రూ.5 లక్షలకే ఎలక్ట్రిక్ కారు.. 225 కి.మీల రేంజ్! 5 మంది ఉన్న కుటుంబం వెళ్ళొచ్చు

రెనాల్ట్ భారత మార్కెట్లో తన నమ్మకాన్ని మళ్లీ నిరూపిస్తోంది. దేశీయంగా ఇప్పటికే క్విడ్, కైగర్, ట్రైబర్ వంటి మోడళ్లతో మంచి గుర్తింపును తెచ్చుకున్న ఈ కంపెనీ, ఇప్పుడు ఎలక్ట్రిక్ వాహన విభాగంలోకి అడుగుపెట్టడానికి సిద్ధమవుతోంది. పర్యావరణహిత వాహనాల డిమాండ్ పెరుగుతున్న నేపథ్యంలో, రెనాల్ట్ తన మొదటి ఎలక్ట్రిక్ హ్యాచ్‌బ్యాక్‌ను భారత మార్కెట్‌లోకి తీసుకురావడానికి సన్నాహాలు చేస్తోంది. విదేశీ మార్కెట్లలో ఇప్పటికే డాసియా స్ప్రింగ్ EV పేరుతో అమ్ముడవుతున్న ఈ కారు, భారత మార్కెట్లో క్విడ్ ఈవీ (Kwid Ev) గా రాబోతోందని సమాచారం. ఇటీవల ఈ ఎలక్ట్రిక్ హ్యాచ్‌బ్యాక్ రోడ్డు పరీక్షల సమయంలో కెమెరాలో చిక్కుకుంది. ఆ ఫోటోలు సోషల్ మీడియాలో వైరల్ అవుతున్నాయి.

చిత్రాలను దగ్గరగా పరిశీలిస్తే, కొత్త క్విడ్ EV డిజైన్‌లో గణనీయమైన మార్పులు కనిపిస్తున్నాయి. ముందుభాగంలో కొత్త ఫాసియా, ఫ్రంట్-మౌంటెడ్ ఛార్జింగ్ పోర్ట్, బ్లాక్ వీల్ ఆర్చ్ క్లాడింగ్, స్టైలిష్ ORVMలు (మిర్రర్లు), బ్లాక్ వీల్ హబ్‌క్యాప్‌లు స్పష్టంగా కనిపిస్తున్నాయి. ఇక, ఫ్రంట్‌లో పూర్తి వెడల్పు గల LED లైట్ స్ట్రిప్, డాసియా స్ప్రింగ్ EV తరహాలో బీఫీ బంపర్‌లు ఇవ్వబడి ఉండే అవకాశం ఉంది.

ఈ కారు మొత్తం లుక్ చిన్న హ్యాచ్‌బ్యాక్ అయినప్పటికీ, అద్భుతమైన స్టైల్, ఫ్యూచరిస్టిక్ టచ్‌ను కలిగి ఉంటుంది. అంతర్గతంగా కూడా ఈ కారు ప్రయాణికులకు తగినంత విస్తారమైన స్థలాన్ని అందిస్తుంది. 5 సీటర్ లేఅవుట్ ఉండే ఈ ఎలక్ట్రిక్ హ్యాచ్‌బ్యాక్‌లో ప్రయాణీకులు సులభంగా కదలాడే విధంగా సీటింగ్ ఏర్పాటు చేసినట్లు తెలుస్తోంది. పవర్‌ట్రెయిన్ విషయానికి వస్తే, ఇది డాసియా స్ప్రింగ్ EVలో ఉన్నట్లే శక్తివంతమైన సెటప్‌ను కలిగి ఉంటుంది.

ఇందులో 26.8 kWh బ్యాటరీ ప్యాక్ ఉండే అవకాశం ఉంది. ఒకసారి పూర్తిగా ఛార్జ్ చేస్తే, ఇది 225 కి.మీ వరకు రేంజ్ (మైలేజ్) అందిస్తుంది. ఈ కారు 33 kW ఫ్రంట్ వీల్ డ్రైవ్ (FWD) మోటార్ ద్వారా నడుస్తుంది. దీని గరిష్ట వేగం గంటకు 125 కి.మీగా అంచనా. అలాగే కేవలం 19.2 సెకన్లలో 0 నుండి 100 కి.మీ/గం వేగాన్ని చేరుకునే సామర్థ్యం కలిగి ఉంటుంది.

చార్జింగ్ వ్యవస్థ కూడా అత్యాధునికంగా ఉండబోతోంది. 30 kW DC ఫాస్ట్ ఛార్జర్ ద్వారా బ్యాటరీ ప్యాక్‌ను కేవలం 45 నిమిషాల్లో 20 నుండి 80% వరకు ఛార్జ్ చేయవచ్చు. దీంతో రోజువారీ ప్రయాణాలకు ఇది అత్యంత సౌకర్యవంతమైన ఎలక్ట్రిక్ కారు అవుతుంది. రెనాల్ట్ క్విడ్ EV మార్కెట్లోకి వచ్చిన వెంటనే టాటా Tiago EV, MG Comet EV వంటి మోడళ్లకు గట్టి పోటీ ఇవ్వబోతోందని విశ్లేషకులు భావిస్తున్నారు.

దేశీయంగా ఎలక్ట్రిక్ వాహనాల విభాగంలో పెరుగుతున్న పోటీని దృష్టిలో ఉంచుకుని, రెనాల్ట్ ఈ మోడల్ ధరను సుమారు రూ.5 లక్షలు ఉంటుందని అవకాశం. ఇప్పటి వరకు అందిన వివరాల ప్రకారం, ఈ ఎలక్ట్రిక్ హ్యాచ్‌బ్యాక్ మెరుగైన క్యాబిన్ డిజైన్‌‌తో పాటు అనేక ఆధునిక ఫీచర్లను కలిగి ఉండబోతోంది. ఇంటీరియర్‌ విషయానికి వస్తే, క్విడ్ EVలో కొత్తగా 10 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ అందుబాటులో ఉంటుంది.

ఇది ఆండ్రాయిడ్ ఆటో, యాపిల్ కార్‌ప్లే కనెక్టివిటీని సపోర్ట్ చేస్తుంది. అలాగే, డిజిటల్ డ్రైవర్ డిస్ప్లే, వైర్‌లెస్ స్మార్ట్‌ఫోన్ కనెక్టివిటీ, వైర్‌లెస్ ఛార్జర్ వంటి ఫీచర్లు డ్రైవర్‌కు ఆధునిక అనుభవాన్ని అందిస్తాయి. పవర్ విండోస్, ఆటోమేటిక్ క్లైమేట్ కంట్రోల్ (ఆటో AC) వంటి సౌకర్యాలు కూడా ఇందులో ఉంటాయని సమాచారం. ఈ కారులో 6 ఎయిర్‌బ్యాగులు, ESC, TPMS, రియర్ వ్యూ కెమెరా వంటి ఫీచర్లు ఉంటాయి.