ఇకపై ఆటోలు, బస్సులు అవసరం లేదు..నిసాన్ గ్రావైట్ ఉంటే ఊరంతా ఒకే కారులో వెళ్లొచ్చు.. ధర కూడా రూ.10ల్లోపే

భారత మార్కెట్లో మారుతి సుజుకి ఎర్టిగా వంటి దిగ్గజాలు ఆధిపత్యం చెలాయిస్తున్న మల్టీ పర్పస్ వెహికల్ (MPV) విభాగంలోకి జపాన్ తయారీ సంస్థ నిస్సాన్ (Nissan) అడుగుపెడుతోంది. కంపెనీ తన కొత్త సబ్-4 మీటర్ (4 మీటర్ల కంటే తక్కువ పొడవు) MPV మోడల్‌ను త్వరలో విడుదల చేయనుంది. దీనికి అధికారికంగా నిస్సాన్ గ్రావైట్ (Nissan Gravite) అనే పేరును ఖరారు చేశారు.

ఇది చాలా మందికి తెలిసినట్లుగానే, రెనో కంపెనీకి చెందిన విజయవంతమైన మోడల్ రెనో ట్రైబర్ (Renault Triber) ఆధారంగా రూపొందించబడింది. నిస్సాన్ మాగ్నైట్ మాదిరిగానే CMF-A+ ప్లాట్‌ఫారమ్‌పై నిర్మించబడుతున్న ఈ కొత్త MPV ధరల ప్రకటన, ఆవిష్కరణ కార్యక్రమం 2026 జనవరిలో జరగనుంది. కొత్త ఉత్పత్తి వ్యూహంలో భాగంగా రానున్న ఈ కారు, కేవలం మాగ్నైట్ మోడల్‌పై ఆధారపడి ఉన్న నిస్సాన్‌కు కొత్త ఉత్సాహాన్ని ఇస్తుందనడంలో సందేహం లేదు.

నిస్సాన్ గ్రావైట్ ప్రధానంగా తక్కువ ధరలో 7 సీటర్ కారును ఆశిస్తున్న వినియోగదారులను లక్ష్యంగా చేసుకుంటోంది. అందువలన ఈ మోడల్ రెనో ట్రైబర్‌తో పాటు, మారుతి సుజుకి ఎర్టిగా అమ్మకాలను కూడా దెబ్బతీయాలని యోచిస్తోంది. CMF-A+ ప్లాట్‌ఫారమ్‌పై తయారవుతున్న కారణంగా, ఈ కారు టాప్-ఎండ్ వేరియంట్ ఎక్స్-షోరూమ్ ధర కూడా రూ.10 లక్షల లోపే ఉండే అవకాశం ఉంది.

ఈ ధరతో నిస్సాన్ బడ్జెట్-ఫ్రెండ్లీ సెగ్మెంట్‌లో పటిష్టమైన స్థానాన్ని దక్కించుకోవాలని చూస్తోంది. లాంచ్ తర్వాత, 2026 మార్చిలో ఈ కారు షోరూమ్‌లలో అందుబాటులోకి వస్తుందని నిస్సాన్ ప్రకటించింది.

డిజైన్ పరంగా, గ్రావైట్ సాధారణంగా ట్రైబర్ ఆకృతిని పోలి ఉంటుంది. అయినప్పటికీ నిస్సాన్ దీనిని భిన్నంగా చూపించడానికి ప్రయత్నించింది. ఇందులో కొత్తగా డిజైన్ చేసిన ఫ్రంట్ బంపర్, కొత్త గ్రిల్, ప్రత్యేకమైన అల్లాయ్ వీల్ డిజైన్‌లు, విభిన్నమైన లైటింగ్ ఎలిమెంట్స్ ఉంటాయి. వెనుక భాగంలో కొత్తగా డిజైన్ చేసిన బంపర్, కొత్త టెయిల్-ల్యాంప్ సిగ్నేచర్లు, టెయిల్‌గేట్‌పై స్పష్టంగా రాసి ఉన్న GRAVITE అక్షరాలు కారుకు మరింత పదునైన రూపాన్ని ఇస్తాయి.

గ్రవైట్‌లో 1.0 లీటర్ నాచురల్లీ ఆస్పిరేటెడ్ పెట్రోల్ ఇంజన్ ఉపయోగించే అవకాశం ఉంది. ఇది 76hp పవర్, 95 Nm టార్క్‌ను ఉత్పత్తి చేస్తుంది. ఈ ఇంజన్ రెనో ట్రైబర్‌తో పాటు నిస్సాన్ మాగ్నైట్, రెనో కైగర్ తక్కువ వేరియంట్లలో కూడా అందుబాటులో ఉంది. ట్రాన్స్‌మిషన్ ఆప్షన్లలో 5-స్పీడ్ మాన్యువల్, 5-స్పీడ్ AMT (ఆటోమేటెడ్ మాన్యువల్ ట్రాన్స్‌మిషన్) ఉంటాయి. ట్రైబర్ మాదిరిగానే, డీలర్-ఫిట్టెడ్ సీఎన్‌జీ (CNG) కిట్ కూడా గ్రవైట్‌లో అందించే అవకాశం ఉంది.

ఇంటీరియర్‌ల గురించి పూర్తి సమాచారం లేనప్పటికీ, ట్రైబర్‌కు సమానమైన డ్యాష్‌బోర్డ్ లేఅవుట్, స్టీరింగ్ వీల్ ఉండే అవకాశం ఉంది. అయినప్పటికీ, నిస్సాన్ తనదైన రంగుల థీమ్, ప్రత్యేకమైన ఫీచర్లతో దీనిని భిన్నంగా చూపిస్తుంది. ఇందులో 7-అంగుళాల సెమీ-డిజిటల్ ఇన్‌స్ట్రుమెంట్ క్లస్టర్, 8-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఫోన్ ఛార్జింగ్, పుష్-బటన్ స్టార్ట్/స్టాప్, రెండవ, మూడవ వరుసల కోసం వెంట్‌లతో కూడిన మాన్యువల్ ఏసీ వంటి ఆధునిక ఫీచర్లు ఉండవచ్చు.

సేఫ్టీ విషయంలో గ్రవైట్‌లో స్టాండర్డ్ ఫీచర్‌గా 6 ఎయిర్‌బ్యాగులు, ఫ్రంట్, రియర్ పార్కింగ్ సెన్సార్లు, హిల్-స్టార్ట్ అసిస్ట్, టైర్ ప్రెషర్ మానిటరింగ్ సిస్టమ్ (TPMS), రియర్-వ్యూ కెమెరా వంటివి నిస్సాన్ అందించే అవకాశం ఉంది.