ఈ కారు ధర చాలా తక్కువ, పైగా 20 కి.మీ మైలేజ్.. జనాల డిమాండ్‌తో సంతోషంలో కంపెనీ

ఫ్రాన్స్‌కు చెందిన రెనాల్ట్ (renault) సంస్థ ప్రపంచవ్యాప్తంగా ప్రముఖ ఆటోమొబైల్ తయారీదారుగా గుర్తింపు పొందింది. భారతదేశంలో కూడా ఈ కంపెనీ తనకంటూ ప్రత్యేకమైన మార్కెట్‌ను ఏర్పరుచుకుని, వివిధ సెగ్మెంట్లలో కార్లను విజయవంతంగా విక్రయిస్తోంది. ముఖ్యంగా బడ్జెట్‌కు తగ్గ కార్లు, SUV లుక్తో వచ్చే మోడళ్లపై దృష్టి పెట్టిన రెనాల్ట్, భారత వినియోగదారుల అభిరుచులకు అనుగుణంగా తన ఉత్పత్తులను నిరంతరం అప్‌డేట్ చేస్తోంది. ఈ క్రమంలోనే గత ఆగస్టులో రెనాల్ట్ కొత్త లుక్‌తో కైగర్ (Kiger) SUVను మార్కెట్‌లోకి విడుదల చేసింది. ఇప్పటికే మంచి గుర్తింపు పొందిన ఈ మోడల్‌కు తాజా డిజైన్ అప్‌డేట్ మరింత ఆకర్షణను జోడించింది. కొత్త రూపంలో వచ్చిన రెనాల్ట్ కైగర్ SUV ప్రస్తుతం మార్కెట్‌లో మంచి ఊపు మీద ఉంది.

వినియోగదారుల నుంచి వచ్చిన స్పందన చూస్తే, ఈ కారు మళ్లీ ఒకసారి రెనాల్ట్‌కు బలమైన అమ్మకాల ఆధారంగా మారుతున్నట్లు స్పష్టంగా తెలుస్తోంది. దీనికి నిదర్శనంగా, నవంబర్ నెలలో నమోదైన అమ్మకాల గణాంకాలు నిలుస్తున్నాయి. గత నవంబర్‌లో రెనాల్ట్ కైగర్ మొత్తం 1,151 యూనిట్లు వినియోగదారులకు డెలివరీ చేయబడాయి. ఇదే సమయంలో, 2024 నవంబర్‌లో ఈ మోడల్ 779 యూనిట్ల అమ్మకాలకే పరిమితమైంది.

ఈ రెండు గణాంకాలను పోల్చి చూస్తే, ఏడాది కాలంలో కైగర్ అమ్మకాలు ఏకంగా 47.75 శాతం పెరిగినట్లు తెలుస్తోంది. ప్రస్తుత పోటీతో నిండిన SUV మార్కెట్‌లో ఇలాంటి వృద్ధి సాధించడం చిన్న విషయం కాదనే చెప్పాలి. నవంబర్ నెలలో రెనాల్ట్ కైగర్ అమ్మకాలు ఈ స్థాయిలో పెరగడానికి పలు కారణాలు ఉన్నాయని విశ్లేషకులు చెబుతున్నారు. ముఖ్యంగా, భారత వినియోగదారులలో SUVలపై పెరుగుతున్న ఆసక్తి దీనికి ప్రధాన కారణంగా నిలుస్తోంది.

అయితే, కైగర్‌ను ప్రత్యేకంగా నిలబెట్టే అంశం ఏమిటంటే, ఇది SUV అయినప్పటికీ సరసమైన ధరలో అందుబాటులో ఉండటం. పెద్ద SUVలకు ప్రత్యామ్నాయంగా, బడ్జెట్‌లో SUV లుక్, ఫీల్ కోరుకునే వినియోగదారులకు సరైన ఎంపికగా మారింది. ధరకు తగ్గట్టుగా ఫీచర్లు అందించడంలో కూడా రెనాల్ట్ కైగర్ వెనుకబడలేదు. స్టైలిష్ డిజైన్, టెక్నాలజీ, అవసరమైన భద్రతా ఫీచర్లు, రోజువారీ వినియోగానికి సరిపడే పనితీరు కలసి ఈ కారును వినియోగదారులకు మరింత ఆకర్షణీయంగా మార్చాయి.

కొత్త రెనాల్ట్ కైగర్ SUV భారత మార్కెట్‌లో వేరియంట్‌ను బట్టి ధర రూ. 5.76 లక్షల నుంచి ప్రారంభమై రూ. 10.34 లక్షల వరకు (ఎక్స్-షోరూమ్) ఉంటుంది. ఈ ధర శ్రేణిలో ఒక స్టైలిష్ SUV లుక్‌ను అందించడం కైగర్‌కు ప్రధాన బలంగా మారింది. మొదటి చూపులోనే ఆకట్టుకునేలా రూపొందించిన దీని డిజైన్ యువతతో పాటు ఫ్యామిలీ కార్ కొనుగోలుదారులనూ ఆకర్షిస్తోంది.

పవర్‌ట్రెయిన్ విషయంలో 1.0 లీటర్ నేచురల్లీ ఆస్పిరేటెడ్ పెట్రోల్ ఇంజిన్‌తో పాటు, ఎక్కువ పవర్ కోరుకునే వారికి 1.0 లీటర్ టర్బోచార్జ్డ్ పెట్రోల్ ఇంజిన్ ఆప్షన్ కూడా ఉంది. ఈ ఇంజిన్‌లకు 5-స్పీడ్ మాన్యువల్ గేర్‌బాక్స్, 5-స్పీడ్ ఆటోమేటిక్ గేర్‌బాక్స్, CVT ఆటోమేటిక్ ట్రాన్స్‌మిషన్ వంటి ఆప్షన్‌లు అందుబాటులో ఉన్నాయి. దీంతో డ్రైవింగ్ స్టైల్‌కు అనుగుణంగా వినియోగదారులు తమకు నచ్చిన వేరియంట్‌ను ఎంచుకోవచ్చు.

పనితీరు, మైలేజ్ పరంగా కూడా కొత్త కైగర్ మంచి సమతుల్యతను చూపిస్తోంది. ఈ SUV లీటర్‌కు సుమారు 19 నుంచి 20.38 కిలోమీటర్ల వరకు మైలేజీని అందిస్తుంది, ఇది ఈ సెగ్మెంట్‌లో ప్రశంసనీయం. అదే సమయంలో, పనితీరులో కూడా ఇది వెనుకబడదు. దీని గరిష్ట వేగం సుమారు 180 kmph కాగా, కేవలం 10.20 సెకన్లలోనే 0 నుంచి 100 kmph వేగాన్ని అందుకునే సామర్థ్యాన్ని కలిగి ఉంది.