ఎలక్ట్రిక్ కారుకు ఇంట్లో ఛార్జింగ్ పెడుతున్నారా.. అలా చేస్తే ఫ్రిడ్జ్, వాషింగ్ మెషీన్‌లు పాడవుతాయా?

భారతదేశంలో ఎలక్ట్రిక్ వాహనాల వాడకం వేగంగా పెరుగుతోంది. చాలా మంది ఎలక్ట్రిక్ కార్లు కొనుగోలు చేస్తున్నారు. అయితే, ఇంట్లో ఫాస్ట్ ఛార్జింగ్ చేసేటప్పుడు కొన్ని జాగ్రత్తలు తీసుకోకపోతే, ఇంట్లోని ఇతర ఎలక్ట్రానిక్ వస్తువులకు నష్టం జరగవచ్చు. ఈ సమస్య ఎందుకు వస్తుంది, దీనికి పరిష్కారం ఏంటో వివరంగా ఈ వార్తలో తెలుసుకుందాం.

సాధారణంగా మన ఇళ్లలో సింగిల్ ఫేజ్ కరెంట్ ఉంటుంది. ఇది గరిష్టంగా 4 kW వరకు విద్యుత్ శక్తిని అందిస్తుంది. అయితే, కొన్ని ఇళ్లకు, వ్యాపార సంస్థలకు త్రీ ఫేజ్ కరెంట్ కనెక్షన్ ఉంటుంది. దీని సామర్థ్యం గరిష్టంగా 112 kW వరకు ఉంటుంది.

ఎలక్ట్రిక్ కార్లతో పాటు వచ్చే హోమ్ ఛార్జర్‌లు సాధారణంగా సింగిల్ ఫేజ్ కరెంట్‌తో పనిచేస్తాయి. ఇవి నెమ్మదిగా కార్లు, బైకుల బ్యాటరీలను ఛార్జ్ చేస్తాయి. ఒక కారు పూర్తిగా ఛార్జ్ కావడానికి చాలా గంటలు పడుతుంది. ఎక్కువ వేగంగా కారును ఛార్జ్ చేయడానికి కంపెనీలు ఫాస్ట్ ఛార్జర్లను అదనపు యాక్సెసరీలుగా అమ్ముతుంటాయి. ఈ ఛార్జర్‌లు సాధారణంగా త్రీ ఫేజ్ కరెంట్ మీద మాత్రమే పనిచేస్తాయి.

త్రీ ఫేజ్ కరెంట్ అవసరమయ్యే ఫాస్ట్ ఛార్జర్‌ను మీరు సింగిల్ ఫేజ్ కరెంట్ ఉన్న ఇంట్లో అమర్చితే పెద్ద సమస్యలు ఎదురవుతాయి. ఛార్జర్‌ను ప్లగ్‌లో పెట్టిన వెంటనే ఇంట్లో ఫ్యూజ్ ఎగిరిపోతుంది. అంతేకాకుండా, ఆ సమయంలో కరెంట్‌కు కనెక్ట్ అయి ఉన్న ఫ్రిడ్జ్, వాషింగ్ మెషీన్, టీవీ వంటి ఇతర ఎలక్ట్రానిక్ వస్తువుల మీద అధిక విద్యుత్ భారం పడి, అవి పాడైపోయే ప్రమాదం ఉంది.

మీరు కొనే ఫాస్ట్ ఛార్జర్ సింగిల్ ఫేజ్ మీద పనిచేస్తుందా, లేదా త్రీ ఫేజ్ మీద పనిచేస్తుందా అని తెలుసుకోవడం చాలా సులభం. మీ ఛార్జర్ సామర్థ్యం 4 kW లోపు ఉంటే అది సింగిల్ ఫేజ్ కరెంట్‌తో పనిచేస్తుంది. మీ ఛార్జర్ సామర్థ్యం 4 kW కంటే ఎక్కువగా ఉంటే దానికి త్రీ ఫేజ్ కరెంట్ కనెక్షన్ తప్పనిసరి.

ఉదాహరణకు, ఒక 50 kWh బ్యాటరీ ఉన్న ఎలక్ట్రిక్ కారును 4 kW ఛార్జర్‌తో పూర్తిగా ఛార్జ్ చేయడానికి 10-12 గంటలు పడుతుంది. అదే 22 kW ఫాస్ట్ ఛార్జర్‌తో కేవలం 2-3 గంటల్లో ఛార్జ్ చేయవచ్చు.

ఫాస్ట్ ఛార్జర్‌ను కొనేటప్పుడు కొన్ని విషయాలు గుర్తుంచుకోవాలి. మీరు ఫాస్ట్ ఛార్జర్ కొనాలనుకుంటే, ముందుగా మీ ఇంట్లో ఉన్న కరెంట్ కనెక్షన్ సింగిల్ ఫేజా లేదా త్రీ ఫేజా అని నిపుణుడి సలహా తీసుకోవాలి. చాలా మంది త్రీ ఫేజ్ ఛార్జర్లు కొనేటప్పుడు ఈ సమాచారాన్ని అందిస్తారు.

ఛార్జర్ ఇన్‌స్టాల్ చేసే టెక్నీషియన్ కూడా మీకు సరైన సూచనలు ఇస్తారు. ఫాస్ట్ ఛార్జింగ్ సౌకర్యం కావాలంటే, త్రీ ఫేజ్ కరెంట్ కనెక్షన్ తప్పనిసరి. లేకపోతే, మీ ఇంట్లోని ఇతర ఎలక్ట్రానిక్ వస్తువులకు తీవ్రమైన నష్టం జరగవచ్చు. కాబట్టి, ఎలక్ట్రిక్ కారు యజమానులు ఈ విషయాన్ని తప్పకుండా గుర్తుంచుకోవాలి.