యూకే-భారత్ వాణిజ్య ఒప్పందం.. రేంజ్ రోవర్ స్పోర్ట్ ధర ఎంత తగ్గనుందో తెలుసా?

భారత్, యునైటెడ్ కింగ్‌డమ్ (యూకే) మధ్య చారిత్రాత్మక స్వేచ్ఛా వాణిజ్య ఒప్పందం (ఎఫ్‌టీఏ) ఖరారైంది. ఈ ఒప్పందం వల్ల యూకేలో తయారైన కార్ల ధరలు భారతదేశంలో గణనీయంగా తగ్గనున్నాయి. ఇది బ్రిటిష్ కార్ల తయారీదారులకు గొప్ప ప్రోత్సాహాన్నిస్తుంది. భారతీయ వినియోగదారులకు మరింత అందుబాటు ధరల్లో లగ్జరీ కార్లను కొనుగోలు చేసే అవకాశం లభిస్తుంది.

యూకే ప్రధాని కీర్ స్టార్మర్, భారత ప్రధాని నరేంద్ర మోదీ ఈ ఒప్పందాన్ని ప్రకటించారు. ఇది ఇరు దేశాల మధ్య వాణిజ్య సంబంధాలలో ఒక ముఖ్యమైన మైలురాయిగా చెప్పవచ్చు. ఈ ఒప్పందం కారు కొనుగోలుదారులకు కూడా ఎంతో లాభదాయకంగా ఉంటుంది. ఈ ఒప్పందం ప్రకారం యూకేలో తయారైన కార్లపై ప్రస్తుతం ఉన్న 100శాతం కంటే ఎక్కువ దిగుమతి సుంకాలు కేవలం 10శాతానికి పడిపోతాయి.

దీనివల్ల జాగ్వార్ ల్యాండ్ రోవర్, ఆస్టన్ మార్టిన్, బెంట్లీ, మెక్‌లారెన్, రోల్స్-రాయిస్ వంటి బ్రాండ్‌ల నుంచి వచ్చే ప్రీమియం, లగ్జరీ వాహనాలు భారతీయ కొనుగోలుదారులకు మరింత చేరువ అవుతాయి. ఈ సుంకాల తగ్గింపు వల్ల కార్ల ధరలు గణనీయంగా తగ్గే అవకాశం ఉంది. ఉదాహరణకు, ఇంతకు ముందు అధిక దిగుమతి సుంకాలు ఉన్న జాగ్వార్ ల్యాండ్ రోవర్ మోడల్ ధర ఇప్పుడు భారీగా తగ్గవచ్చు.

తద్వారా ఇది భారతీయ మార్కెట్‌లో మరింత పోటీనిస్తుంది. మూడు సంవత్సరాల సుదీర్ఘ చర్చల అనంతరం ఈ ఎఫ్‌టీఏ ఖరారైంది. ఈ ఒప్పందం వల్ల 2040 నాటికి ఇరు దేశాల మధ్య ద్వైపాక్షిక వాణిజ్యం సంవత్సరానికి 25.5 బిలియన్ పౌండ్ల మేర పెరుగుతుందని అంచనా వేస్తున్నారు. భారతీయ వినియోగదారులు యూకే నుంచి వచ్చే అనేక రకాల ఉత్పత్తులను మరింత సులభంగా పొందగలరు.

2024లో యూకే ఆటోమొబైల్ తయారీదారులు భారతదేశానికి రూ. 650 కోట్ల విలువైన మోటారు కార్లు, రూ. 30 కోట్ల విలువైన మోటార్‌సైకిళ్లు, రూ. 1,150 కోట్ల విలువైన ఆటో విడిభాగాలను ఎగుమతి చేశారు. ఈ ఒప్పందం భారతదేశంలోని అతిపెద్ద మార్కెట్‌ను యూకే ఆటోమొబైల్ సంస్థలకు పూర్తిగా తెరుస్తుంది.

100% కంటే ఎక్కువ నుండి 10శాతానికి దిగుమతి సుంకం తగ్గడం వల్ల యూకేలో తయారైన కార్ల ధరలు భారతదేశంలో చాలా వరకు తగ్గుతాయి. కోటా కింద లగ్జరీ వాహనాలపై అంచనా వేసిన ధరల తగ్గింపు ఆధారంగా కొన్ని ముఖ్యమైన మోడళ్ల ప్రస్తుత ధరలు, ఒప్పందం తర్వాత ఉండబోయే అంచనా ధరలు (ఎక్స్-షోరూమ్) కింద పేర్కాన్నాము.

ఆస్టన్ మార్టిన్ వాంక్విష్ ప్రస్తుతం సుమారు రూ. 8.85 కోట్లు ఉండగా, ఒప్పందం తర్వాత ఇది రూ. 4.86 కోట్లకు వచ్చే అవకాశం ఉంది. అలాగే, రేంజ్ రోవర్ స్పోర్ట్ ప్రస్తుత ధర రూ. 1.45 కోట్లు కాగా, ఒప్పందం తర్వాత ఇది సుమారు రూ. 79.75 లక్షలకు అందుబాటులోకి వచ్చే అవకాశం ఉంది.

రోల్స్-రాయిస్ కల్లినన్ ప్రస్తుతం రూ. 6.95 కోట్లు ఉండగా, ఇది రూ. 3.82 కోట్లకు తగ్గే అవకాశం ఉంది. ఇక బెంట్లీ బెంట్యాగా విషయానికి వస్తే, దాని ప్రస్తుత ధర రూ. 4.10 కోట్లు మరియు ఒప్పందం తర్వాత ఇది సుమారు రూ. 2.25 కోట్లకు లభించే అవకాశం ఉంది. ఇక్కడ ఇవ్వబడిన ధరలన్నీ పూర్తి సుంకం తగ్గింపు వినియోగదారులకు బదిలీ చేయబడుతుంది.

అయితే, పన్నులు, రవాణా ఖర్చులు, తయారీదారుల ధరల విధానాల వల్ల వాస్తవ ధరలు మారవచ్చు. కోటా వెలుపల ఉన్న లేదా సుంకం తగ్గింపుకు అర్హత లేని వాహనాల ధరలు తక్కువగా తగ్గే అవకాశం ఉంది.

ఈ ఒప్పందం ఇంకా పార్లమెంటరీ ఆమోదం పొందాల్సి ఉంది. ఇది ఒక సంవత్సరం లోపు వస్తుందని భావిస్తున్నారు. భారతీయ కారు కొనుగోలుదారులకు, మరింత సరసమైన ధరల్లో యూకే లగ్జరీ వాహనాలు అందుబాటులోకి వచ్చే అవకాశం ఒక గొప్ప శుభవార్త. యూకే ఆటోమొబైల్ తయారీదారులు ప్రపంచంలోనే అత్యంత వేగంగా అభివృద్ధి చెందుతున్న మార్కెట్లలో ఒకటైన భారతదేశంలో తమ స్థానాన్ని మరింత బలపరుచుకోనున్నారు.

రాబోయే రోజుల్లో మరిన్ని యూకే బ్రాండ్లు భారతీయ మార్కెట్‌లోకి ప్రవేశించే అవకాశం ఉంది. దీనివల్ల వినియోగదారులకు మరింత ఎక్కువ ఎంపికలు అందుబాటులో ఉంటాయి. అంతేకాకుండా, యూకే నుండి విడిభాగాల దిగుమతి సులభం కావడం వల్ల దేశీయంగా కార్ల తయారీ పరిశ్రమ కూడా కొంతవరకు లాభపడే అవకాశం ఉంది.