రూ.5.14 లక్షలు, 6 ఎయిర్‌బ్యాగ్‌లు.. బడ్జెట్ కస్టమర్లకు బెస్ట్! అదరగొడుతున్న కొత్త క్విడ్ ఎడిషన్

రెనాల్ట్ క్విడ్ (Renault Kwid) భారతీయ ఆటోమొబైల్ రంగంలో ఒక ప్రత్యేకమైన స్థానం సంపాదించుకుంది. 2015లో తొలిసారి పరిచయం అయిన ఈ చిన్న హ్యాచ్‌బ్యాక్, తక్కువ ధరలో స్టైలిష్‌గా, SUV లాంటి లుక్‌తో అందుబాటులోకి రావడం వల్లే ఆటోమొబైల్ మార్కెట్‌లో గేమ్ ఛేంజర్‌గా నిలిచింది. బడ్జెట్‌ కస్టమర్లకు ఆధునిక ఫీచర్లు, ఆకర్షణీయమైన డిజైన్‌ అందించడం ద్వారా క్విడ్ ఎంట్రీ లెవల్ సెగ్మెంట్‌కి కొత్త నిర్వచనం ఇచ్చింది. ఈ ప్రయాణం ఇప్పుడు 10 సంవత్సరాల మైలురాయిని చేరుకుంది. భారతదేశంలో 5 చౌకైన కార్లలో ఒకటిగా గుర్తింపు పొందిన క్విడ్, ఈ 10 ఏళ్లలో లక్షలాది మంది కస్టమర్లను ఆకట్టుకుంది. దీనిని పురస్కరించుకుని, రెనాల్ట్ ఒక ప్రత్యేకమైన యానివర్సరీ ఎడిషన్‌ను లాంచ్ చేసింది.

ఈ లిమిటెడ్ ఎడిషన్ వెర్షన్‌లో సాధారణ మోడల్‌తో పోలిస్తే కొన్ని డిజైన్ మార్పులు, కొత్త ఫీచర్లు, అదనపు సౌకర్యాలు ఇచ్చారు. SUV తరహా స్టాన్స్ ఉన్న క్విడ్‌కు, ఈ చిన్నచిన్న మార్పులు మరింత ఆకర్షణీయతను తీసుకొచ్చాయి. ఈ ప్రత్యేక ఎడిషన్ టెక్నో వేరియంట్‌పై ఆధారపడి ఉండగా, కంపెనీ దీన్ని కేవలం 500 యూనిట్లకు మాత్రమే పరిమితం చేసింది. అంటే, చాలా తక్కువ మందికి మాత్రమే ఈ స్పెషల్ ఎడిషన్‌ దక్కనుంది.

ధర విషయానికి వస్తే, మాన్యువల్ వేరియంట్ రూ. 5.14 లక్షలు, AMT వేరియంట్ రూ. 5.63 లక్షలుగా ఎక్స్-షోరూమ్‌లో నిర్ణయించారు. ఈ రేంజ్‌లో లభించే ఫీచర్లను చూస్తే, ఇది బడ్జెట్ కస్టమర్లకు విలువైన ఆఫర్‌గా మారుతుంది. రెనాల్ట్ ఈ కారు ద్వారా మార్కెట్లో మంచి వాటాను సాధించింది. క్విడ్ లాంచ్ అయ్యే వరకు ఎంట్రీ లెవల్ కార్లు అంటే కేవలం లో బడ్జెట్, బేసిక్ ఫీచర్స్ అనే భావన ఉండేది.

కానీ క్విడ్ ఆ ఇమేజ్‌ను మార్చి, చిన్న కారు కూడా స్టైలిష్‌గా ఉండొచ్చు, టెక్నాలజీ పరంగా ముందుండొచ్చు అనే నమ్మకాన్ని కలిగించింది. ఈ 10వ వార్షికోత్సవ ఎడిషన్ ఆ సక్సెస్‌ను గుర్తు చేస్తూ, రెనాల్ట్ కస్టమర్లకు ఒక ప్రత్యేకమైన అనుభూతిని అందిస్తోంది. ఈ లిమిటెడ్ ఎడిషన్‌ను రెండు డ్యూయల్-టోన్ కలర్ స్కీమ్‌లలో బ్లాక్ రూఫ్‌తో ఫైరీ రెడ్, బ్లాక్ రూఫ్‌తో కొత్త షాడో గ్రేలలో అందిస్తున్నారు.

ఈ ప్రత్యేక కలర్ కాంబినేషన్‌లు క్విడ్‌కి ఒక స్పోర్టీ, స్టైలిష్ లుక్ ఇస్తాయి. అదనంగా, బ్లాక్ ఫ్లెక్స్ వీల్స్, డోర్లపై ఉన్న యానివర్సరీ డెకాల్స్, సి-పిల్లర్లపై డిటైలింగ్, పసుపు రంగు గ్రిల్ ఇన్సర్ట్ లాంటి అంశాలు ఈ ఎడిషన్‌ను సాధారణ వేరియంట్‌ల నుండి ప్రత్యేకంగా నిలిపేస్తాయి. ఇంటీరియర్‌లో అందంగా ఉంటుంది. స్టీరింగ్ వీల్, ఇన్ఫోటైన్‌మెంట్ సరౌండ్, డోర్ ట్రిమ్‌లలో ఇచ్చిన స్పెషల్ టచ్ ఈ ఎడిషన్‌ను మరింత ప్రీమియమ్‌గా చూపిస్తుంది.

అదనంగా ప్రకాశవంతమైన స్కఫ్ ప్లేట్లు, పుడిల్ ల్యాంప్‌లు వంటి ఫీచర్లు ఒక ప్రత్యేక అనుభూతిని ఇస్తాయి. ఈ చిన్న హ్యాచ్‌బ్యాక్‌లో ఇలాంటి ఫీచర్లు రావడం సర్ప్రైజ్. భద్రత విషయానికి వస్తే, రెనాల్ట్ మరింత శ్రద్ధ తీసుకుంది. అన్ని వేరియంట్‌లలో ఇప్పుడు మూడు పాయింట్ సీట్ బెల్టులు ప్రామాణికంగా అందిస్తున్నారు. అంతేకాకుండా, క్లైంబర్ వేరియంట్‌లో ఆరు ఎయిర్‌బ్యాగ్‌లు లభ్యమవుతాయి. ఈ అప్‌డేట్స్ వల్ల క్విడ్ అత్యంత సురక్షితమైన కార్లలో ఒకటిగా నిలుస్తోంది.