జనవరి 2న అసలు సినిమా మొదలు..సెల్టోస్ దూకుడు చూస్తుంటే మార్కెట్ మడతపెట్టేలా ఉంది!

భారతీయ ఎస్‌యూవీ (SUV) విభాగంలో పెద్ద ప్రకంపనలు సృష్టించేందుకు కొత్త తరం కియా సెల్టోస్ సిద్ధమవుతోంది. దక్షిణ కొరియా వాహన తయారీ సంస్థ అయిన కియాకు దేశీయ మార్కెట్‌లో ఒక గుర్తింపు తెచ్చిన ఈ మోడల్, ప్రస్తుతం అమ్మకాలలో హ్యుందాయ్ క్రెటా, టయోటా అర్బన్ క్రూయిజర్ హైరైడర్, మారుతి విక్టోరిస్, మారుతి గ్రాండ్ విటారా వంటి వాటి వెనుక ఉంది.

అయితే ఈ న్యూజెన్ (New Gen) సెల్టోస్ తో మళ్లీ పాత వైభవాన్ని తిరిగి పొందాలని, మిడ్-సైజ్ ఎస్‌యూవీ సెగ్మెంట్‌లో పోటీని పెంచాలని కియా బలంగా నమ్ముతోంది. ఇటీవలే భారతదేశంలో ఈ కొత్త మోడల్‌ను పరిచయం చేశారు. ఇప్పుడు దీని ధర వివరాలు మాత్రమే వెల్లడికావాల్సి ఉంది.

కొత్త కియా సెల్టోస్ ధరను కంపెనీ 2026 జనవరి 2న ప్రకటించనుంది. ధరల ప్రకటనకు ముందే, ఈ న్యూజెన్ మోడల్ తయారీని కియా ప్రారంభించింది. కియా ఇండియా యొక్క ఆంధ్రప్రదేశ్‌లోని అనంతపూర్ ప్లాంట్‌లో కొత్త సెల్టోస్‌ను తయారు చేస్తున్నారు. ఈ వాహనం కోసం బుకింగ్‌లు డిసెంబర్ 11 నుంచే ప్రారంభమయ్యాయి.

కొనుగోలు చేయాలనుకునే వారు రూ.25,000 టోకెన్ అమౌంట్ చెల్లించి ఈ ఎస్‌యూవీని ప్రీ-బుక్ చేసుకోవచ్చు. జనవరి 2న ధర ప్రకటించిన తర్వాత, జనవరి మధ్య నాటికి డెలివరీలను ప్రారంభించాలని కియా యోచిస్తోంది. త్వరగా డెలివరీలు అందించడానికి వీలుగా ముందస్తుగా తయారీని మొదలుపెట్టింది.

ఈ న్యూజెన్ సెల్టోస్, మిడ్-సైజ్ ఎస్‌యూవీ సెగ్మెంట్‌లో అత్యంత పొడవైన మోడల్‌గా నిలవనుంది. కియా ప్రకారం దీని పొడవు 4,460 mm, వెడల్పు 1,830 mm మరియు వీల్‌బేస్ 2,690 mm వరకు ఉంటుంది. ఈ కొలతలు మెరుగైన ఇంటీరియర్ స్పేస్‌ను, ప్రయాణంలో మెరుగైన స్థిరత్వాన్ని అందిస్తాయి.

కొత్త మోడల్ కియా గ్లోబల్ K3 ప్లాట్‌ఫామ్‌పై నిర్మించబడుతున్న కియా ఇండియా మొట్టమొదటి మోడల్. ఈ ప్లాట్‌ఫామ్ అధిక నిర్మాణ దృఢత్వం (Structural Rigidity), సస్పెన్షన్ ట్యూనింగ్‌లో మార్పులు, తక్కువ ఎన్వీహెచ్ (NVH) స్థాయిలను (నాయిస్, వైబ్రేషన్, హార్ష్‌నెస్) అందిస్తుంది. డిజిటల్ టైగర్ ఫేస్, ఐస్ క్యూబ్ ఎల్‌ఈడీ ప్రొజెక్షన్ హెడ్‌ల్యాంప్‌లు, ఆటోమేటిక్ స్ట్రీమ్‌లైన్ డోర్ హ్యాండిల్స్, కొత్త అల్లాయ్ వీల్స్ దీని లుక్‌ను మరింత ఆకర్షణీయంగా మారుస్తాయి.

ఇంటీరియర్ (Interior) పరంగా కూడా న్యూజెన్ సెల్టోస్ చాలా ఆధునికంగా మారింది. ఇందులో 75.18 సెంటీమీటర్ల (సుమారు 29.6 అంగుళాలు) సైజులో ఉండే ట్రినిటీ పనోరమిక్ డిస్‌ప్లే, ప్రీమియం బోస్ 8-స్పీకర్ ఆడియో సిస్టమ్ ఉన్నాయి.

వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, కియా కనెక్ట్ 2.0, ఓటీఏ (OTA) అప్‌డేట్స్, సెగ్మెంట్ ఫస్ట్ స్మార్ట్ కీ ప్రాక్సిమిటీ అన్‌లాక్ ఫంక్షన్ వంటి ఫీచర్లు రోజువారీ సౌలభ్యాన్ని పెంచుతాయి. భద్రత కోసం ఇందులో 24 స్టాండర్డ్ సేఫ్టీ ప్యాకేజీతో పాటు, 21 ఆటోనమస్ ఫీచర్లతో కూడిన లెవెల్ 2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్) ను అందిస్తున్నారు.

కియా సెల్టోస్‌లో ప్రస్తుతం ఉన్న 1.5 లీటర్ ఎన్ఏ పెట్రోల్, 1.5 లీటర్ టర్బో-పెట్రోల్, 1.5 డీజిల్ అనే మూడు ఇంజిన్ ఆప్షన్లు అలాగే కొనసాగుతాయి. హైబ్రిడ్ ఇంజిన్ వస్తుందనే పుకార్లు ఉన్నప్పటికీ, ప్రస్తుతానికి దాన్ని పరిచయం చేయలేదు.

6-స్పీడ్ మాన్యువల్ లేదా సీవీటీ (CVT) ఆటోమేటిక్, ఐఎంటీ (iMT), 7 స్పీడ్ డీసీటీ (DCT) ఆటోమేటిక్ వంటి వివిధ గేర్‌బాక్స్ ఎంపికలు అందుబాటులో ఉన్నాయి. ఈ కొత్త తరం సెల్టోస్ రాకతో మిడ్-సైజ్ ఎస్‌యూవీ విభాగంలో పోటీ మరింత తీవ్రం అవుతుందని స్పష్టమవుతోంది.