పండుగ టైంలో మార్కెట్లోకి కొత్త కారు.. ఫ్యామిలీకి సూపర్ సెట్ అయ్యే కొత్త స్కోడా కోడియాక్

స్కోడా ఆటో ఇండియా తన ప్రముఖ SUV కోడియాక్‌లో మరో కొత్త వెర్షన్‌ను జోడించింది. భారత మార్కెట్లోకి నిశ్శబ్దంగా తీసుకొచ్చిన ఈ కొత్త లాంజ్ వేరియంట్ ఆకట్టుకునే విధంగా ఉంటుంది. ప్రత్యేకత ఏమిటంటే, ఇప్పటి వరకు కోడియాక్‌ను కేవలం 7 సీటర్ కాన్ఫిగరేషన్‌లో మాత్రమే అందించిన స్కోడా, ఈసారి కొత్తగా 5 సీటింగ్ ఆప్షన్‌లో వేరియంట్‌ను తీసుకొచ్చింది. దీని ధర రూ.39.99 లక్షలు (ఎక్స్-షోరూమ్)గా నిర్ణయించారు. కొత్తగా వచ్చిన ఈ లాంజ్ వేరియంట్, ఎంట్రీ-లెవల్ మోడల్‌గా నిలుస్తుంది. దీనితో కోడియాక్‌ను మరింత విస్తృతంగా వినియోగదారులు పొందే అవకాశం ఉంటుంది. దీనిలో లగ్జరీ టచ్, స్టైలిష్ డిజైన్, పవర్‌ఫుల్ ఇంజిన్ వంటి ముఖ్యమైన లక్షణాలు అలాగే కొనసాగుతాయి. పండుగ టైంలో కొత్తగా కారు కొనుగోలు చేయాలనే ఆలోచనలో ఉన్నవారు దీనిని ఎంచుకునే అవకాశం ఉంది.

ప్రస్తుతం మార్కెట్లో కోడియాక్ స్పోర్ట్‌లైన్ రూ.43.76 లక్షలకు, లౌరిన్ & క్లెమెంట్ (L&K) రూ.45.96 లక్షలకు లభిస్తున్నాయి. వీటితో పోలిస్తే కొత్త లాంజ్ వేరియంట్ మరింత సులభమైన ధరలో అందుబాటులోకి వచ్చింది. ఇది కోడియాక్‌ రేంజ్‌ను విస్తరించి, మరింత మంది కొనుగోలుదారులకు SUVను దగ్గర చేసింది. అదనంగా, లాంజ్ వేరియంట్‌లో ప్రీమియం కంఫర్ట్, సేఫ్టీ, లగ్జరీ ఎలిమెంట్స్ ఉన్నాయి.

ఎక్స్‌టీరియర్ డిజైన్‌లో ఆకర్షణీయమైన స్టైలింగ్, శార్ప్ లైన్స్, LED లైట్ సిగ్నేచర్స్ కోడియాక్ SUVను మరింత క్లాస్‌గా నిలబెడతాయి. అంతర్గతంగా, విశాలమైన కేబిన్, లగ్జరీ టచ్ మెటీరియల్స్, అడ్వాన్స్డ్ ఇన్ఫోటైన్‌మెంట్ సిస్టమ్, కనెక్టివిటీ ఆప్షన్స్ కలిపి డ్రైవింగ్ అనుభవాన్ని మరో లెవెల్‌కి తీసుకెళ్తాయి. ఇది శక్తివంతమైన ఇంజిన్, డ్రైవింగ్ పనితీరులో కూడా ఎలాంటి రాజీ పడలేదని చెప్పాలి. ఈ SUVలో 2.0-లీటర్, నాలుగు సిలిండర్, టర్బోచార్జ్డ్ పెట్రోల్ ఇంజిన్ అమర్చబడింది.

ఇది గరిష్టంగా 201 bhp శక్తిని, 320 Nm పీక్ టార్క్‌ను ఉత్పత్తి చేస్తుంది. ఈ ఇంజిన్‌కి తోడుగా 7-స్పీడ్ DCT ఆటోమేటిక్ ట్రాన్స్‌మిషన్ అందించబడింది, దీని వల్ల డ్రైవింగ్ అనుభవం ఈజీ. అంతే కాకుండా, 4x4 డ్రైవ్ సిస్టమ్ ప్రామాణికంగా లభించడం కోడియాక్ SUVకు మరో ముఖ్యమైన ప్రత్యేకత. ఈ ఆల్-వీల్ డ్రైవ్ సిస్టమ్ వలన కేవలం నగర రోడ్లు, ఆఫ్-రోడ్ ట్రిప్స్‌లో డ్రైవర్‌కు పూర్తి నమ్మకాన్ని ఇస్తుంది.

ఫ్యూయల్ ఎఫిషియెన్సీ విషయానికి వస్తే, స్కోడా ప్రకారం కోడియాక్ 14.86 కిమీ/లీ మైలేజ్‌ను అందిస్తుంది. పవర్, లగ్జరీ, సేఫ్టీతో పాటు, తగినంత ఇంధన సామర్థ్యాన్ని కూడా ఈ కారు కలిగి ఉంది. ఈ వేరియంట్‌లో ముఖ్యంగా సేఫ్టీ, లగ్జరీ, టెక్నాలజీ అనే మూడు అంశాలను దృష్టిలో ఉంచుకొని డిజైన్ చేశారు. సేఫ్టీ పరంగా చూసుకుంటే, ఈ SUVలో మొత్తం 9 ఎయిర్‌బ్యాగులు అందించబడ్డాయి.

ఫ్రంట్, సైడ్, కర్టెన్ ఎయిర్‌బ్యాగులు ఉండటంతో డ్రైవర్, ప్రయాణికులందరికీ పూర్తి రక్షణ లభిస్తుంది. SUVకు మరింత ఆకర్షణీయమైన రూపాన్ని ఇచ్చేందుకు 18-అంగుళాల అల్లాయ్ వీల్స్ జోడించబడ్డాయి. వీటితో పాటు ఎక్స్‌టీరియర్ భాగంలో మ్యాట్ డార్క్ క్రోమ్ ఇన్సర్ట్‌లు ఉండటంతో కోడియాక్‌కి మరింత స్టైలిష్ లుక్ వచ్చింది. ఇంటీరియర్ వైపు వస్తే, గ్రే స్వెడ్ ఫాబ్రిక్ అప్హోల్స్టరీ కేబిన్‌కి ఒక ప్రత్యేకమైన లగ్జరీ టచ్ ఇస్తుంది.

అలాగే పనోరమిక్ సన్‌రూఫ్ ప్రయాణాన్ని మరింత ఆహ్లాదకరంగా మార్చుతుంది. డ్రైవర్ కోసం 10.25-అంగుళాల వర్చువల్ కాక్‌పిట్ అందించబడింది. టెక్నాలజీ ఫీచర్లలో 10.4-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ను జోడించారు. వైర్‌లెస్ ఛార్జర్ కూడా ఉంది, దీని వల్ల ఫోన్లను సులభంగా ఛార్జ్ చేసుకోవచ్చు. వెనుక సీట్ల కోసం సన్ బ్లైండ్‌లు అమర్చడం ద్వారా ప్రయాణికుల సౌకర్యాన్ని మరింత పెంచారు. అలాగే స్మార్ట్ డయల్స్ SUVకి ఆధునికతను జోడిస్తున్నాయి.