వచ్చే నెలలో మార్కెట్ పై SUVల దండయాత్ర.. కారు కొనాలంటే కొద్ది రోజులు ఆగండి.. బెస్ట్ కారు దొరకొచ్చు

భారతదేశంలో SUV మార్కెట్ రోజురోజుకూ బలంగా మారుతోంది. ఒకప్పుడు సెడాన్, హ్యాచ్‌బ్యాక్ కార్లకు ప్రాధాన్యత ఇచ్చిన ప్రజలు, ఇప్పుడు ఫ్యామిలీతో కలిసి ప్రయాణించడానికి, లాంగ్ డ్రైవ్‌లకు అనువుగా ఉండే SUV మోడల్స్‌ను ఎక్కువగా కోరుకుంటున్నారు. ముఖ్యంగా, కాంపాక్ట్ SUV సెగ్మెంట్‌కు భారీ డిమాండ్ ఉంది.

ప్రస్తుతం హ్యుందాయ్ క్రెటా, మారుతి సుజుకి బ్రెజా, టాటా నెక్సాన్ వంటి మోడల్స్ ఈ సెగ్మెంట్‌ను ఏలుతున్నాయి. అయితే ఈ ఆధిపత్యాన్ని చెరిపేయడానికి, వినియోగదారులకు మరింత గందరగోళాన్ని సృష్టించడానికి త్వరలో మరికొన్ని స్ట్రాంగ్ కొత్త SUVలు రంగంలోకి దిగబోతున్నాయి. ఆ మోడల్స్ ఏమిటో, వాటి ప్రత్యేకతలు ఏంటో చూద్దాం.

1. నెక్స్ట్-జెన్ కియా సెల్టోస్
కియా సెల్టోస్ ఇప్పటికే మార్కెట్‌లో తనకంటూ ఒక బలమైన స్థానాన్ని సంపాదించుకుంది. ఇప్పుడు రాబోతున్న నెక్స్ట్-జెన్ మోడల్ మరింత కొత్త అప్‌డేట్‌లతో SUV ప్రియులను ఆకర్షించడానికి సిద్ధమవుతోంది.

ఇది కొత్త ప్లాట్‌ఫామ్, మరింత ఆకర్షణీయమైన డిజైన్, మస్కులర్ బంపర్, టైగర్ నోస్ గ్రిల్, కొత్త LED లైట్లతో రానుంది. లోపల పెద్ద 12.3-అంగుళాల డ్యూయల్-స్క్రీన్, మెరుగైన కనెక్టెడ్ టెక్, 360 డిగ్రీల కెమెరా వంటి అడ్వాన్సుడ్ ఫీచర్లు ఉంటాయి.

సేఫ్టీ విషయంలో రాజీ లేకుండా ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్) ఫీచర్లు కూడా అందించే అవకాశం ఉంది. ప్రస్తుత 1.5-లీటర్ పెట్రోల్, టర్బో పెట్రోల్, డీజిల్ ఇంజిన్ ఆప్షన్స్‌తో పాటు, హైబ్రిడ్ టెక్నాలజీ కూడా ఇందులో చేర్చవచ్చని అంచనా.

2. మారుతి సుజుకి ఇ-విటారా
ఎలక్ట్రిక్ వాహనాల రంగంలో మారుతి సుజుకి ఈ ఇ-విటారా ఒక పెద్ద ముందడుగు. హార్టెక్ట్ (HEARTECT) ప్లాట్‌ఫామ్‌పై రూపొందించబడిన ఈ SUV, మరింత సేఫ్టీతో పాటు, బ్యాటరీకి పటిష్టమైన భద్రతను అందించేలా డిజైన్ చేశారు.

ఇందులో 49 kWh, 61 kWh అనే రెండు బ్యాటరీ ఆప్షన్లు ఉండవచ్చు. 61 kWh బ్యాటరీ ప్యాక్‌తో వచ్చే వేరియంట్ 172-174 bhp పవర్, 189 Nm టార్క్ అందిస్తుంది. ఇది ఏకంగా 500 కిలోమీటర్ల రేంజ్ ఇచ్చే అవకాశం ఉంది.

క్యాబిన్‌లో డ్యూయల్-స్క్రీన్ సెటప్, పెద్ద ఇన్ఫోటైన్‌మెంట్ సిస్టమ్, పనోరమిక్ సన్‌రూఫ్ వంటి ఫీచర్లు ఉంటాయని అంచనా. అంతేకాకుండా, లెవెల్-2 ADAS సేఫ్టీ సిస్టమ్, 7 ఎయిర్‌బ్యాగ్‌లు, 360-డిగ్రీ కెమెరా వంటివి భద్రతను మరింత పెంచుతాయి.

3. టాటా హారియర్, సఫారీ పెట్రోల్ వెర్షన్లు
గత రెండేళ్లుగా టాటా తన SUV పోర్ట్‌ఫోలియోను విస్తరిస్తోంది. వినియోగదారుల దీర్ఘకాల డిమాండ్‌ను దృష్టిలో ఉంచుకుని, టాటా హారియర్, టాటా సఫారీ పెట్రోల్ వెర్షన్లు రాబోతున్నాయి. ప్రస్తుతం ఈ రెండు మోడల్స్ డీజిల్ ఇంజిన్ ఆప్షన్లలో మాత్రమే అందుబాటులో ఉన్నాయి.

ఈ SUVలకు 1.5-లీటర్ టర్బో పెట్రోల్ ఇంజిన్ లభించే అవకాశం ఉంది (ఇది సియెరా కాన్సెప్ట్‌లో చూపించారు). ఈ ఇంజిన్ సుమారు 170 bhp పవర్, 280 Nm టార్క్ అందించగలదు. ఇది 6-స్పీడ్ మాన్యువల్, 6-స్పీడ్ ఆటోమేటిక్ ట్రాన్స్‌మిషన్ ఆప్షన్లతో వస్తుంది.

డిజైన్‌లో పెద్దగా మార్పులు లేకపోయినా, క్యాబిన్‌లో డ్యూయల్-స్క్రీన్ సెటప్, డిజిటల్ ఇన్‌స్ట్రుమెంట్ క్లస్టర్ ఉంటుంది. సేఫ్టీ కోసం హై-లెవల్ ADAS, 360-డిగ్రీ కెమెరా, ఎయిర్‌బ్యాగ్‌లు ఉంటాయి. పెట్రోల్ ఆప్షన్ రావడంతో టాటా మార్కెట్‌లో మరింత బలపడి, సెగ్మెంట్‌ను పాలిస్తున్న ఇతర బ్రాండ్‌లకు గట్టి పోటీ ఇవ్వనుంది.