ఈ కంపెనీ కార్లను 90 రోజుల్లో 17,161 మంది కొన్నారు! ఈ కారును అయితే చాలా మంది ఇష్టపడ్డారు

స్కోడా ఇండియా (Skoda India) తాజాగా విడుదల చేసిన అమ్మకాల గణాంకాలు కంపెనీకి శుభసూచకంగా నిలిచాయి. సెప్టెంబర్ నెలలోనే సంస్థ మొత్తం 6,636 వాహనాలను విక్రయించింది. ఇది గత సంవత్సరపు సెప్టెంబర్ 2021లో నమోదైన అమ్మకాలతో పోలిస్తే దాదాపు రెట్టింపు వృద్ధి సాధించింది. అప్పుడు కేవలం 3,282 యూనిట్లు మాత్రమే అమ్ముడయ్యాయి. అంటే ఈసారి 101 శాతం పెరుగుదలతో స్కోడా అమ్మకాలలో అరుదైన మైలురాయిని చేరుకుంది. ఇక్కడ మరో విషయం ఏమిటంటే, మూడునెలల వ్యవధిలోనే కంపెనీ 17,161 వాహనాలను విక్రయించడం గమనార్హం. ఈ విజయానికి ప్రధాన కారణం స్కోడా ఫ్లాగ్‌షిప్‌ మోడల్ కైలాక్ (Kylaq) అని చెప్పాలి. ధర పరంగా అందుబాటులో ఉండటం, ప్రీమియం లుక్‌తోపాటు ఫీచర్లు ఆకట్టుకోవడంతో ఈ కారు వినియోగదారులను విపరీతంగా ఆకర్షిస్తోంది.

ఒకవైపు కుటుంబాల కోసం సరిపోయే సౌకర్యాలు ఉండగా, మరోవైపు డ్రైవింగ్‌లో స్పోర్టీ ఫీల్ ఇవ్వడం ఈ మోడల్ ప్రత్యేకత. కేవలం కైలాక్ మాత్రమే కాకుండా, స్కోడా కుషాక్, స్లావియా, కోడియాక్ వంటి మోడల్స్ సేల్స్ పెంచాయి. ముఖ్యంగా SUV సెగ్మెంట్‌లో కుషాక్ డిమాండ్ బాగా పెరుగుతుండగా, సెడాన్ వర్గంలో స్లావియా బలమైన స్థానాన్ని సంపాదించింది. అదే సమయంలో ప్రీమియం SUV మార్కెట్‌లో కోడియాక్ కూడా తనకంటూ ప్రత్యేకమైన స్థానం కల్పించుకుంది.

స్కోడా అమ్మకాల ఈ జోరు చూస్తుంటే, భారత మార్కెట్లో బ్రాండ్‌ స్థానం మరింత బలపడిందని చెప్పొచ్చు. సరసమైన ధరల్లో ఆధునిక ఫీచర్లు, గట్టి ఇంజిన్ పనితీరు, ప్రీమియం డిజైన్ కలిపి కంపెనీకి మరిన్ని వినియోగదారులను రాబడుతున్నాయి. రాబోయే నెలల్లో కూడా ఇదే వేగం కొనసాగితే, స్కోడా ఇండియా భారత ఆటోమొబైల్ మార్కెట్లో టాప్ బ్రాండ్లలో ఒకటిగా నిలవడం ఖాయం. ఇక్కడ కైలాక్ మోడల్ గురించి ప్రత్యేకంగా మాట్లాడుకోవాలి.

స్కోడా ఇండియా మార్కెట్లోకి తీసుకొచ్చిన కైలాక్ మోడల్‌ నిజంగా కంపెనీకి గేమ్‌చేంజర్‌గా నిలిచింది. డిసెంబర్ 2024లో తొలిసారి ఎంట్రీ-లెవల్ కాంపాక్ట్ SUVగా పరిచయమైన ఈ కారు, అప్పటి నుంచే వినియోగదారుల దృష్టిని తనవైపు తిప్పుకుంది. సాధారణ SUV లా కాకుండా ఆధునిక లుక్‌తోపాటు, లగ్జరీ టచ్ కలిగిన ఇంటీరియర్స్, ప్రీమియం ఫీచర్లు కలిపి కైలాక్‌కి ప్రత్యేకమైన ఇమేజ్‌ని తెచ్చిపెట్టాయి.

మార్కెట్లో కొత్తగానే వచ్చినా, తక్కువ సమయంలోనే ఇది వినియోగదారుల మనసులను దోచుకుని, స్కోడా బ్రాండ్‌కు బలమైన స్థానం తీసుకువచ్చింది. భారతదేశంలో కాంపాక్ట్ SUVల డిమాండ్ రోజురోజుకూ పెరుగుతున్న నేపథ్యంలో స్కోడా తీసుకొచ్చిన ఈ కైలాక్ మోడల్‌కు మంచి స్పందన లభిస్తోంది. SUVలను కోరుకునే యువతతో పాటు, ఫ్యామిలీ యూజర్స్‌కి కూడా ఇది సరిపోయేలా డిజైన్ చేయబడింది.

ఆకర్షణీయమైన డిజైన్, విశాలమైన కేబిన్, సేఫ్టీ ఫీచర్లు కలిపి ఈ మోడల్‌ను మిగతా కార్ల కంటే ప్రత్యేకంగా నిలబెట్టాయి. ప్రస్తుతం కైలాక్‌ మొత్తం ఏడు వేరియంట్లలో అందుబాటులో ఉంది. ధర విషయానికొస్తే, రూ.7.55 లక్షల ఎక్స్‌షోరూమ్ ధర నుండి ప్రారంభమై, రూ.12.80 లక్షల వరకు ఇది విస్తరించింది. ఈ ప్రైస్ రేంజ్ ఎంట్రీ-లెవల్ SUVలు కొనాలని చూస్తున్న వినియోగదారులకే కాకుండా, ఫీచర్లలో కొంచెం ఎక్కువను కోరుకునే కస్టమర్లకు కూడా సరిపోతుంది.

ఇటీవల కేంద్ర ప్రభుత్వం తీసుకున్న జీఎస్టీ తగ్గింపు నిర్ణయం కైలాక్ అమ్మకాలకు మరింత ఊతమిచ్చింది. చిన్న కార్లపై పన్ను రేటును 28% నుంచి 18%కి తగ్గించడం వల్ల, ఈ మోడల్ ధర మరింత సులభంగా మారింది. గణాంకాల ప్రకారం, వినియోగదారులు ఇప్పుడు సుమారు రూ.1.19 లక్షల వరకు ఆదా చేయగలుగుతున్నారు. ఈ తగ్గింపు కేవలం ధరను తగ్గించడం మాత్రమే కాదు, మరింత మంది వినియోగదారులను షోరూమ్‌ల వైపు తిప్పుకునేలా చేసింది.