రూ. 6 లక్షల బడ్జెట్‌లో టాప్ 3 హ్యాచ్‌బ్యాక్‌లు.. టాటా ఆల్ట్రోజ్‌ కు బెస్ట్ ఆల్టర్నేటివ్ ఇవే

కొత్త కారు కొనాలని చూస్తున్నారా? టచ్‌స్క్రీన్ ఇన్ఫోటైన్‌మెంట్ సిస్టమ్, 6 ఎయిర్‌బ్యాగ్‌లు వంటి లేటెస్ట్ ఫీచర్లతో ఇటీవల విడుదలైన 2025 టాటా ఆల్ట్రోజ్ ఫేస్‌లిఫ్ట్ (Tata Altroz Facelift) గురించి విన్నారా? అది రూ.6.89 లక్షల (ఎక్స్-షోరూమ్) ప్రారంభ ధరతో అందుబాటులో ఉంది. అయితే, దీనికి ధీటుగా అంతే బాగున్న, ఇంకా కొన్నిసార్లు తక్కువ ధరకే లభించే ఇతర కార్లు కూడా మార్కెట్‌లో ఉన్నాయి. అవేంటో చూద్దాం.

ఎంతో ఆసక్తిగా ఎదురుచూసిన 2025 టాటా ఆల్ట్రోజ్ ఫేస్‌లిఫ్ట్ (Tata Altroz Facelift) హ్యాచ్‌బ్యాక్ ఇటీవల అట్టహాసంగా మార్కెట్‌లోకి వచ్చింది. ఈ కారు రూ. 6.89 లక్షల ప్రారంభ ధరతో (ఎక్స్-షోరూమ్) లభిస్తుంది. ఇది 1.2-లీటర్ నేచురల్లీ ఆస్పిరేటెడ్ పెట్రోల్, 1.2-లీటర్ CNG, మరియు 1.5-లీటర్ టర్బోఛార్జ్డ్ డీజిల్ ఇంజిన్‌లను కలిగి ఉంది. ఇందులో 5 సీట్లు ఉన్నాయి.

10.25-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్‌తో సహా అనేక ఫీచర్లను ఇది కలిగి ఉంది. సేఫ్టీ కోసం 6 ఎయిర్‌బ్యాగ్‌లు ఇందులో ఉన్నాయి. 'టాటా ఆల్ట్రోజ్ ఫేస్‌లిఫ్ట్'కు ప్రత్యామ్నాయంగా ఈ 3 కార్లను కొనుగోలు చేయవచ్చు. వాటి గురించి మరింత సమాచారం ఈ వార్తలో తెలుసుకుందాం.

1. మారుతి సుజుకి బాలెనో (Maruti Suzuki Baleno): మారుతి సుజుకి బాలెనో ఇదో ఒక ప్రీమియం హ్యాచ్‌బ్యాక్, 'టాటా ఆల్ట్రోజ్ ఫేస్‌లిఫ్ట్'కు అద్భుతమైన ప్రత్యామ్నాయం. బడ్జెట్ ధరలో కూడా లభ్యం అవుతుంది. దీని ప్రారంభ ధర రూ. 6.70 లక్షల నుంచి గరిష్టంగా రూ. 10 లక్షల వరకు (ఎక్స్-షోరూమ్) ఉంటుంది.

ఈ కారు 1.2-లీటర్ పెట్రోల్, CNG ఇంజిన్‌లను కలిగి ఉంది. ఇది 22.35 నుంచి 30.61 కి.మీ.ల వరకు మైలేజ్‌ను అందిస్తుంది. ఇందులో కూడా 5 సీట్ల ఏర్పాటు ఉంది, ప్రయాణీకులు హాయిగా ప్రయాణించవచ్చు. 9-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఆటోమేటిక్ క్లైమేట్ కంట్రోల్, కీలెస్‌ ఎంట్రీ (Keyless Entry) వంటి వివిధ ఫీచర్లను ఇది కలిగి ఉంది. ప్రయాణీకుల సేఫ్టీ కోసం 6 ఎయిర్‌బ్యాగ్‌లు ఇందులో ఉన్నాయి.

2. టయోటా గ్లాంజా (Toyota Glanza): ఈ హ్యాచ్‌బ్యాక్ కూడా 'టాటా ఆల్ట్రోజ్ ఫేస్‌లిఫ్ట్'కు ఒక ప్రత్యామ్నాయ కారు. ఇది చాలా తక్కువ ధరలో లభ్యం అవుతుంది. మధ్యతరగతి కస్టమర్‌లు సులభంగా కొనుగోలు చేయవచ్చు. దీని ధర రూ. 7 లక్షల నుండి రూ. 10 లక్షల వరకు (ఎక్స్-షోరూమ్) ఉంటుంది.

కొత్త గ్లాంజా కారు 1.2-లీటర్ పెట్రోల్, CNG ఇంజిన్‌లను కలిగి ఉంది. ఇది 22 నుంచి 30 కి.మీ.ల వరకు మైలేజ్‌ను అందిస్తుంది. ఈ కారులో 5 సీట్లు ఉన్నాయి. 9-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఆటోమేటిక్ క్లైమేట్ కంట్రోల్‌తో సహా వివిధ ఫీచర్లను ఇది కలిగి ఉంది. సేఫ్టీ కోసం 6 ఎయిర్‌బ్యాగ్‌లు ఇందులో ఉన్నాయి.

3. హ్యుందాయ్ i20 (Hyundai i20): ఇది ఒక ప్రముఖ హ్యాచ్‌బ్యాక్, 'టాటా ఆల్ట్రోజ్ ఫేస్‌లిఫ్ట్' కారుకు మంచి ప్రత్యామ్నాయం. ఈ కారు ధర రూ. 7 లక్షల నుంచి రూ. 11 లక్షల వరకు (ఎక్స్-షోరూమ్) ఉంటుంది. ఇందులో 5 సీట్లు ఉన్నాయి.

ఈ కారు 1.2-లీటర్ పెట్రోల్ ఇంజిన్‌ను కలిగి ఉంది, ఇది 20 కి.మీ.ల వరకు మైలేజ్‌ను అందిస్తుంది. 10-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, పుష్ బటన్ స్టార్ట్, స్మార్ట్ కీ (Smart Key), ఎలక్ట్రిక్ సన్‌రూఫ్ (Electric Sunroof) వంటి అనేక ఫీచర్లను ఇది కలిగి ఉంది. సేఫ్టీ కోసం 6 ఎయిర్‌బ్యాగ్‌లు ఇందులో ఉన్నాయి.

డ్రైవ్‌స్పార్క్ అభిప్రాయం: టాటా ఆల్ట్రోజ్ ఫేస్‌లిఫ్ట్ మంచి ఫీచర్లు, ఇంజిన్ ఆప్షన్లతో వచ్చినప్పటికీ, మారుతి బాలెనో, టయోటా గ్లాంజా, హ్యుందాయ్ i20 వంటి కార్లు కూడా మార్కెట్‌లో బలమైన పోటీని ఇస్తున్నాయి. మీ బడ్జెట్, మైలేజ్ అవసరాలు, కోరుకునే ఫీచర్లను బట్టి ఈ కార్లలో ఏదో ఒక దాన్ని సెలక్ట్ చేసుకోవచ్చు.