ఎప్పటికప్పుడు కొత్త వెర్షన్‌లను రిలీజ్ చేస్తూనే ఉన్న టాటా కంపెనీ ఇప్పుడు కొత్తగా ఏస్ ప్రో వాహనాన్ని మార్కెట్లోకి తెచ్చింది.

ఈ కొత్త ఏస్ ప్రో వాహనం ఎక్స్-షోరూమ్ ధర కేవలం రూ.3.99 లక్షల నుంచి మొదలవుతుంది. కొత్త టాటా ఏస్ ప్రో వాహనాన్ని గత జనవరి నెలలో ఢిల్లీలో జరిగిన భారతదేశపు అతిపెద్ద ఆటోమొబైల్ ఎగ్జిబిషన్ అయిన ఆటో ఎక్స్‌పోలో ప్రదర్శించారు.

ఆటో ఎక్స్‌పోలో పెట్రోల్ ఇంజిన్, సీఎన్‌జీ (CNG) ఆప్షన్లలోనే కాకుండా ఎలక్ట్రిక్ వెర్షన్‌లో కూడా కొత్త టాటా ఏస్ కనిపించింది. ఇప్పుడు ఆ అన్ని ఆప్షన్లలోనూ టాటా ఏస్ ప్రో వాహనం అమ్మకానికి అందుబాటులోకి వచ్చింది. భారతదేశంలో ఉన్న టాటా మోటార్స్ 1250 కమర్షియల్ వాహన డీలర్‌షిప్ షోరూమ్‌లలో దేనిలోనైనా కొత్త ఏస్ ప్రో వాహనాన్ని బుక్ చేసుకోవచ్చు.

లేదా, కమర్షియల్ వాహనాలను అమ్మడం కోసం టాటా మోటార్స్ ఏర్పాటు చేసిన 'ఫ్లీట్ వెర్స్' వెబ్‌సైట్‌లో కూడా కొత్త ఏస్ ప్రో వాహనం ఏ వేరియంట్‌నైనా బుక్ చేసుకోవచ్చని టాటా మోటార్స్ కంపెనీ ప్రకటించింది. ఏస్ ప్రో వాహనాన్ని కస్టమర్లు కొనుగోలు చేయడానికి వీలుగా భారతదేశంలోని చాలా ప్రముఖ బ్యాంకులు, ఆర్థిక సంస్థలతో టాటా మోటార్స్ ఒప్పందాలు కుదుర్చుకుంది.

కొత్త టాటా ఏస్ ప్రో వాహనం ప్రత్యేకతలు చూస్తే, ఈ వాహనంలో గరిష్టంగా 750 కిలోల వరకు బరువును తీసుకెళ్లొచ్చు. ఈ వాహనం 1.98 మీటర్ల పొడవు ఉన్న లోడింగ్ ప్రాంతం వివిధ రకాల వస్తువులను తీసుకెళ్లడానికి అనువుగా డిజైన్ చేయబడింది.

అంతేకాదు, కస్టమర్లు తమ అవసరాన్ని బట్టి హాఫ్ డెక్ లేదా ఫ్లాట్ బెడ్ ఆప్షన్‌లో కొత్త ఏస్ ప్రో వాహనాన్ని కొనుగోలు చేయొచ్చు. ఇది చాలా పటిష్టమైన ఛాసిస్‌తో తయారు చేయబడింది. కాబట్టి ఈ కొత్త ఏస్ వాహనం ఎలాంటి రోడ్డు మార్గంలోనైనా వెళ్లగలదు. వీటికంటే ముఖ్యంగా పెట్రోల్, సీఎన్‌జీ, ఎలక్ట్రిక్ అనే మూడు రకాల ఇంధన ఆప్షన్లలో ఏస్ ప్రోను ప్రవేశపెట్టారు.

పెట్రోల్ వేరియంట్‌లో గరిష్టంగా 30 హెచ్‌పీ పవర్, 55 ఎన్ఎమ్ టార్క్ ఉత్పత్తి చేయగల ఏస్ ప్రో లభిస్తుంది. సీఎన్‌జీ ఆప్షన్‌లోనూ ఇదే పెట్రోల్ ఇంజిన్ లభిస్తుంది. కానీ, ఏస్ ప్రో సీఎన్‌జీ వాహనాన్ని అధిక పీడనం కలిగిన సహజ వాయువుతో నడపొచ్చు.

అదే సమయంలో అత్యవసర పరిస్థితుల్లో ఈ సీఎన్‌జీ వాహనాన్ని పెట్రోల్‌లోనూ నడపొచ్చు. ఏస్ ప్రో ఎలక్ట్రిక్ వాహనంలో గరిష్టంగా 38 హెచ్‌పీ, 104 ఎన్ఎమ్ టార్క్ పవర్ ఉత్పత్తి చేయగల ఎలక్ట్రిక్ మోటార్‌ను అందించారు. ఇందులో అమర్చిన ఐపీ67 సర్టిఫైడ్ బ్యాటరీని ఒక్కసారి పూర్తిగా ఛార్జ్ చేస్తే గరిష్టంగా 155 కి.మీ.ల దూరం ప్రయాణించవచ్చు.