లేటెస్ట్ సెన్సేషనల్ టాటా ఆల్ట్రోజ్ కు ఇన్ని పోటీ ఉన్నాయా.. ఇప్పుడివన్నీ ఏ ప్లాన్ వేస్తాయో మరీ ?

కొత్త ప్రీమియం హ్యాచ్‌బ్యాక్ కారు కొనాలని చూస్తున్నారా? టాటా ఆల్ట్రోజ్ (Tata Altroz) ఫేస్‌లిఫ్ట్, మారుతి బాలెనో (Maruti Baleno), టయోటా గ్లాంజా (Toyota Glanza), హ్యుందాయ్ ఐ20 (Hyundai i20) వంటి కార్లలో ఏది బెస్ట్ అని ఆలోచిస్తున్నారా? అయితే ఈ వార్తను పూర్తిగా చదవండి. టాటా కంపెనీ ఇటీవల తమ ఆల్ట్రోజ్ కారుకు కొత్త అప్‌డేట్‌లు ఇచ్చి, మార్కెట్‌లోకి విడుదల చేసింది.

మరి ఈ కొత్త ఆల్ట్రోజ్‌కు దాని పోటీదారులకు మధ్య ధర, ఫీచర్లు, ఇంజిన్ పరంగా ఎలాంటి తేడాలు ఉన్నాయో వివరంగా తెలుసుకుందాం. టాటా ఆల్ట్రోజ్ ఫేస్‌లిఫ్ట్ వెర్షన్ ఇటీవలే విడుదలయ్యింది. ఇది ప్రీమియం హ్యాచ్‌బ్యాక్ సెగ్మెంట్‌లో అమ్ముడవుతున్న టయోటా గ్లాంజా, మారుతి బాలెనో, హ్యుందాయ్ ఐ20 వంటి కార్లకు గట్టి పోటీ ఇవ్వడానికి సిద్ధంగా ఉంది.

ఆల్ట్రోజ్ ఫేస్‌లిఫ్ట్ ప్రస్తుతం రూ. 6.89 లక్షలు (ఎక్స్-షోరూమ్) ప్రారంభ ధరతో మార్కెట్లోకి వచ్చింది. దీని ప్రధాన పోటీదారులైన టయోటా గ్లాంజా రూ. 6.90 లక్షలు, మారుతి బాలెనో రూ. 6.70 లక్షలు, హ్యుందాయ్ ఐ20 రూ. 7.04 లక్షల ప్రారంభ ధరలతో అందుబాటులో ఉన్నాయి. ఈ ధరలు బేస్ వేరియంట్‌లకు సంబంధించినవి.

ఇక టాప్ వేరియంట్ల విషయానికి వస్తే, మారుతి బాలెనో ఆల్ఫా ఆటోమేటిక్ రూ. 9.92 లక్షలు, గ్లాంజా V AMT రూ. 10 లక్షలు, ఆల్ట్రోజ్ అకంప్లిష్డ్ + S రూ. 11.49 లక్షలు, హ్యుందాయ్ ఐ20 N-లైన్ N8 టర్బో DCT రూ. 12.56 లక్షల వరకు ఉంటాయి. బేస్ వేరియంట్లలో ధరలు దాదాపు ఒకే విధంగా ఉన్నా, హ్యుందాయ్ ఐ20 కొద్దిగా ఎక్కువ ధరతో ఉంది.

టాప్ వేరియంట్లలో ఆల్ట్రోజ్ ధర కొంచెం ఎక్కువగా ఉంది. మీరు ఎంచుకునే వేరియంట్‌ను బట్టి ధరలలో తేడాలు ఉండవచ్చు. కొలతల పరంగా చూస్తే, టాటా ఆల్ట్రోజ్ ఫేస్‌లిఫ్ట్ 3990 మిమీ పొడవు, 1755 మిమీ వెడల్పు, 1523 మిమీ ఎత్తు, 2501 మిమీ వీల్‌బేస్‌తో రూపొందించబడింది. బాలెనో, గ్లాంజా, హ్యుందాయ్ ఐ20 కూడా దాదాపు ఇదే కొలతల్లో ఉన్నాయి.

గ్రౌండ్ క్లియరెన్స్ విషయానికి వస్తే.. ఐ20, గ్లాంజా, బాలెనో కార్లు సుమారు 170 మిమీ గ్రౌండ్ క్లియరెన్స్‌ను కలిగి ఉన్నాయి. కొత్త ఆల్ట్రోజ్ గ్రౌండ్ క్లియరెన్స్ వివరాలను టాటా ఇంకా వెల్లడించనప్పటికీ, ఇది కూడా ఇదే స్థాయిలో ఉండవచ్చు.

కొత్త ఆల్ట్రోజ్ కారులో పెట్రోల్, డీజిల్, సీఎన్‌జీ (CNG) ఇంజిన్ ఆప్షన్లు అందుబాటులో ఉన్నాయి. భారతదేశంలో డీజిల్ ఇంజిన్ ఆప్షన్‌లో లభించే ఏకైక హ్యాచ్‌బ్యాక్ కారు ఆల్ట్రోజ్ మాత్రమే కావడం దీని ప్రత్యేకత.

పవర్ అవుట్‌పుట్ విషయానికి వస్తే, అన్ని కార్లలోనూ 1.2 లీటర్ పెట్రోల్ ఇంజిన్ ఉంటుంది. బాలెనో, గ్లాంజా కార్లు గరిష్టంగా 90 bhp పవర్‌ను అందిస్తాయి. ఆల్ట్రోజ్ కారు 88 bhp పవర్‌ను, ఐ20 కారు 83 bhp పవర్‌ను అందిస్తాయి.

గేర్‌బాక్స్ ఆప్షన్ల విషయానికి వస్తే, టాటా ఆల్ట్రోజ్ కారులో 5-స్పీడ్ మ్యాన్యువల్, 6-స్పీడ్ AMT, 6-స్పీడ్ DCT గేర్‌బాక్స్ ఆప్షన్లు ఉన్నాయి. హ్యుందాయ్ ఐ20 కారులో 5-స్పీడ్ మ్యాన్యువల్, 6-స్పీడ్ మ్యాన్యువల్, 7-స్పీడ్ DCT గేర్‌బాక్స్ ఆప్షన్లు ఉన్నాయి. గ్లాంజా, బాలెనో కార్లలో 5-స్పీడ్ మ్యాన్యువల్, 5-స్పీడ్ AMT ఆప్షన్లు అందుబాటులో ఉన్నాయి.

డ్రైవ్‌స్పార్క్ అభిప్రాయం: టాటా ఆల్ట్రోజ్ కారును మార్కెట్‌లోని పోటీదారులకు అన్ని విధాలా గట్టి పోటీ ఇచ్చే విధంగా డిజైన్ చేసింది. ధర, ఫీచర్లు, ఇతర విషయాలలో కూడా ఆల్ట్రోజ్ మెరుగ్గా ఉంది. ఈ కార్లలో మీకు ఏది బెస్ట్ అనిపిస్తుందో మీ అభిప్రాయాలను కామెంట్లలో చెప్పండి.