పెట్రోల్ పోయాల్సిన పనిలేదు... ఫ్యామిలీలతో జర్నీ ఎంజాయ్ చేసేందుకు వచ్చేస్తోంది కియా నయా మోడల్

ఇండియాలో 7-సీటర్ MPV సెగ్మెంట్‌లో కియా కారెన్స్ తన సత్తా చాటింది. మారుతి సుజుకి ఎర్టిగా, టయోటా ఇన్నోవా వంటి వాటితో పోటీపడి, తనదైన స్థానాన్ని సంపాదించుకుంది. ఇటీవల, కారెన్స్ క్లావిస్ పేరుతో కొత్తగా ముస్తాబై మార్కెట్‌లోకి వచ్చింది. పాత మోడల్ కన్నా మరింత ప్రీమియంగా వచ్చిన ఈ కియా 7-సీటర్‌ను ప్రజలు బాగా ఆదరించారు.

దీని వెంటనే కియా కారెన్స్ ఈవీ వెర్షన్‌ను కూడా విడుదల చేయనున్నట్లు అధికారికంగా ప్రకటించడంతో, ఎర్టిగా వంటి మోడల్‌ల మనుగడకే ప్రశ్నార్థకం ఏర్పడింది. ఇప్పుడు కియా తన ఎలక్ట్రిక్ MPV ఫస్ట్ లుక్ విడుదల చేసి అందరినీ ఆశ్చర్యపరిచింది. 2025 జూలై 15న దీని ధరను ప్రకటించనున్నారు. దీనికి ముందే కారు గురించి మరిన్ని వివరాలను కంపెనీ వెల్లడించింది.

భారతదేశంలో కియా విడుదల చేస్తున్న మొదటి మాస్-మార్కెట్ ఈవీ కావడంతో, దీని ధర తెలుసుకోవడానికి అందరూ ఎదురుచూస్తున్నారు. ధరను సుమారు రూ.20 లక్షలకు దగ్గరగా ఉంచగలిగితే, ఇది ఖచ్చితంగా హిట్‌ అవుతుంది.

డిజైన్ విషయానికి వస్తే.. కియా కారెన్స్ క్లావిస్ ఎలక్ట్రిక్, దాని పెట్రోల్ మోడల్‌కు దాదాపు సమానంగా ఉంటుందని మొదటి చూపులోనే ఎవరైనా అర్థం చేసుకోవచ్చు. అయితే, ఎలక్ట్రిక్ MPVలో కొన్ని ఈవీకి సంబంధించిన మార్పులు ఉంటాయి. ఉదాహరణకు, కొత్తగా డిజైన్ చేసిన ఫ్రంట్, రియర్ బంపర్లు, కొత్తగా డిజైన్ చేసిన అల్లాయ్ వీల్స్, ముందు భాగంలో ఛార్జింగ్ పోర్ట్ వంటివి ఉంటాయి.

బ్యాటరీ, ఎలక్ట్రిక్ మోటార్ల ఎక్స్ ట్రా వెయిట్ తట్టుకోవడానికి, సస్పెన్షన్ సెటప్ కూడా పెట్రోల్ వెర్షన్ నుండి భిన్నంగా ఉండే అవకాశం ఉంది. కారెన్స్ క్లావిస్ ఈవీ ఇంటీరియర్ కూడా దాదాపు అదే స్టైల్‌ను అనుసరిస్తుంది. వివిధ రంగులలో అప్‌హోల్‌స్టరీని ఉపయోగించడంతో పాటు, కియా కొన్ని కొత్తదనాలను కూడా తీసుకురావచ్చు.

సెంట్రల్ టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ ఇన్‌స్ట్రుమెంట్ క్లస్టర్‌తో కూడిన అదే 12.3 అంగుళాల ట్విన్-స్క్రీన్ సెటప్ ఎలక్ట్రిక్ MPVకి అందాన్ని పెంచుతుంది. ఫ్రంట్ వెంటిలేటెడ్ సీట్లు, పనోరమిక్ సన్‌రూఫ్, 4-వే ఎలక్ట్రికల్ అడ్జస్ట్‌మెంట్‌తో కూడిన డ్రైవర్ సీటు, ఎయిర్ ప్యూరిఫైయర్, వైర్‌లెస్ ఛార్జింగ్ , యాంబియంట్ లైటింగ్, బోస్ సౌండ్ సిస్టమ్, వైర్‌లెస్ ఆపిల్ కార్‌ప్లే, ఆండ్రాయిడ్ ఆటో వంటివి వాహనంలోని కొన్ని ముఖ్యమైన ఫీచర్లు.

సేఫ్టీ విషయంలో కూడా ఎలాంటి రాజీ ఉండదు. 6-ఎయిర్‌బ్యాగ్‌లు, నాలుగు డిస్క్ బ్రేక్‌లు, ఎలక్ట్రానిక్ స్టెబిలిటీ కంట్రోల్, వెహికిల్ స్టెబిలిటీ మేనేజ్‌మెంట్ , ట్రాక్షన్ కంట్రోల్, ఇబిడితో కూడిన ఏబిఎస్, హిల్ అసిస్ట్ కంట్రోల్ వంటి అద్భుతమైన సేఫ్టీ పరికరాలతో సరికొత్త కారెన్స్ క్లావిస్ ఈవీని మార్కెట్‌లోకి తీసుకురానుంది.

7-సీటర్ ఎలక్ట్రిక్ MPV టాప్ వేరియంట్‌లలో కియా లెవెల్ 2 ADAS అందిస్తుందా లేదా అనేది ఇంకా నిర్ధారించబడలేదు. కియా కారెన్స్ క్లావిస్ పెట్రోల్ వెర్షన్ టాప్ ఎండ్ వేరియంట్‌లలో 20 ఆటోనమస్ భద్రతా ఫీచర్లతో కూడిన లెవెల్ 2 ADAS సూట్ ఉంది కాబట్టి, ఎలక్ట్రిక్ కారులో కూడా ఈ ఫీచర్లు వస్తే అది చాలా బాగుంటుంది.

హ్యుందాయ్ క్రెటా ఎలక్ట్రిక్ నుండి 42kWh, 51.4kWh బ్యాటరీ ప్యాక్‌లతో కారెన్స్ క్లావిస్ ఈవీని మార్కెట్‌లోకి తీసుకురానున్నారు. ముందు ఆక్సిల్‌లో అమర్చిన సింగిల్ ఎలక్ట్రిక్ మోటార్ వాహనానికి ఎనర్జీని అందిస్తుంది. పవర్, టార్క్ వివరాలు క్రెటా ఈవీకి సమానంగా ఉండవచ్చు. అయితే, క్రెటా ఈవీతో పోలిస్తే MPV పొడవు ఎక్కువగా ఉన్నందున పర్ఫామెన్స్ కొంత తగ్గవచ్చు.

రాబోయే కియా కారెన్స్ ఈవీ క్లెయిమ్ చేసిన రేంజ్ 490 కిలోమీటర్లు అని కంపెనీ చెబుతోంది. ఇది క్రెటా ఎలక్ట్రిక్ 51.4kWh బ్యాటరీ ప్యాక్ వెర్షన్ కంటే 17 కిలోమీటర్లు ఎక్కువ. క్లావిస్ ఈవీలో ఎక్స్ ట్రా సీటింగ్ లేన్ అందించినప్పటికీ కియా ఈ రేంజ్‌ను ఎలా సాధించిందనేది తెలుసుకోవడానికి అందరికీ ఆసక్తిగా ఉంది. 42kWh బ్యాటరీ ప్యాక్ వేరియంట్‌ల రేంజ్ 390 కిలోమీటర్లు ఉంటుంది.

డ్రైవ్‌స్పార్క్ అభిప్రాయం: కియా కారెన్స్ ఈవీ భారతీయ మార్కెట్‌లో ఒక గేమ్ ఛేంజర్ కానుంది. ఎందుకంటే, 7-సీటర్ ఎలక్ట్రిక్ MPV సెగ్మెంట్‌లో ఇది ఒక కొత్త విభాగాన్ని క్రియేట్ చేస్తుంది. పెట్రోల్ ధరలు పెరుగుతున్న ఈ రోజుల్లో 490 కిలోమీటర్ల రేంజ్, రూ.20 లక్షల ధరతో వస్తే, ఇది ఫ్యామిలీలకు ఒక అద్భుతమైన ఆప్షన్ అవుతుంది.