రోడ్డు మీద రేసింగ్ ఎక్స్ పీరియన్స్ కావాలా..త్వరపడండి.. కేవలం ఫస్ట్ 999 మందికే ఈ కారు కొనే ఛాన్స్

ఎలక్ట్రిక్ వాహనాల మార్కెట్‌లో కూడా తమ సత్తా చాటాలని నిరూపించుకున్న మహీంద్రా అండ్ మహీంద్రా సంస్థ, తాజాగా తమ BE (Born Electric) ప్లాట్‌ఫామ్‌పై మూడవ ఎస్‌యూవీని విడుదల చేసింది. దీనితో పాటు మార్కెట్‌లో ట్రెండీగా ఉన్న BE 6 EVకి ఫార్ములా E ఎడిషన్‌ను కూడా తీసుకొచ్చింది.

ఈ స్పెషల్ ఎడిషన్ కేవలం 999 యూనిట్లు మాత్రమే ఉత్పత్తి చేయనున్నారు. దీనిని కొనుగోలు చేస్తే ఒక అరుదైన ఎలక్ట్రిక్ ఎస్‌యూవీని సొంతం చేసుకున్న అనుభూతి లభిస్తుంది. ఈ మోడల్ FE2, FE3 అనే రెండు వేరియంట్‌లలో లభిస్తుంది. వాటి ఎక్స్-షోరూమ్ ధరలు వరుసగా రూ.23.69 లక్షలు, రూ.24.49 లక్షలుగా నిర్ణయించారు.

ఈ పరిమిత సంఖ్యలో విడుదలైన ఎస్‌యూవీని కొనుగోలు చేయాలనుకునే వారు ముఖ్యంగా మూడు తేదీలను గుర్తుంచుకోవాలి. 2025 డిసెంబర్ మధ్యలో కొనుగోలుదారులు ఆన్‌లైన్ ఆడ్ టు కార్ట్ దశకు అనుమతి పొందుతారు. ఇది పూర్తి రిజర్వేషన్ ప్రక్రియ ప్రారంభం కావడానికి ముందే, తమకు నచ్చిన కాన్ఫిగరేషన్‌ను ఎంచుకోవడానికి అవకాశం ఇస్తుంది.

ఒక నెల తర్వాత, 2026 జనవరి 14 న మహీంద్రా అధికారిక బుకింగ్‌లను ప్రారంభిస్తుంది. అయితే, బుకింగ్ కోసం చెల్లించాల్సిన టోకెన్ మొత్తం లేదా రీఫండ్ పాలసీ గురించి కంపెనీ ఇంకా ఎటువంటి ప్రకటన చేయలేదు. ఆ తర్వాత సరిగ్గా ఒక నెలకే, 2026 ఫిబ్రవరి 14 న కారు డెలివరీలు ప్రారంభమవుతాయని హామీ ఇచ్చారు.

BE 6 ఫార్ములా E ఎడిషన్ డిజైన్ ఫార్ములా E రేసింగ్ స్ఫూర్తితో రూపొందించారు. ఇందులో FIA రిఫరెన్స్‌లు, బోనెట్, సైడ్స్, ఫెండర్‌పై స్పోర్టీ బాడీ గ్రాఫిక్స్ ఉంటాయి. కారుకు మరింత ఆకర్షణ తీసుకురావడానికి R20 అల్లాయ్ వీల్స్, ఫిక్స్‌డ్ గ్లాస్ రూఫ్, సిగ్నేచర్ DRLలు, వృత్తాకార LED ప్రొజెక్టర్ హెడ్‌ల్యాంప్‌లు అమర్చారు.

మెకానికల్ మార్పులు లేకుండా, ఈ ఎడిషన్‌లో 210 kW ఎలక్ట్రిక్ మోటారుతో జతచేయబడిన 79 kWh బ్యాటరీ ప్యాక్ ఉంది. ఇది 282 bhp పవర్, గరిష్టంగా 380 Nm టార్క్‌ను ఉత్పత్తి చేస్తుంది. 180 kW DC ఫాస్ట్ ఛార్జింగ్‌కు ఈ బ్యాటరీ సపోర్ట్ చేస్తుంది. దీని ద్వారా దాదాపు 20 నిమిషాల్లో 20% నుంచి 80% వరకు ఛార్జింగ్ పూర్తవుతుంది.

ఫార్ములా E ఎడిషన్ ఇంటీరియర్‌లో మోటార్‌స్పోర్ట్ థీమ్‌ను అనుసరించి మార్పులు చేశారు. లోపల మహీంద్రా సరికొత్త ఇంటర్‌ఫేస్, వైర్‌లెస్ స్మార్ట్‌ఫోన్ కనెక్టివిటీ, డాల్బీ అట్మాస్ ఆడియో, ఇంటిగ్రేటెడ్ OTT యాప్‌లు, అలెక్సా ఫీచర్లు ఉన్న డ్యుయల్ 12.3-అంగుళాల డిస్‌ప్లేలు లభిస్తాయి.

టాప్-ఎండ్ FE3 వేరియంట్‌కు అదనంగా ఫార్ములా E-నేపథ్య యానిమేషన్‌లు, వెంటిలేటెడ్ ఫ్రంట్ సీట్లు, పవర్డ్ డ్రైవర్ సీట్, డ్యూయల్-జోన్ క్లైమేట్ కంట్రోల్ వంటి ఫీచర్లు ఉన్నాయి. ఈ కారులో లెవెల్ 2 ADAS, ఆరు ఎయిర్‌బ్యాగ్‌లు, 360-డిగ్రీ కెమెరా సెటప్, ఆల్-వీల్ డిస్క్ బ్రేక్‌లు, బ్రేక్-బై-వైర్, TPMS (టైర్ ప్రెజర్ మానిటరింగ్ సిస్టమ్) వంటి అత్యున్నత సేఫ్టీ ఫీచర్లు కూడా ఉన్నాయి.