కేవలం 2.7 సెకన్లలో 100 కి.మీ.. మార్కెట్లోకి దూసుకొచ్చిన సూపర్ లగ్జరీ స్పోర్ట్స్ కార్

స్పోర్ట్స్ కార్ల ప్రపంచంలో పోర్స్చే అనే పేరు తప్పక వినిపిస్తుంది. ఇది కేవలం ఒక ఆటోమొబైల్ బ్రాండ్ మాత్రమే కాదు, ప్రపంచవ్యాప్తంగా కార్ల అభిమానుల్లో ఒక భావోద్వేగం, ఒక కల, ఒక లెజెండ్‌. లగ్జరీ, పనితీరు మధ్య పరిపూర్ణత సాధించిన ఈ కంపెనీ, ప్రతి మోడల్‌లో కొత్తదనాన్ని, అధిక స్థాయి ఇంజినీరింగ్‌ను ప్రతిబింబిస్తుంది. అయితే, పోర్స్చే లైనప్‌లోని ప్రతి కారు అద్భుతమైనదే అయినప్పటికీ, 911 మోడల్‌కి ఉన్న గౌరవం మాత్రం మరెవ్వరికీ దక్కదు. ఇప్పుడు ఆ ప్రతీక మరో కొత్త అవతారంలో భారతీయ రోడ్లపైకి అడుగుపెడుతోంది, అదే 2025 పోర్స్చే 911 టర్బో ఎస్ (Porsche 911 Turbo s). ఈ కొత్త తరం 911 ధర రూ. 3.80 కోట్ల (ఎక్స్-షోరూమ్) వద్ద ప్రారంభమవుతోంది.

కంపెనీ సమాచారం ప్రకారం, ఈ హైపర్-పర్ఫార్మెన్స్ మోడల్‌కి సంబంధించిన డెలివరీలు 2026 మధ్యలో ప్రారంభమవుతాయి. దీని డిజైన్‌ వైపు చూస్తే, క్లాసిక్ 911 సిల్హౌట్‌ను కొనసాగిస్తూ, మరింత ఆగ్రెసివ్‌ ఫ్రంట్ ఫేసియా, ఎయిర్ ఇంటేక్‌లు, డైనమిక్ రియర్ స్పోయిలర్‌లతో మరింత స్పోర్టీ లుక్ ఇచ్చారు. ప్రీమియం లెదర్ సీట్లు, కార్బన్-ఫినిష్ ఇన్‌లేస్‌, సెంటర్‌లో ఉన్న హై-డెఫినిషన్ ఇన్ఫోటైన్‌మెంట్ డిస్‌ప్లే మొత్తం కాక్‌పిట్‌ను రేస్‌కార్ అనుభూతిని కలిగించేలా చేస్తాయి.

ఇంజిన్, 2025 పోర్స్చే 911 టర్బో ఎస్ పాత మోడల్‌తో పోలిస్తే నిజంగా ఒక పెద్ద అప్‌గ్రేడ్‌గా నిలిచింది. గత మోడల్‌లో ఉన్న 3.8 లీటర్ ట్విన్-టర్బో ఫ్లాట్-సిక్స్ ఇంజిన్ ఇప్పటికే అద్భుతమైన పనితీరును చూపింది, అయితే పోర్స్చే ఇంజినీర్లు ఈసారి మరింత స్మార్ట్, సమర్థవంతమైన ఇంజిన్ సాంకేతికతను తీసుకువచ్చారు. కొత్త టర్బో ఎస్‌లో ఉన్న 3.6 లీటర్ హైబ్రిడ్-సహాయక ఫ్లాట్-సిక్స్ ఇంజిన్ ఇప్పుడు కార్‌కి కొత్త ప్రాణం పోసినట్లే.

ఈ ఇంజిన్ కేవలం శక్తివంతమే కాదు, దీని హైబ్రిడ్ సిస్టమ్ ఇంధన వినియోగాన్ని గణనీయంగా తగ్గించి, ప్రతిసారీ డ్రైవింగ్ అనుభూతిని మరింత సాఫీగా, సమతౌల్యంగా చేస్తుంది. ఇది 711 PS పవర్, 800 Nm టార్క్ ఉత్పత్తి చేస్తుంది, అంటే పాత మోడల్‌తో పోలిస్తే మరింత శక్తివంతంగా మారింది. ఇంధన సామర్థ్యాన్ని పెంచడం కోసం పోర్స్చే హైబ్రిడ్ అసిస్ట్ టెక్నాలజీని సమర్థవంతంగా ఉపయోగించింది.

ఇది ఎలక్ట్రిక్ మోటార్, ఇంటెలిజెంట్ ఎనర్జీ మేనేజ్‌మెంట్ సిస్టమ్‌ల సాయంతో, సిటీలో డ్రైవ్ చేస్తున్నప్పుడు ఇంధన వినియోగాన్ని తగ్గిస్తుంది. హైవేపై ఉన్నప్పుడు పూర్తి శక్తిని అందిస్తుంది. ఫలితంగా, ఈ కారు ఇంధన సామర్థ్య పరంగా పాత 911 కంటే గణనీయమైన మెరుగుదలను సాధించింది. ఈ ఇంజిన్ 8-స్పీడ్ డ్యూయల్-క్లచ్ గేర్‌బాక్స్‌తో కుదుర్చబడి ఉంటుంది, దీని వల్ల కారు 0 నుండి 100 కి.మీ/గం వేగాన్ని కేవలం 2.7 సెకన్లలోనే చేరుతుంది.

ఇది ఎలక్ట్రానిక్‌గా నియంత్రిత ఆల్-వీల్ డ్రైవ్ సిస్టమ్‌ను కలిగి ఉండటంతో, ప్రతి రోడ్డు పరిస్థితుల్లోనూ అద్భుతమైన గ్రిప్, స్టెబిలిటీని అందిస్తుంది. 2025 పోర్స్చే 911 టర్బో ఎస్ వెనుక భాగంలో డిజైన్ పరంగా చేసిన మార్పులు దీన్ని మరింత శక్తివంతంగా, మరింత స్పోర్టీగా, ఎయిరోడైనమిక్ పరంగా సమతౌల్యంగా నిలబెట్టాయి. పోర్స్చే వెనుక భాగంలో ప్రధాన ఆకర్షణ డైనమిక్ ఎక్స్‌టెండబుల్ రియర్ వింగ్.

ఇది వేగాన్ని బట్టి ఆటోమేటిక్‌గా ఎత్తు, కోణాన్ని మార్చుకుంటుంది. దీని వల్ల హై-స్పీడ్ డ్రైవ్ సమయంలో కార్‌కు అదనపు డౌన్‌ఫోర్స్ లభిస్తుంది, తద్వారా రోడ్డు మీద మరింత స్థిరత్వం పొందుతుంది. అంతేకాదు, రియర్‌లో ఉన్న వెంటిలేషన్ ఓపెనింగ్‌లు ఇంజిన్‌ను చల్లగా ఉంచడంలో కీలక పాత్ర పోషిస్తాయి. అదే సమయంలో, కొత్త స్పోర్టియర్ బంపర్ డిజైన్ కార్‌కు మరింత ఆగ్రెసివ్ లుక్ ఇచ్చింది.